Levhi 19:23 - Bhiblia Yo Sawuleka

²³ Ngako mi txi wulela ka ditiko di ni nga mi thembisa, mi txi phaya mindonga yi yi ningako mihando yo dyiwa, ya tixaka ta tingi to hambana; amuwa ka malembe mararu, mihando ya kona yi na va i di makhutu; ngu toneto mi nga yi dyeni.

Levhi 19:23 Referans Kwoze

Mithumo 7:51

“Anu va tithamo to banga, makhutu a timbilu ni a tinzeve, anu ma kanyisa yotshe mbimo Moya wo Sawuleka: Mi tekelela vatate vanu.

Levhi 22:27

Ngako ku txi velekwa dirole, mwendo txinvutana, mwendo txihongwana, txi fanete kuzumba ni mame wa txona amu ka mtxhanu wa masiku ni mambidi. Kukhukhela ka ditshiku da wutxhanu ni mararu, ta koteka kumaha mningelo wa mhamba ngu sona ka Mkoma.

Jeremiya 6:10

Ni na gela mani, ni maha wufakazi waku va na wu engisa kani? Tinzeve tawe maphanzeve, kha va sikoti kuengisa. Mhaka ya Mkoma njiruko kwawe kha va yi dhundi.

Levhi 14:34

Anu mi na wulela ka ditiko da Kanana, adi ani ni lavako ku mi ninga, di txi maha thomba yanu. Ngako mi di koneyo, se ni txi thuka ni humelelisa mtungu wa tshekela ka dimwedo da maseta a nyumba yanu,

Levhi 12:3

Se ka ditshiku da wutxhanu ni mararu mwanana a na yiswa wukwerani.

Eksodha 6:12

Ti di ngeto, Mosi a wombile masoni ka Mkoma, a txi khene: “Wona taku, vanana va ka Israyeli kha va khatala ngu ti ni nga va gela. Se ti nga mahisa kutxani ti to Faro, a txi ni engisa kani? Ani kha ni sikoti kuwombawomba ta tinene.”

Eksodha 6:30

Sekoko Mosi a to xamula masoni ka Mkoma, a txi khene: “Ani ni m'thu wa txidimiti; ngu mhaka yeto, mfumeli Faro, a na ni engisisa kutxani kani?”

Levhi 19:22

Ngu mningelo wa mhamba, mphaxeli a na maha mhamba yo dihela txionho txa wule wamwamna ngu hamba yile, masoni ka Mkoma, ngu txona txionho txile, se txionho txi na divalelwa.

Levhi 19:24

Kambe ka dilembe da wumune, yotshe mihando yi sawulekile, yi na va yi txi mahwa mningelo ka Mkoma, kasi ku m'bonga.

Levhi 23:14

Mi nga dyeni mapawu, hambi fulaho yo katingwa, mwendo miburu, kala donedo ditshiku mi no va mi txi tisa mningelo, wa nyanda yo ndiwitela, ka Mkoma, Txizimu txanu; awuwa mthetho mbwa yotshe mbimo kala kupinduka, ka liveleko ni liveleko la ka kwanu, kotshe mu mi no maneka mi di akile kona.