Levhi 18:27 - Bhiblia Yo Sawuleka

²⁷ Nguko vaaki vale va nga hanya kukhatani, anu mi sinzi kumaneka ka dona ditiko diya, va ti ti mahetela timhaka to thisa to nga toneto, va txi di nyeta ngu kubiha kwawe.

Levhi 18:27 Referans Kwoze

Ezekhiyele 22:11

Mmwani a otete ni msikati wa muakelani wakwe, mmwani a txi otela ni mane wakwe, se mmwani a txi gima ndiyakwe, i ku mwanana wa tate wakwe.

Ezekhiyele 16:50

Kambe va ti kulisile ve mahetela ta manyala masoni kwangu; ngu kumaha keto ni va thavisile hale, mbimo yile ni nga ti wona eto.

2 Makronika 36:14

Votshe vathangeli va vaphaxeli ni vathu votshe va to londetela manyala ni sihena so nyenyeza sa vamatiko, va txi nyenyezisela Nyumbani ka Mkoma, mule a nga ti ti kusawulekisete Jerusalema.

2 Vafumeli 21:2

Se a to maha wubihi masoni ka Mkoma, kufana ni manyala a vamatiko, avale Mkoma a nga ti va tutumisile ka makhalo awe, masoni ka vanana va ka Israyeli.

2 Vafumeli 16:3

Nguko a tsimbite ngu nzila ya vafumeli va ka Israyeli, hambi mwanana wakwe a mmahile mningelo wo hiswa, ngu wubihi wa vawuyi vale Mkoma a nga ti ti va tshotshile kule ni vanana va ka Israyeli.

1 Vafumeli 14:24

Kambe ku di ni vafana vo onhetela ha mafuni; va to hanya ngu nzila ya wubihi wa matiko ale Mkoma a nga ti ma tutumisile masoni ka vanana va ka Israyeli.

Dhewuteronome 27:15

“Dikhombo di nave ka m'thu wule a mahako txithombe txo vatwa, mwendo txo bhakwa, nguko manyala ka Mkoma, tximaha txa mthumo wa manza a vathu, a txi txi khozela kusisalani!” Se vathu votshe va na womba va txi kha vona: “Amen!”

Dhewuteronome 25:16

Nguko Mkoma, Txizimu txako, wa nyenya votshe vale va mahetelako toneto, votshe vale va kanganyisako.

Dhewuteronome 23:18

U nga tise hakhelo ya wugango, mwendo mtengo wo dihelwa yimbwa, Nyumbani ka Mkoma, Txizimu txako, ngu kuxambanya kokari; nguko ngu wumbidi wa sona, nzinyenyeko ka Mkoma, Txizimu txako.

Dhewuteronome 20:18

kasi ku va si mi gondisi kumahetela kotshe kubiha kwawe, akule vona va nga txi mahetela ka sizimu sawe; nguko mi nga va mi txi onhela Mkoma, Txizimu txanu.

Levhi 18:24

Mi nga ti bihiseni ngu kumahetela tona timhaketo, nguko va ti bihisile toneto vathu vale ni va tovelako masoni kwanu.

Hoseya 9:10

Ni mani Israyeli ku nga mauvha txiwulani, ni woni vatate vanu ku nga mihando yo khata ya mkuwu wo tewula; kambe vona va toya Bhahali-Peyori, veya ti ningetetela ka tximahetxo txa tingana, ve maha manyala kufana ni txile va nga txi randa.

Levhi 18:26

Kambe mi fanete kulondeta milayo yangu ni mithetho yangu, mi si maheteli timhaka to thisa hagari kwanu, anu vanyamne va ditiko, kumweko ni valuveli.

Levhi 18:28

Kasi ku ditiko diya di si mi kosi nanu, ngu kumaneka mi txi di nyenyezisa ngu kubiha kwanu, nga kule di nga kosa vaaki vale va nga hanya ka dona, na anu mi sinzi ku va ho.