Levhi 18:24 - Bhiblia Yo Sawuleka

²⁴ Mi nga ti bihiseni ngu kumahetela tona timhaketo, nguko va ti bihisile toneto vathu vale ni va tovelako masoni kwanu.

Levhi 18:24 Referans Kwoze

Dhewuteronome 18:12

ni wihi wule koko a mahetelako totshe tiya, njiyenyeko ka Mkoma; se ngu mhaka ya sinyenyeko siya, Mkoma Txizimu txako, a na va tshotsha kule ni nawe vathu vava.

Levhi 18:30

Ngu toneto, xoniphani sileleto si ni nga mi mahela, mi si londeteli mikhuwo yo biha, ayile va nga yi mahetela vale va nga thanga vona, na mi sinzi kumaneka anu, nguko mikhuwo yoneyo yi nga mi nyenyezisa. Ani ngani Mkoma, Txizimu txanu.

1 Vakorinto 3:17

Ngako m'thu a txi hasulela dithepele da Txizimu ni txona txi na mu hasulela. Nguko dithepele da Txizimu di sawulekile, se dithepele diya ngu nganu.

Jeremiya 44:4

Ni mi rumelete sotshe sithumi sangu i ku vaprofeti, ni mixo ngutu ku ta womba tiya: Mi nga maheni wubihi wu ni wu nyenyako.

Dhewuteronome 12:31

U nga ti mahe eto masoni ka Mkoma, Txizimu txako! Nguko totshe ti Mkoma a ti nyenyako, totshe ti ene asi ti laviko, vona va ti mahile ka sizimu sawe, aha koza va txi hisa vanana vawe vavafana ni vamahorana, va txi dhumisa sizimu sawe.

Levhi 18:3

Mi nga maheni ati va mahako Vaegipta, vale mi nga hanya navo ka masiku ale ma nga pinda, hambi tile va mahako Vakanana, vathu va ditiko dile ni lavako ku mi yisa ka dona, hambi kulondeta mikhuwo yawe.

Genesisi 15:16

Vanana va liveleko lako la wumune va na wuya kambe kona muwa, nguko konkuwa wubihi wa Vaamori kha wu se hoka magwito ka wona.”

Mitengo 35:34

Mi nga nyenyeziseni koko, ditiko di mi zumbako ka dona, adi ni no zumba ka dona; nguko ani Mkoma, ni zumba hagari ka vanana va ka Israyeli.

Dhewuteronome 9:4

Ngako koko Mkoma, Txizimu txako, a di va tutumisile masoni kwako, u nga wombe mbiluni kwako u txi khawe: “Mkoma a ni fumisile ka ditiko diya, ngu mhaka ya kululama kwangu,” nguko Mkoma a tutumisa matiko awa ngu mhaka ya kubiha ka ona.

1 Vafumeli 9:7

sekoko ni na khundumusa Israyeli ka ditiko di ni nga mninga; se ka yiya nyumba ni nga yi sawulekisela ditina dangu, ni na yi tshotsha kule ni nani, se Israyeli a na maha wa kuwombwa ni kumimelelwa, hagari ka votshe vathu.

Ezra 9:1

Na ti di gwitile totsheto, va tile kwangu madhota ma txi ta kha ona: Vathu va ka Israyeli ni vaphaxeli, ni Valevhi, kha va zivi ku ti hambanisa ni vathu va matiko awa, ngu kulondisela sinyenyeko sa Vakanana, Vaheti, Vaferezi, Vajebhusi, Vaamoni, Vamowabhi, Vaegipta, ni Vaamori,

Masalmo 106:39

Ka toneto ni vona va ti nyenyezisile ngu mithumo yawe ve maneka va sa thembeka ka Txizimu.

Dhewuteronome 9:5

Hi nga ngu mhaka ya kululama kwako, kambe hi nga ngu mhaka ya wunene wa mbilu yako, aku u ngaza u wulela, u teka ditiko dawe, aniko Mkoma a tutumisa matiko awa masoni kwako, ngu mhaka ya kubiha ka ona; ni ti to a maha tiya, kasi kutsanisa dipswi di ene a nga xambanya ka vatate vako, Abrahamu, Isaake, ni Jakobe.

Valamuli 20:5

Se vaaki va Gibheya va to ni wukela, va txi randela nyumba ni wusiku, se va lavile ku ni daya, va txi kurumeta txikaba txangu, kala kuza txi fa.

Valamuli 20:6

Sekoko ni to teka txikaba txangu, ni txi txi wilela ngu sihango, ni txi si rumela ka dotshe ditiko di i kuthomba ya ka Israyeli, nguko va mahile mhaka yo biha yo nga yoneyo, i ku txiruko ka va ka Israyeli.

Valamuli 20:10

Se hi na teka digumi da vavamna ka dizana, ka totshe tihunzu ta va ka Israyeli, ni 100 ka 1.000, ni 1.000 ka 10.000, va txi ya teka timbuva ta ku ta ninga vathu, kasiku ngako va txi na hoka Gibheya ka Bhenjamini, va na yalwa madingano ni wotshe wubihi, wule wu nga mahelwa va ka Israyeli.

2 Makronika 33:2

A to maha wubihi masoni ka Mkoma, kufana ni manyala a vathu va mamwani matiko, va Mkoma a nga ti vatutumisile masoni ka vanana va ka Israyeli.

Ezekhiyele 36:17

Awe mwanana wa m'thu, mbimo yile va nyumba ya ka Israyeli va nga ti ti zumba ditikoni kwako, va di nyenyezisile ngu dihanyo dawe ni mithumo yawe; kufana ni wamsikati wu a ku ka mbimo yakwe yo zumba didhawa, edo i ti ti dihanyo dawe, masoni kwangu.