Levhi 17:7 - Bhiblia Yo Sawuleka

⁷ Va nga engete kambe va txi maha mningelo wa mhamba ka madhimoni, va nga ti ti patile nawo, va txi maneka va si thembeki. Awuwa mlayo wa kala kupinduka, ka lotshe liveleko lakwe.

Levhi 17:7 Referans Kwoze

1 Vakorinto 10:20

Se ani kha ni ti lavi ti to mi txi sengela ni madhimoni.

Eksodha 34:15

U nga mahe txitumelelano txokari ni vaaki va kona ditikonimo, nguko, mbimo yi va mahako wugango ni sizimu sawe, va txi si mahela miningelo ni miphaxo, va nga thuka va txi kudhana u txi ya dya timhamba tawe.

2 Makronika 11:15

Se Robhowamu a to ti sawulela vaphaxeli vakwe e va veka mimangoni, ni va madhimoni, ni marole ale a nga ma wumba.

Dhewuteronome 32:17

Va mahile miphaxo ka madhimoni, na i si nga ka Txizimu; ni sizimu sile va nga mbi si ziva, sizimu sa siphya, si si nga mahwa kona kuwa, asile vatate vanu va nga mbi si thava.

Masalmo 106:37

Va ti phaxa ngu kuningela vanana vawe vavafana ni vamahorana ve va maha mhamba ka ona madhimoniyo.

Mtuletelo 9:20

Vamwani vathu va nga mbi dawa ngu sixaniso siya, kha va nga hunduluka ka mithumo ya manza awe, ti to ve leka kukhozela madhimoni, ni sithombe sa nzalama ni silivela ni simbi ya disotxe ni sa dirigwi ni sa mindonga, asi si sikotiko kuwona, hambi kuengisa mwendo kutsimbila.

Ezekhiyele 23:8

Ni wotshe wugelegele wule a nga ta nawo ngu Egipta kha wu leka; nguko va otete nayo i di ngadi mphya, kambe va ñoletete titshumbu ta wuhorana wakwe, se ve thela kwakwe wubihi wawe.

Dhewuteronome 31:16

Se Mkoma a wombile ka Mosi a txi khene: Wona, u hafuhi ni kutsula u txi ya humula kumweko ni vatate vako; se vathu vava, va na khukha va txi ya maha wugango ni simwani sizimu sa ditiko dile u lavako kuwulela ka dona. Vona va na ni leka va txi ndaka mlayo wa txitumelelano, txi ni nga txi sunga navo.

Levhi 20:5

ani ni na tshemberisa khohe yangu ni txi muwukela eyo m'thu, ni yotshe nyumba yakwe, kumweko ni vale va nga patana nayo, va txi mahetela kubiha, ve khozela Moloke.

Eksodha 32:8

Ngu kukuluveta va hambukile ka nzila yi ni nga va leletela. Va ti mahete dirole da nzalama yo khandwa, ve di khozela, ni ku di mahela mphaxo, va txi kha vona: “Asiya nzizimu sako awe Israyeli, asi si nga kuhumisa ditikoni ka Egipta!”

Eksodha 22:20

Awule a phaxelako ka simwani sizimu, i si nga ka Mkoma, a na dawa.

Vaefesu 2:2

asiya kale mi nga txi hanyela ka sona, mbimo yi mi nga txi londetela minavelo ya ha mafuni hawa, madingano ni kuranda ka mkoma wu a fumako ka mpfhuka wu wu ku txitimwi ka mafu, i ku moya wu, ni konkuwa, wu thumako hagari ka sindaka-milayo.

2 Vakorinto 4:4

Ngu vona vale va si kholwiko, ava Txizimu txo biha txa ha mafuni txi nga va maha mabhofu mapimoni kwawe, kasiku va si woni liwoningo la Evhangeli ya wudhumo wa Kristu, awu i ku txifananiso txa Txizimu.

Johani 14:30

Kha ni na mbi womba-womba to tala ni nanu, nguko awu a fumako, wa mafu awa wata. Kambe kha nga ni mtamo wa txilo txitimwi kwangu.

Johani 12:31

Se ngu yona yiya mbimo ya kulamulwa ka ditiko. Ngu kona a no tovelwa mfumi wa mafu awa.

Jeremiya 3:1

Vona va kha vona: Ngako wamwamna a txi tovela msikati wakwe, eyo wamsikati e ti tsulela, eya tekwa ngu mmwani wa wamwamna, ina mwamna wakwe wo khata a nga mtshumelela kambe kani? Ditiko edo kha di na mbi bihiswa ngu kumaha eto kani? Aniko awe, u nga hungala ni sigango so tala, ina u na tshumelela kwangu, kuwomba Mkoma.

Levhi 3:17

Njileleto txa kwa mbi gwita ka tiveleko tanu, kotshe mu mi no zumba kona: Mi nga dyeni mafura ni ka kudotho, hambi ni mnoha.

Levhi 17:8

U na va gela ku khawe: Ngako m'thu wa ka Israyeli, mwendo mluveli wu a nga aka navo, a txi lava kumaha mningelo wo hiswa mwendo yimwani mhamba,

Masalmo 106:39

Ka toneto ni vona va ti nyenyezisile ngu mithumo yawe ve maneka va sa thembeka ka Txizimu.

Ezekhiyele 23:3

Va to maha wugango Egipta; va mahile wugango i di ngadi vavaphya; va khutaretwe tikhana tawe, titshumbu ta wumbiri wawe ti kamaretetwe.

Eksodha 22:19

Ni wihi wule a otelako ni txihari ngu ditshuri a na dawa.

Eksodha 27:21

Amu ka ditenda da msengeletano, ngu hahanze ka m'jiyo, awu wu fenengetako wufakazi, Aroni ni vanana vakwe va na thela mtona wuwa amu ka malambu, kasiku me tura kukhukhela ni minova kala ditxitxa, me woninga masoni ka Mkoma. Awuwa mthetho wu na vaho ka vanana va ka Israyeli ni ka situkulwana sawe sotshe.”