Levhi 10:17 - Bhiblia Yo Sawuleka

¹⁷ Ngu kutxani mi nga mbi dya nyama ya mabhongwe, ya mningelo wa mhamba yo kuwula txionho ha wukhaloni ko sawuleka, kani? Nguko njilo txo sawuleka ngutu ka Mkoma, a mi ningile kasi ku mi rwala sotshe sionho sa msengeletano, mi maha m'diho wa sionho, masoni ka Mkoma.

Levhi 10:17 Referans Kwoze

Mitengo 18:1

Sekoko Mkoma a to khene ka Aroni: Awe, ni vanana vako, ni nyumba ya tate wako, mi na amukela kunemela ka nyumba yo sawuleka, ni ti to awe ni vanana vako, mi na rwala mnandu wa wuphaxeli wanu.

Eksodha 28:38

Txona txi fanete txi txi maneka hambanza ka Aroni, se ene Aroni a na rwala kubiha ngu didhawa da simaha so sawuleka, asi vanana va ka Israyeli va no si ningela ngu miphaxo yawe yo sawuleka. Txi na maneka mbimo yotshe ha mbanza kwakwe, kasiku a txi mana wuxinji masoni ka Mkoma.

1 Pedro 2:24

Ene a nga rwala sionho sathu ngu mmidi wakwe, ha txihambanoni, kasiku, ngako hi txi fa ka txionho, hi na sikota kuhanya ngu kululama. Anu mi hanyisilwe ngu silonda sakwe.

Vahebheru 9:28

ngu toneto, Kristu a ti ningete kumweko basi, kufela kufuvisa sionho sa vathu vavangi. A na woneka da wumbidi, i si nga ngu mhaka ya txionho, aniko ngu mhaka ya ku ta hanyisa avale va m'verelako.

2 Vakorinto 5:21

Kristu kha ziva txionho, kambe Txizimu txi mmahile txionho ngu kota yathu, kasiku athu hi txi maha volulama masoni ka Txizimu ngu kota yakwe.

Johani 1:29

Mangwanani ka kona, Johani a to wona Jesu, a nga txi ta kwakwe, se a txi khene: “Wonani Txinvutana txa Txizimu atxi txi kuwulako sionho sa ditiko.

Levhi 22:16

Ngako vaphaxeli va txi tumetisa vamwani vathu va txidya sa mningelo wa mhamba, vona vathuvo va na rwala txionho txi txi ku ni fanelo yo dihelwa: Ani ngani Mkoma, ni sawulekisako.

Levhi 16:22

Ngu toneto, mabhongwe wule a na rwala kotshe kubiha kwawe, e tsula nako txiwulani.

Eksodha 28:43

Aroni ni vanana vakwe, va na si ambala mbimo yi va wulelako amu ka ditenda da msengeletano, mwendo mbimo yile va tshuketako ha txiluveloni, kuya maha mthumo ka wukhalo wo sawuleka, kasi ku va si mani txionho, va txi fa; atxiya i nava txileleto txa kala kupinduka, ka Aroni, ni ka liveleko lakwe, msana kwakwe.

Levhi 21:22

Ene wa sikota kudya sakudya sa Txizimu txakwe, asi i ku mhamba, simaha sa kusawuleka ka kusawuleka, simaha sa kusawuleka ngutu.