Levhi 1:3 - Bhiblia Yo Sawuleka

³ Ngako a txi lava kuningela i ti mphaxo wo hiswa ka Mkoma ngu txihari txa hombe, a fanete kusawula matune wa kwa mbi na txibawa, e di yisa ha txikeni ka ditenda da msengeletano, kasiku eya mana kuamukeleka masoni ka Mkoma.

Levhi 1:3 Referans Kwoze

Dhewuteronome 15:21

Ngako txifuyo txako txi di ni wulima wokari, txi txi nzoda mwendo txi di fite maso, hambi kuva ni wumwani wulima wa hombe, u nga txi ningele ka Mkoma, Txizimu txako ha txiluveloni.

Vahebheru 9:14

ngutu-ngutu mnoha wa Kristu, awu a nga ti ningela apune, na a si nga ni txionho, ngu Moya wo Sawuleka, ka Txizimu txi txi hanyako, ngu wona wu ku ni mtamo wa kubasisa timbilu tathu ka mithumo ya lifo, ti to hi sikota kuthumela Txizimu txa kuhanya.

Eksodha 12:5

Txinvutana mwendo txihongwana txi na va txa matune, txo mbi limala, na i di txa dilembe dimwedo. Anu mi na sawula tximwetxo hagari ka tinvuta mwendo hagari ka tiphongo;

Vaefesu 5:27

kasiku a txi di emisa masoni kwakwe, i di Dibanza do tshura, adi di ku si nga ni sibawa mwendo tingonye, mwendo tximwani txo fana ni soneso; aniko di txi maneka i di do sawuleka, adi di ku si nga ni txionho.

Dhewuteronome 17:1

“U nga mahe mphaxo ka Mkoma, Txizimu txako, ngu homu mwendo nvuta, yi yi ku ni txibawa mwendo wulima, nguko eto ta nyenyeka masoni ka Mkoma, Txizimu txako.

Vahebheru 7:26

Kha ditshuri, ngene mphaxeli wa hombe wu a hi fanelako: Wa kusawuleka, a si nga ni mnandu, wa kubasa mbilu, wa kuhambana ni vaonhi, wa kuguletwa txitimwi ka tinzuma.

Vaefesu 2:18

Ngu toneto, ngu mtamo wa Jesu, hotshethu vathu va tixaka tiya ta timbidi ha mana kuamukelwa ngu Tate ka wonewo Moya wawumwewo.

Genesisi 22:8

Abrahamu a to xamula, a txi khene: “Txizimu ngu txona txi no ti lulamisela txihambana txa kuya maha ngu txona mhamba ya kuhiswa, mwanangu.” Se va to tsula ngu wumbidi wawe.

Johani 1:36

Ku ti ngako a txi wona Jesu na a txi pinda, a to khene: “Wonani Txinvutana txa Txizimu.”

2 Vakorinto 9:7

M'thu a na ningele kota nga ti a xuvisako tona mbiluni kwakwe, asi karateki mwendo kukurumetwa, nguko Txizimu txi randa awu a ningelako ngu litsako.

Malakiya 1:14

Sekoko a na rukwe mkanganyisi wule waku, a di ni txihari ka mtxhambi wakwe, wa thembisa, kambe e ningela ka Mkoma tximaha txo soleka; nguko ani ngani Mfumeli wa hombe, kuwomba Mkoma wa Mabutho a Tiyimbi, ditina dangu di na maha do thisa hagari ka matiko.

Ezekhiyele 20:40

Nguko ka mmango wangu wo sawuleka, mmangoni ko guleka ka Israyeli, kuwomba Mkoma Txizimu, nguyo yi no ni thumela kona yotshe nyumba ya ka Israyeli, yotshe ka dona ditiko dile; koneyo ni na tsaka ngu vona, kambe ni na amukela miningelo yanu yo ndiwitelwa, ni miningelo yanu yo khata, ni sotshe somaha sanu so sawuleka.

Masalmo 110:3

Vathu vako va nata kwako ngu kutsaka, ngako u txi xoma matxhari a kuya yimbini. Mazambi ma nata kwako ma di ambate syambalo sa bombo, nga txiandela txa mixo.

Masalmo 40:8

Ni tsaka ngutu ngu kumaha kuranda kwako, Txizimu txangu; Mlayo wako wu mndani ka mbilu yangu!

Mitengo 29:13

Se ngu mphaxo wa kuhiswa, wo bhumula, ka Mkoma, mi na ningela digumi da marole ni mararu, tihamba timbidi, ni digumi da sinvutana ni mune, sa dilembe dimwedo; sa kwa mbi na sibawa.

Levhi 3:1

Se ngako mningelo wakwe i di wa mhamb ya mpatano, ngu homu, wa sikota kuningela ka Mkoma matune mwendo mkati, aniko kulaveka i di so mbi na txibawa.

Eksodha 24:5

Ngu msana a to ruma mazambi okari a vanana va ka Israyeli, kasiku va txi maha miningelo yo hiswa, va txi maha miphaxo ka Mkoma ngu kudaya marole va txi dhumisa Mkoma.

Genesisi 22:13

Sekoko mbimo yile Abrahamu a nga gula maso, a to wona txihambana msana kwakwe, txi di khwekete ngu titxheho makhukhuni; Abrahamu a to ya teka txihambana txile, e txi ningela txi maha mhamba yo hiswa, txi txi tsiveta mwanana wakwe.

Johani 10:9

Ani ngani ni ku txike: Ngako m'thu a txi wulela ngu ngani, a na hanyiswa; a na wulela, a txi huma, eya mana lihawu.

Luka 1:35

Se ngelozi yi to mu angula tiya: “Moya wo Sawuleka wu na txhika txitimwi kwako, se mtamo wa Nyatxitimwi wu na kufenengeta ngu mtsudi wakwe. Ngu toneto, Msawuleki wu a no velekwa a na dhanwa ku Mwanana wa Txizimu.

Isaya 1:11

Mkoma a khene: Yi ni vhuna txani miphaxo yanu yo tala kani? Ni karate ngu miningelo yo hiswa ya tihamba, ni mafura a sifuyo so nona; kha ni tsakeli mnoha wa marole, wa sivuntana, ni mnoha wa tiphongo.

Eksodha 32:6

Mangwanani ka kona ni mixo, va to wuka, va txi humisa miningelo yo hiswa, ni miphaxo ya kudikha. Vathu votshe va to khalahatsha va txi dya ni kusela; msana keto, va to khukha ve humula.

Eksodha 29:42

Awuwa mningelo wa mhamba yo hiswa wu na va wa mbimo yotshe awule wu no mahwa ngu nganu ngu liveleko ni liveleko ha txikeni ka ditenda da msengeletano, masoni ka Mkoma, ka wukhalo wule ni no tshangana ni nanu kasiku ni womba-womba ni nawe.

Eksodha 29:18

Ngu toneto, u na hisa hamba yotshe ha txiluveloni; mningelo wa kuhiswa wo lumba Mkoma, wo bhumula, mningelo wuwa mbwo mahela Mkoma.

Genesisi 22:2

Txizimu txi to kha txona: “Teka mwanana wako, mwanana wako wammweyo, ene Isaake, awu u m'dhundako ngutu, u tsula ka ditiko da Moriya, ahawa u no ya mningela, u txi mmaha mhamba ya kuhiswa, ka mmango wu ni no kukomba.”

Genesisi 8:20

Nowa a to akela Txizimu txiluvelo, e teka sihari sokari ka sotshe so sawuleka, ni ka sotshe sinyana so sawuleka, a txi maha mningelo wo hiswa ha txiluveloni.

Zakariya 13:7

Awe ditxhari khukha u lwa ni m'dyisi, lwana ni wamwamna wule i ku mngana wangu, kuwomba Mkoma wa Mabutho a Tiyimbi; peka m'dyisi, se ti na hangalaka tinvuta; aniko ni na nawuluta dianza dangu, ni peka vale vavadotho.

Mitengo 23:3

Sekoko Bhalahamu a to khene ka Bhalake: Ema kona hafuhi hawa ka mphaxo kwako wo hiswa ani ni na tshuketa didhawa; mwendo Mkoma a nata woneka kwangu; se ni nata kugela ti a no ni leleta tona. Sekoko a to kwela ka wukhalo wo guleka.

2 Vakorinto 8:12

Nguko, ngako ku diho kuxuva kuhumisa misengo, sa amukeleka asi m'thu a ku naso; kha ku nga ni mhaka ya si a ku si nga naso.

Johani 10:7

Jesu a engetile e va gela kambe a txi khene “Ngu ditshuri, ngu ditshuri, na mi gela ti to ani ngani ni ku txike txa tinvuta.

Mitengo 23:19

Txizimu kha txi na makuhu nga m'thu. Lambi, txona hi nga mwanana wa m'thu wo txitxa-txitxa. Txizimu hi nga txo womba dwe txi si mahi, ina kha txi mahi ti txi nga womba kani? Kasi hi nga txo womba ti txi tatiseka kani?

Levhi 17:9

na asi wu yisi ha txikeni ka ditenda da msengeletano, kasiku eya maha mningelo ka Mkoma, a na va a txi tutumiswa ka vathu va ka kwawe.

Levhi 4:23

mwendo txionho txile a nga txi maha, txi txi ziwa, sekoko a tisa mabhongwe wo tekwa hagari ka tiphongo, kasi ku ta maha mphaxo wa kuthavisa txionho.

Eksodha 35:5

Thavisani txokari aha ka tithomba tanu, kasi kumaha mningelo ka Mkoma! M'thu wule a ti lavako ngu mbilu yakwe, a fanete kumaha mningelo ka Mkoma ngu nzalama, ni silivhela, ni koporo;

Eksodha 29:4

Sekoko u na maha ati to Aroni ni vanana vakwe ve tshuketa ha txikeni ka ditenda da msengeletano u txi va kuwula ngu mati.

Levhi 17:4

hambi i txo va ha txikeni ka ditenda da msengeletano, a si mahi mningelo ka Mkoma, masoni ka wukhalo wo sawuleka wa Mkoma, a na va ni mnandu, ngu kuva a di theketile mnoha; ngu toneto a na va a txi tovelwa hagari ka vathu va ka kwakwe.

Levhi 16:7

Se a na teka vamabhongwe vambidi e va tisa ka Mkoma ha txikeni ka ditenda da msengeletano.

Levhi 8:21

Kambe msana ka kuva a di kuwute masembe ni maswondo, ngu konaho, Mosi a to si hisa ha txiluveloni, kumweko ni nyama yotshe ya hamba. Ayiya i mhamba yo hiswa yo bhumula, mhamba yo dhumisa Mkoma, nga ti Mkoma a nga leletisa tona ka Mosi.

Levhi 8:18

Msana keto, Mosi a to ruma ti to hamba yi tiswa, kasi ku ta maha mningelo wa mhamba yo hiswa; se Aroni ni vanana vakwe, va to sanzeka manza awe ha msungo ka hamba;

Levhi 7:16

Se i di mhamba ya txixambanyo ngu txithembiso txokari, mwendo mhamba yo mahwa ngu kuranda ka m'thu dwe, nyama yi na dyiwa ka donedo ditshiku; ayi yi no sala yi nata dyiwa mangwanani ka kona.

Eksodha 38:1

Se a to maha txiluvelo txa mphaxo wo hiswa ngu mapulango a mndonga wa setime, txa mtxhanu wa mikono ya kulapha, ni yimwani mtxhanu wa mikono ya kuanama, i ti txa mune wa madhawa o fana, kambe txi ti ti ni mikono yiraru ya kudemba.

Eksodha 36:3

Vona va to amukela, ngu ka Mosi sotshe simaha sa miningelo, asi vanana va ka Israyeli va nga si tisa, kasi ku ta khata kumaha mthumo wa kuaka nyumba ya wukhongeli. Vanana va ka Israyeli va to simama ve tisa miningelo ditshiku ni ditshiku ni mixo, ngu kuranda kwawe.

Eksodha 35:29

Votshe vanana va ka Israyeli, vavamna ni vavasikati, avale va nga ti ni kunavela kumaha mningelo wuhi ni wuhi kasi kukulisa mthumo awu Mkoma a nga ruma Mosi kasiku e wu maha, m'thu ni m'thu a to heleketa ngu kuranda ka mbilu mningelo ka Mkoma.

Eksodha 35:21

Ni votshe avale va nga ti ni kunavela ka ditshuri ni timbilu to lulama va to tsula se va txi ya teka miningelo yawe kasi ku ta ningela ka Mkoma yi txi maha miningelo ya simaha sa wuaki wa ditenda da msengeletano ka mthumo ni ka syambalo so sawuleka.

Mitengo 23:30

Bhalake koko a to maha madingano ni ti Bhalahamu a nga m'gela ti to e maha; mningelo wo hiswa, ngu dirole ni hamba, ka txiluvelo tximwetxo ni tximwani.

Dhewuteronome 12:27

U na maha miningelo yako yo hiswa, nyama ni mnoha, ha txiluveloni ka Mkoma, Txizimu txako; mnoha wa timhamba tako wu na thelwa ha txiluveloni ka Mkoma, Txizimu txako, kambe u na dya nyama ya kona.

Mitengo 23:27

Bhalake a to engeta a txi khene ka Bhalahamu: “Ngono, ni ta kukomba wumwani wukhalo, mwendo Txizimu txi na tumela ku va phosela ngu kona.”

Levhi 1:10

Ngako m'thu a txi lava kumaha mningelo wa mhamba yo hiswa ngu txihari txatxidotho, nvuta mwendo phongo, njihari txa matune, txo mbi limala,

Levhi 4:15

Se madhota a msengeletano ma na sanzeka manza a ona ha msungo ka txidhunana, masoni ka Mkoma, konaho didhuna di na wilwa mkolo.

Levhi 6:8

Mkoma a to womba kambe ka Mosi, a txi khene:

Levhi 17:8

U na va gela ku khawe: Ngako m'thu wa ka Israyeli, mwendo mluveli wu a nga aka navo, a txi lava kumaha mningelo wo hiswa mwendo yimwani mhamba,

Mitengo 15:3

mi humisa mningelo ka Mkoma, mphaxo wo hiswa, mwendo mhamba yo tatisa txixambanyo, mwendo ku ngava mningelo wa kuranda kwanu, ngu mixuvo yo lava kuningela ka Mkoma mningelo wo bhumula, ngu tinvuta, mwendo tihomu ta mikati;

Mitengo 15:8

Sekoko, u txi ningela ngu dirole da didhuna kasi kumaha mphaxo wo hiswa, ni wo tatisa txixambanyo, mwendo mphaxo wa kuthutha masoni Mkoma;

Ezekhiyele 40:39

Ka m'hubhe wa ha txikeni, ku ti ti ni timeza timbidi ka didhawa dimwedo, ni timbidi ka dimwani, kasi kudayela ka tona miningelo yo hiswa, ni mningelo wa kudivalelwa ka txionho, ni mnandu.

Levhi 4:3

ngako i di mphaxeli, a nga maha txionho, e maha txikhuvekiso ka vathu, a na ningela ka Mkoma, kota mhamba yo kuwula txionho, dirole do mbi limala.

Levhi 4:32

Aniko ngako a txi dhunda kumaha mhamba ngu txinvutana, kasi kudivalelwa txionho, a fanete e maha ngu txinvutana txa makati, txo mbina txibawa.

Levhi 5:15

Ngako m'thu wokari a txi hambanisa mlayo ngu kulunduma amu ka miningelo ya Mkoma, sekoko a fanete kutisa ka Mkoma, kasi kudivalewa txionhotxo txa kulunduma, hamba ngu ka mtxhambi wakwe, yo mbi na txibawa. Mpimo wa kunemela wu wu dinganako kuhumiswa wa silivhela, wu ku ni fanelo yo ningelwa, madingano ni mipimo yi yi thumiswako mu dithepeleni, kasi kudivalela txionho.

Levhi 5:18

A fanete kuteka hamba yo mbi na txibawa, e yi yisa ka mphaxeli, madingano ni txionho txakwe. Se mphaxeli a na maha mhamba yo kuwula txionho txi a nga txi maha ngu kulunduma, se ene a na divalelwa.

Levhi 6:2

Ngako m'thu wokari a txi onha, a txi wukela Mkoma, e kanganyisa ngu kwa mbi tshumeta ka mwakelani wakwe, asile a ku naso, mwendo ku mpela, mwendo ku mlambela, e ti tsimba ngutu ka mwakelani wakwe;

Levhi 9:2

A to khene ka Aroni: Teka dirole, kasi kumaha ngu dona mhamba yo kuwula txionho, ni hamba yo maha mningelo wo hiswa, sihari siya ngu si so mbi na sibawa, u na si ningela ka Mkoma.

Levhi 14:10

Ka ditshiku da wutxhanu ni mararu, a na teka sinvutana simbidi so mbi na txibawa, ni txinvutana txa dilembe dimwedo, txo mbi na txibawa, ni mipimo yiraru ka digumi da yona ya mpupu wo vhuvwa ni mtona, ku txi va i di mningelo wa sakudya, ni hafu ya mfarasa ya mtona.

Levhi 23:12

Ka ditshiku di nyanda yi no ndiwitelwa, mi fanete kumaha mningelo wo hiswa ka Mkoma, ngu txinvutana txa dilembe dimwedo, txo mbi na wulima.

Levhi 23:18

Mi na ningela kumweko ni mapawu, mtxhanu wa sinvutana ni simbidi, sa tanga ya dilembe dimwedo, so mbi na wulima, ni dirole dimwedo, ni tihamba timbidi, ti to sifuyo siya si txi va i di mningelo wa mhamba yo hiswa, kumweko ni mningelo wa mhamba ya sakudya ni so sela, asi kubhumula ka sona ku tsakisako Mkoma.

Mitengo 19:2

Asiya, nzileleto sa mlayo awu Mkoma a leletako tito: Gela vanana va ka Israyeli ve kutisela dirole da makati do bhilivila, da kwa mbi soleka, na di si nga ni txibawa, di nga mbi sanzekwa dikange.

Mitengo 28:11

Se makhatoni ka mtxima ni mtxima, mi na ningela ka Mkoma mphaxo wa kuhiswa, wa marole mambidi, ni hamba, kumweko ni mtxhanu wa sinvutana ni simbidi sa dilembe dimwedo, sa kwa mbi na sibawa.

Mitengo 28:19

Se mi na ningela mningelo wa kuhiswa, ka Mkoma, marole mambidi ni hamba, ni mtxhanu wa sinvutana sa dilembe dimwedo; sa kwa mbi na sibawa.

Mitengo 28:31

Hahanze ka mphaxo wa kuhiswa wa yotshe mbimo, ni mningelo wa kona wa sakudya, mi na si ningela ( si si nga ni sibawa), ni sa kusela sa kona.

Mitengo 29:2

Sekoko mi na ningela ka Mkoma mphaxo wa kuhiswa, wo bhumula, dirole, hamba, ni mtxhanu wa sinvutana ni simbidi, sa dilembe dimwedo, sa kwa mbi na sibawa.

2 Makronika 29:32

Se mtengo wa miningelo ya kuhiswa ayi msengeletano wu nga humesa ngu wuwa: Mtxhanu wa magumi ni mambidi a tihomu, ni 100 wa tihamba, ni 200 wa sivuntana; sotshe a siya mningelo wo hiswa awu u humiselwako Mkoma.

2 Makronika 35:12

Va to veka ngu didhawa mningelo wo hiswa kasi kuve ninga vanana va vathu madingano ni tinyumba ta vatate, kuva txi ningela ngu sona ka Mkoma madingano ni ti ti nga bhalwa amu ka dibhuku da Mosi; va to maha toneto ngu tihomu ni tona.