Joyeli 3:18 - Bhiblia Yo Sawuleka

¹⁸ Se ku na maheka taku ka ditshiku dile, mimango yi na vhelisa vhinya ya yiphya, simangwanani ku na khulunga masi, yotshe minambo ya ka Judha yi na va yi di tate ngu mati; se ku na huma txisima ngu Nyumbani ka Mkoma txi theletela mkovani ka Sitime.

Joyeli 3:18 Referans Kwoze

Zakariya 14:8

Ka ditshiku dile, ku na maheka kambe ti to me khiringela mati, ma txi huma ngu Jerusalema, hafu ya ona yi txi ya ka Linene la wutxani, se yimwani hafu yi txi ya ka Linene la mswa-ditambo, ngu mbimo ya malanga ni ya wuxika, eto ti na maheka.

Isaya 35:6

Sekoko silima si na ndaka-ndaka kufana ni timbavala, se tidimi ta siduma ti na embelela, nguko mati ma na pfukula txiwulani, ni sinambwana ligwangwani.

Isaya 30:25

Kambe ka yotshe mimango yo lapha, ni ka sotshe simangwana so guleka, sinambwana ni milonga ya mati, ka ditshiku da kudawa ka hombe, mbimo yile si nowa sitezi.

Mitengo 25:1

Se mbimo yile Israyeli a nga zumba Sitime, vathu va to khata kumaha wugango ni vanana vamahorana a Vamowabhi.

Masalmo 46:4

Mnambo wa tsakisa, ngu milonga ya wona, didhoropa da Txizimu, didhoropa do sawuleka ngutu da kuzumba Nyatxitimwi.

Jobe 29:6

ni txi ngadi ni kuwula mikondo yangu ngu mafura, na ku txi ngadi kututuma sinambwana sa mafura ngu marigwini;

Eksodha 3:8

Ngu mhaka yeto ni relete kasiku ni txi va thusa mu manzani ka Vaegipta, ni txi va humisa ka ditiko donedo, va txi ya ka ditiko da dinene, da hombe, ditiko di di khulungako masi ni wulombe, wukhalo wa Vakanana, wa Vaheti, wa Vaamori, wa Vaferezi, wa Vahevhi ni wa Vajebhuzi.

Mika 6:5

Anu vathu vangu, alakanyani makungo a Bhalake, mfumeli wa Mowabhi, ni ti a nga mxamula Bhalahamu, mwana Bheyori, kukhukhela Sitime kala Giligali; kasi ku mi ziva wululamo wa Mkoma.

Isaya 44:3

Nguko ni na tshakunuta mati txitimwi ka txihala, ni minambo txitimwi ka mafu a kuoma; ni na thela moya wangu txitimwi ka liveleko lako, ni makatekwa angu txitimwi ka vanana vako.

Isaya 45:8

Anu tizuma nisani mwando, ni marefu ma na nise kululama; ma na tuleke mafu, se kuhuma kuhanyisa, kululama ku na ninge mihando kumweko; ani Mkoma, ni si vangile.

Isaya 55:1

Anu motshenu mi ku ni ditora, ngonani matini, ni nanu mi singako ni male, ngonani mi ta xava, mi dya; Ina, ngonani mi ta xava, mi si nga ni male, mi si nga ni mtengo, vhinya ni masi.

Isaya 66:11

Kasi ku mi na mama mi khura, ngu masi a kuthavelela kwakwe; kasi ku mi busa mi tsaka, ngu kuphatima ka wudhundo wakwe.

Jeremiya 31:12

Vanata va txi embelela ngu litsako aniya mmangoni ka Siyoni, ve tutumela wunene wa Mkoma, amu ka fulaho, ni vhinya, ni mafura, amu ka tihambana ni marole, dihika dawe di na fana ni thembwe yi yi nga nakaniswa, kha va na mbiswa ve dhindirika.