Joyeli 2:22 - Bhiblia Yo Sawuleka

²² Mi nga thaveni anu sihari sa txitinga, nguko wudyiselo wa txiwulani wu na va mkungu, nguko mindonga yi na ninga mihando ya yona, vhinya ni mkuwu si na ninga mtamo wa sona.

Joyeli 2:22 Referans Kwoze

Zakariya 8:12

Nguko mbewu yi na humelela, se m'vhinya wu na veka mihando ya wona, mafu ma na ninga sasiphya, nzuma yi na nisa hunguva ya yona; se ni na maha taku miboti ya vathu vava, yi mana yotshe thomba yiya.

Masalmo 65:12

Lihawu la txiwulani la nakana se situnga si tala ngu tithomba.

Isaya 51:3

Nguko Mkoma a na thavelela Siyoni, kambe a na thavelela otshe makhalo ale i ku marumbi, se txiwula txa kona a na txi maha txi fanana ni thembwe ya Edheni, ni txiwunda txa kona txi na fana ni thembwe ya Mkoma; kuzumbiseka ni litsako si na maneka ka m'ti wuwa, ni mithumo ya kubonga, kumweko ni dipswi da m'zeno.

Masalmo 67:6

Sekoko mafu ma humisa mihando ya ona; kambe Txizimu, Txizimu txathu, txa hi katekisa!

1 Vakorinto 3:7

Ngu konaho, hambi wu a phayako, hambi wu a theletelako mati hi nga txilo. Txizimu ngu txona txi si kulisako.

Hagayi 2:16

Msana ka mbimo yileya, kutile m'thu e ta lava mmumbu wa magumi mambidi a mipimo ya fulaho, aniko ku ti kova ni digumi dwe; a txi ta dipipani ku ta reka mtxhanu wa magumi a mipimo ya vhinya, ku ti kova ni magumi mambidi dwe.

Jona 4:11

se ani na mbi va ni ku di pfela Didhoropa da Hombe da Ninivha, a di di ku ni kupinda 120.000 wa vathu, ava va si ziviko kuhambanisa diwoko dawe da txinene, ni diwoko dawe da txibhabha, ni sihari sasingi kani?

Ezekhiyele 36:35

Se va na kha vona: Mafu awa a txisapa ma nonile nga thembwe ya Edheni; kambe ni na tsanisa madhoropa a txiwunda, a sisapa, o khundumuselwa, ma txi va ni vathu.

Ezekhiyele 36:30

Ni na andisa mihando ya mindongani, ni siyalo sasiphya sa thembweni, kasi ku mi si swi kambe mi mana txiruko txa nzala hagari ka matiko.

Ezekhiyele 36:8

Aniko anu mimango ya ka Israyeli, mi na humisa madhavi, mi txi ninga mihando ka vathu vangu va ka Israyeli; nguko va hafuhi ni kuwuya.

Masalmo 36:6

Kululama kwako nga hombe kufana ni mimango; mithetho yako yi etile kufana ni linene. Awe, Mkoma, wa xayisa vathu ni sihari.

Genesisi 4:12

Hambi u txi dima mafu, kha ma na mbi kuninga txilo txa mihando ya ona. U na pepeseka u tutuma-tutuma ha mafuni.”

Masalmo 65:13

Tibala ti tate ngu mitxhambi ya sifuyo; mikova yi tate ngu fulaho; ngu mhaka yeto, va tsaka ngutu ve kulungela!