Joyeli 2:17 - Bhiblia Yo Sawuleka

¹⁷ Va na dile vaphaxeli, va thumelako Mkoma, hagari ka m'hubhe ni txiluvelo, va ne kha vona: Tsetsa vathu vako, awe Mkoma, kambe u nga ningele thomba yako tinganani, kasi ku matiko ma txi yi xakela: Nguko kutxani va no kha vona ka vathu: Txi hayi Txizimu txawe, kani?

Joyeli 2:17 Referans Kwoze

Ezekhiyele 8:16

Se a to ni yisa ka mthanda wa mndani ka Nyumba ya Mkoma, wona taku ha txikeni ka Dithepele da Mkoma, hagari ka m'hubhe ni txiluvelo, ku ti ti ni mtengo wo dingana magumi mambidi a vavamna ni mtxhanu, va nga ti ti tshuralete Dithepele da Mkoma, tikhohe tawe ti txi rendekela wutxani; kambe va ti ti khozela ditambo va di rendekete wutxani.

Masalmo 115:2

Nguko, vamatiko va nga simama ve wotisa, va txi kha vona: “Txi hani Txizimu txanu kani?”

Masalmo 79:10

Nguko vamatiko va na wotisa va txi kha vona: “Txizimu txako txi hani kani?” Va kombe vathuvo, masoni kwathu, kuphotela ka mnoha wa vathu vako, awu wu nga theketwa!

Matewu 23:35

Kasiku wu txi thekelela txitimwi kwanu wotshe mnoha wo lulama wu nga theketwa ha mafuni, kukhukhela ka mnoha wa m'lulami Abhele kala kuhoka ka mnoha wa Zakariya, mwanana wa Bharakiya, awu mi nga m'daya hagari ka wukhalo wo sawuleka ni txiluvelo.

Amosi 7:2

Se ku to maheka taku: Ngako va nga ti dyite mwasi wotshe wa ditiko, ani ni ti khani: Mkoma Txizimu, divalela! A na guletiswa kutxani Jakobe kani? Nguko ene m'dotho.

Joyeli 1:9

Ku wilisilwe mningelo wa sakudya, ni sa kusela Nyumbani ka Mkoma; vaphaxeli, i ku sithumi sa Mkoma, va pandisekile.

Hoseya 14:2

Wombani mapswi anu, se mi hundulukela ka Mkoma, mi txi khanu: Thavisa wotshe wubihi, u amukela wunene; se hi na kuninga mphaxo wa sisofu sathu ku nga marole.

1 Vafumeli 6:3

M'hubhe wo khata masoni ka Dithepele, i ti wa magumi mambidi a mikono kulapha, madingano ni kuanama ka nyumba, ni digumi da mikono kuanama, masoni ka nyumba.

Eksodha 34:9

a txi khene: “Mkoma, ngako ani ni di mani kukateka masoni kwako, tsimbila kumweko ni nathu, hambiko vathu vava i ku va misungo yo banga, divalela wubihi wathu ni sionho sathu, u txi hi fuya, hi va thomba yako.”

Mika 7:10

Se mlala wangu wa txisikati a na ti wona eto, se a na fenengetwa ngu pfilu-pfilu, awu a ku khene: Ahayi Mkoma, Txizimu txako kani? Maso angu ma na mu wona a txi kadetelwa, kufana ni madhaka a tiruwani.

Amosi 7:5

Sekoko ni to khani: Mkoma Txizimu, ema konkuwa: Ana gulekisa kutxani Jakobe kani? Nguko ene m'dotho.

Ezekhiyele 20:9

Ati ni nga maha koko, i mhaka ya kuranda ditina dangu, kasi di si ruketelwi masoni ka vamatiko, vale va ku hagari ka vona, avo ni nga ti wonekisa ka vona, kasi ku va humisa Egipta.

Isaya 37:20

Konkuwa koko awe Mkoma, Txizimu txathu, hi txhatxhise manzani kwawe, kasi ku yotshe mifumo ya ha mafuni, yi tiziva tito, ngawe dwe u ku Mkoma.

Masalmo 89:51

asi valala vako va hi onhelako ngu sona, Mkoma! Hani ni hani a yako kona msawulwa wako, va mruka!

Masalmo 89:41

Votshe vapindi va nzila va wulela ve handa; vaakelani vakwe va mxowokisela.

Masalmo 79:4

Se hi maneka hi di sekisa hagari ka vaakelani vathu; avale va nga hi randela va hiseka ni ku hi tseketsela.

Masalmo 74:10

Awe Txizimu, mlala a na simama e hi ruketela kala mbimo muni kani? A na poyilela ditina dako kala ditshiku muni kani?

Masalmo 42:10

I mhaka muni ni txi xanisekisa tiya kani? Valala vangu va ni ruketela ditshiku ni ditshiku va ni wotisa va txi kha vona: “Txi hani Txizimu txako kani?”

2 Makronika 8:12

Se Solomoni a to ninga mphaxo wa kuhiswa ka Mkoma, txitimwi ka txiluvelo txi va nga akela Mkoma, masoni ka m'hubhe wa dithepele;

Dhewuteronome 32:27

Aniko ni thavile kurukwa ngu valala vawe, nguko va na ti kulisa, va txi kha vona: “Manza athu ngu ona ma nga humelela, hi nga Mkoma a nga maha toshe tiya!”

Matewu 27:43

A thembile Txizimu, inna ko, txi na mu hulukise konakuwa, ngako txi txi m'dhunda, nguko a ti khene: “Ani ni Mwanana wa Txizimu!”

Malakiya 1:9

Konkuwa koko, kombelani ka Txizimu, se txona txi na hi pfela wusiwana; atiya ti tile ngu manzani kwanu, ene a na mi tumela kani? Kuwomba Mkoma wa Mabutho a Tiyimbi.

Nehemiya 9:36

Wona taku nyamsi hi tikhumbi; hambi ka ditiko dile u nga ninga vatate vathu kuve dya mihando ya dona ni kuzumbiseka, wona taku hi tikhumbi ka dona.

Joyeli 1:13

Ti khutareleni mi ti dilela anu vaphaxeli; kumani anu vathumeli va txiluvelo; wulelani mi pinda mi di ambate masaka, ni wusiku anu, vathumeli va Txizimu txangu; nguko miningelo ya sakudya ni sa kusela si nga wilwa, nza nyumbani ka Txizimu txanu.

Masalmo 42:3

Kudila mirongo, ngumba sakudya si ni dyako wusiku ni mitshikari, nguko ditshiku ni ditshiku va ni wotisa va txi kha vona: “Txi hani Txizimu txako kani?”

2 Makronika 7:20

sekoko ni na mi thavisa ka ditiko diya ni nga mininga, se ka yiya nyumba ni nga yi sawulekisela ditina dangu, ni na yi tshotsha kule ni nani, ni mi maha txisekiso hagari ka votshe vathu.

1 Vafumeli 9:7

sekoko ni na khundumusa Israyeli ka ditiko di ni nga mninga; se ka yiya nyumba ni nga yi sawulekisela ditina dangu, ni na yi tshotsha kule ni nani, se Israyeli a na maha wa kuwombwa ni kumimelelwa, hagari ka votshe vathu.

Dhewuteronome 28:37

U na va u di txidiwukiso, ni txisekiso, ni txiruko, hagari ka vathu votshe vava, Mkoma a no va a di ku yisile kwawe.

Mitengo 25:6

Wona taku kutota wamwamna wokari ngu ka vanana va ka Israyeli, a txi neha wamsikati wa Mumedhiyani ka vanawe, hafuhi ka Mosi ni msengeletano wotshe wa va ka Israyeli, konaho msengeletano wu nga ti dila, ha txikeni ka Ditenda da Msengeletano.

Isaya 22:12

Se Mkoma, Mkoma wa Mabutho a Tiyimbi, a na mi dhana ka ditshiku dile, kuya dila, ni kuya peka huwa, ni ku kuyula misungo, ni ka muambalisi wa masaka.

Joxuwa 7:9

Va txo tiengisa eto Vakanana, ni votshe vaaki va ditiko, va na hi ranganyeta, va txi fuvisa ditina dathu ha mafuni; sekoko u na maha txani ngu ditina dako da hombe kani?”

Masalmo 42:4

Moya wangu wa dhudhumela, ngako ni txi alakanya, mbimo yi ni nga ti longoloka ni vale va nga ti ya Nyumbani ka Mkoma va txi peka mikulungwani ya kutsaka ni kubonga, ni kugiringa ka vathu va kutsaka.

Masalmo 42:11

Moya wangu, u thelwa dikhodho ngu txani, kambe u xanisekela txani mndani kwangu kani? Themba Txizimu, ani ni ngadi ni txi na txi dhumisa. Txona i ku Txizimu txangu ni Muhanyisi wangu!