Joxuwa 8:14 - Bhiblia Yo Sawuleka

¹⁴ Se ku to maheka taku, mbimo yile a nga va wona mfumeli wa Ayi, va to kuluveta kuwuka ni mabimbi-kutxa, aniko vathu va didhoropa, va to hingeta va ka Israyeli, ku yalwa navo, ene ni votshe vathu vakwe, ka mbimo yi yi nga ti emisilwe, mikovani, nguko ene asi ti zivi ti to ku ni txibaramela msana ka didhoropa.

Joxuwa 8:14 Referans Kwoze

Matewu 24:39

kha va pimisa txilo, kala ku txi hoka ndambi, yi nga khukhula votshe. Ina, ti na mahisa toneto ngu kuwuya ka Mwanana wa M'thu.”

2 Pedro 2:3

Se ngu mhaka ya timbiti tawe, va na lava mabhindu ngu nganu, ngu kuthumisa mawombawombelo a kukanganyisa. Aniko, kulamulwa kwawe i kale ku di lulamisilwe, ni kulova kwawe kha ku na mbi swela.

Matewu 24:50

Se nyamne wa txithumi-txo a na wuya ngu ditshiku diya txona txi no va txi si di rinzeli, ni ka txikhati txo mbi ziwa.

Dhaniyeli 4:31

Mbimo yile mfumeli a nga ti womba-womba, ku to pfala dipswi ngu nzumani, di txi kha dona: “Awe mfumeli Nebhukodhonosori, wa ziviswa ti taku mfumo wu thavisilwe kwako.”

Isaya 19:13

Vathangeli va Zowani va maha siphukuphuku, vathangeli va Nofe va kanganyisilwe; vona va na maha ti to Egipta e rerela, vona va i ku dirigwi da dikhona da tihunzu tawe.

Isaya 19:11

Ngu ditshuri, vathangeli va Zowani nziphukuphuku; txikungo txa titxhari ti i ku madhota a Faro, ti mahile timbongola, mi m'gelisa kutxani koko Faro: “Ina ni mwanana va titxhari, mwanana va vafumeli va kale kani?”

Ekleziyaste 9:12

Ni ti to m'thu kha yi zivi mbimo yakwe; kufana ni sihaka si dawako ngu likoka, ni kufana ni sinyana si bzwetwako ngu mlawu, ngu toneto va bzwetiswako tona vanana va vathu, ka mbimo yo biha, va txi welwa ngu dikhombo ngu txidhukisa.

Joxuwa 8:16

Ngu kumaha keto, votshe vathu vale va nga ti ti didhoropani, va to dhanwa kasi kulondeta va ka Israyeli; se va to londeta Joxuwa, va txi ya maneka kule ni didhoropa.

Joxuwa 8:5

Aniko ani ni vathu votshe vava ni ku navo, hi na tshuketela didhoropani; se ku na maheka taku, ngako va txi huma ku ta hi lwisa, nga kukhatani, hi na tutuma hi txi thava masoni kwawe.

Dhewuteronome 1:1

Aawa, mapswi ale Mosi a nga xawutela ka votshe va ka Israyeli, mtxhatuko ka Jordhani, txiwulani, ka libala li ku masoni ka Sufe, ngu hagari ka Parani, ni Tofela, ni Labhani, ni Hazerote, ni Dhizahabhi.

Joxuwa 8:13

Se va to veketela vathu ka wotshe wugovelo wu wu nga ti ti wuphemba ka didhoropa, va txi baramela ngu mswa-ditambo ka didhoropa; se Joxuwa a to tsula wusikuni mule, kala hagari ka mkova.

Joxuwa 8:15

Se Joxuwa koko ni votshe va ka Israyeli, va to mahisa ku nga va to xulwa masoni ka valala, va txi thava ngu nzila ya txiwulani.

Valamuli 20:37

Se vabarameli va to kuluveta ve randela Gibheya; va txi va dayela ngu matxhari ka dotshe didhoropa.