Joxuwa 6:4 - Bhiblia Yo Sawuleka

⁴ Se mtxhanu wa vaphaxeli ni vambidi va na teka mtxhanu wa titshodi ni timbidi, ta titxheho ta tihamba, va txi thangela masoni ka dibhokiso, se ka ditshiku da wutxhanu ni mambidi, mi na tenderuka didhoropa mtxhanu wa sikhati ni simbidi; se vaphaxeli va na veta titshodi.

Joxuwa 6:4 Referans Kwoze

Mtuletelo 16:1

Se ni to engisa dipswi da hombe di txi ta ngu Dithepeleni, di txi gela tingelozi ta mtxhanu ni timbidi, di txi kha dona: “Tsulani, mi txi ya theketa txitimwi ka mafu, magombe a mtxhanu ni mambidi a kuhenya ka Txizimu.”

2 Makronika 20:17

Ka yimbi yiya anu kha mi na mbilwa, tsulani mi txi ya ema mi wonetela a ti Mkoma a no maha, kasi ku mi hulukisa, anu va ka Judha, ni va Jerusalema; mi nga thaveni, kambe mi nga dhukisweni; mangwana va hingeteni, nguko Mkoma a na va ni nanu.

Mtuletelo 8:2

Konako ni to wona tingelozi ta mtxhanu ni timbidi ti nga ema masoni ka Txizimu, ti txi ningwa mtxhanu wa mipundu ni yimbidi.

2 Makronika 20:21

Josafati a to pfana ni vathu vakwe, e veka mtxawa wa vaembeleli masoni ka dibutho dakwe da yimbi, ava va nga ti ti embelela ni kudhumisa Mkoma va txi kha vona: Dhumisani Mkoma nguko lirando lakwe li zumba ngu ha ku si gwitiko.

1 Vafumeli 18:43

Se a to khene ka mfana wakwe: Kwela konkuwa u wonetela likasani ka linene. Se a to kwelela e wonisisa, a nje khene: Kha ku nga ni txilo. Se ene a to khene: Engeta kambe mtxhanu ni kumbidi.

Levhi 14:16

se e beta litiho lakwe la dianza da txinene, amu ka mtona wu wu ku ka dianza da txibhabha, a txi xwayela ngu lona litiho liya li ku ni mtona, amu ka mtxhanu wa sikhati ni simbidi, masoni ka Mkoma.

Mtuletelo 15:7

Tximwetxo ka sivangwa sa mune si hanyako txi to ningela ka tingelozi ta mtxhanu ni timbidi, mtxhanu wa magombe ni mambidi a nzalama, ma di tate ngu kuhenya ka Txizimu, txi txi hanyako ngu hawa ku si gumiko.

Mtuletelo 15:1

Ni to wona kambe nzumani tximwani txikombiso txa hombe txa kuxamalisa: Mtxhanu wa tingelozi ni timbidi kumweko ni mtxhanu wa mitungu ni yimbidi, yo gwitisa, nguko ngu yona ku na hetiseka kuhenya ka Txizimu.

Mtuletelo 10:3

Se yi kwangula ngu dipswi da hombe, nga kubhonga ka ngonyamo. Mbimo yi yi nga bhonga, ku to pfala kudhinda ka singwalangwanda sa mtxhanu ni simbidi.

Mtuletelo 8:6

Konako tingelozi ta mtxhanu ni timbidi, ti di ñote mipundu ya mtxhanu ni yimbidi ti to ti lulamisela kasiku ti yi veta.

Mtuletelo 5:6

Ngu toneto, hagari ka txikhalo txa wukoma kumweko ni mune wa sivangwa so hanya, ni madhota, ni woni Txinvutana txi di emile, nga txi to bhaywa. Txi ti ni mtxhanu wa titxheho ni timbidi, ni mtxhanu wa maso ni mambidi, i ku mtxhanu wa Mimoya ni yimbidi ya Txizimu, yi nga rumwa ka dotshe ditiko.

Mtuletelo 5:1

Msana keto, ni to wona awule a nga ti khalahatshile ha txikhaloni ka wukoma, a di ñote, ngu dianza da txinene, dibhuku do bhalwa mndani ni hahanze di di lemilwe ngu sixambanyo sa mtxhanu ni simbidi.

Mtuletelo 1:20

Ngu mhaka ya msisalo wa mtxhanu wa tinyeleti ni timbidi, u nga ti wona ka dianza dangu da txinene ni mtxhanu wa sipande ni simbidi, sa nzalama, eto ti womba tiya: Tinyeleti ta mtxhanu ni timbidi, ndingelozi ta mabanza a mtxhanu ni mambidi, ani mtxhanu wa sipande ni simbidi i mabanza a mtxhanu ni mambidi.

Mtuletelo 1:4

Ani Johani ni bhalela mabanza a mtxhanu ni mambidi ma ku Asiya: Kwanu na mi navelela makatekwa ni kudikha, si txi huma ngu ka wule a kuho, awule a nga ti ho, awule a tako, si txi huma ngu ka mtxhanu wa mimoya ni yimbidi yi ku masoni ka txikhalo txakwe txa wukoma,

2 Vafumeli 5:10

Sekoko Elixa a to rumisa mtumi kuya gela Nahanani to khene: Tsula Jordhani u ya samba mtxhanu wa sikhati ni simbidi, se nyama yako yi na thunga, u na kalamuka.

Mitengo 23:1

Sekoko Bhalahamu a to womba ka Bhalake, a txi khene: “Ni akele kona hawa mtxhanu wa siluvelo ni simbidi, u ni nehela mtxhanu wa marole ni mambidi, ni mtxhanu wa tihamba ni timbidi.”

Zakariya 4:6

Se a to xamula a txi khene kwangu: Adiya dipswi da Mkoma ka Zorobhabheli, do khene: Hi nga ngu mtamo, hambi ngu yimbi, aniko ngu moya wangu, kuwomba Mkoma wa Mabutho a Tiyimbi.

Zakariya 4:2

Yi txi ni gela ku kha yona: U wona txani kani? Se ani ni ti khani: Ni txi wona, no wona txipande txo mahwa ngu nzalama dwe, txitimwi ka txona ku di ni txiya txo thela kona mtona, ni mtxhanu wa malambu ni mambidi, se dilambu dimwedo ni dimwedo di ti ti ni mtxhanu wa mipofu ni yimbidi.

Isaya 27:13

Se ku na maheka ka ditshiku dile, taku ku na vetwa mpundu wa hombe, se vale va nga ti mwalate ditikoni ka Asiriya, ni vale va nga tsuliswa ditikoni ka Egipta, va na tshumela ve wuya, ve ta khozela Mkoma, mmangoni ko sawuleka, kona Jerusalema.

Jobe 42:8

Tekani koko mtxhanu wa marole ni mambidi, ni tihamba, mi tsula ka txithumi txangu Jobe, mi txi ya ningela mphaxo wo hiswa mipune, se txithumi txangu Jobe a na mi kombelela; nguko kutilava ni nga mtumelela, kasi ku ani ni si mi tshumeteli ngu wubihi wanu; nguko anu kha ma womba ditshuri ngu ngani, kufana ni txithumi txangu Jobe.

2 Makronika 20:19

Sekoko Valevhi va vanana va ka Kohate ni vanana va Vakorayi va to guleta mapswi kasi kudhumisa Mkoma Txizimu txa Israyeli.

2 Makronika 13:12

Wonani Txizimu txi ni nathu masoni kwathu, vaphaxeli va txona va veta mipundu kasi ku mi hangalasa; vanana va ka Israyeli mi nga lweni ni Mkoma Txizimu txa va tate vanu, nguko kha mi na mbi mu xula.

Levhi 4:6

se mphaxeli a na beta litiho mu ka mnoha, e xwayela ngu wona mtxhanu wa sikhati ni simbidi, masoni ka Mkoma, masoni ka m'jiyo wa wukhalo sawuleka.

Genesisi 2:3

Se Txizimu txi katekisile ditshiku da wutxhanu ni mambidi, txi txi di sawulekisa, nguko ka dona, Txizimu txi humute ka yotshe mithumo yi txi nga yi vanga, ni ku yi maha.

Joxuwa 6:3

Anu koko, motshenu vavamna va yimbi, mi na tenderukela didhoropa, mi txi randela didhoropa kumweko ngu ditshiku; mi na maha eto mndani ka mtxhanu wa masiku ni dimwedo.

Joxuwa 6:5

Se ku na maheka taku, ku txi vetwa ngu kulaphisa tshodi ya litxheho la hamba, na mi txi pfa diguwa da tshodi, votshe vathu va na kwangula ngutu; diguma da didhoropa di na wa hahatshi, se vathu va na wulela ka dona, mmwani ni mmwani ngu kona hale a nga rendekela kona.”

Joxuwa 6:13

Se vaphaxeli vale va mtxhanu ni vambidi, va nga ti tekile mtxhanu wa titshodi ni timbidi ta titxheho ta tihamba, masoni ka dibhokiso da Mkoma, va txi tsimbila na va txi veta titshodi; se avale va nga ti xomile, va ti thangete masoni kwawe, se avale va nga txi londeta va txi tsimbila ngu msana ka dibhokiso da Mkoma; vaphaxeli va txi tsimbila na va txi veta titshodi.

2 Vafumeli 5:14

Sekoko a to relela eya bhumwala kona Jordhani mtxhanu wa sikhati ni simbidi, madingano ni kuwomba ka m'thu wa Txizimu; se nyama yakwe yi to thunga, yi txi nga nyama ya mfana, se a to kalamuka.