Joxuwa 3:1 - Bhiblia Yo Sawuleka

¹ Joxuwa koko, a to khukha ngu Sitime ni mabimbi-kutxa, e tsula kala Jordhani, ene ni votshe vanana va ka Israyeli, aha va nga ya humula kona, va si se kutxhatuka.

Joxuwa 3:1 Referans Kwoze

Joxuwa 2:1

Se Joxuwa, mwana Nune, a to ruma vavamna vambidi ngu Sitime, kuya xola ngu txihunja, a txi khene: “Tsulani, mi txi ya xola ditiko da Jeriko.” Va to tsula koko, va txi ya wulela nyumbani ka digelegele dokari, di nga ti dhanwa ku i Rahabhi, va ti ya otela koneyo.

Marku 1:35

Ni mixo, ku di ngadi phum, a to huma nyumbani eya ka wukhalo wa ekhalela, a txi ya khongela kona.

Mika 6:5

Anu vathu vangu, alakanyani makungo a Bhalake, mfumeli wa Mowabhi, ni ti a nga mxamula Bhalahamu, mwana Bheyori, kukhukhela Sitime kala Giligali; kasi ku mi ziva wululamo wa Mkoma.

Jeremiya 26:5

kuva mi txi na engisa timhaka ta sithumi sangu i ku vaprofeti, ava ni nga va rumela kwanu, i di ngadi mixo, aniko anu kha ma engisa;

Jeremiya 25:3

Kukhukhela ka dilembe da digumi ni mararu da kufuma ka Josiya, mwana Amoni, mfumeli wa ka Judha, kala ka diya ditshiku, mndani ka magumi mambidi a malembe ni mararu, Mkoma a ti womba-womba ni nani, ni di txhumayete kwanu i di ngadi mixo, aniko anu kha ma engisa.

Jeremiya 7:13

Kona kuwa koko, mi di mahile totshe tiya, kuwomba Mkoma, ni wombile kwanu i di ngadi mixo, ni mi gela, aniko kha ma engisa; ni to mi dhana, kambe kha ma xamula.

Masalmo 119:60

Ni kuluvetile, kha na swela kuvekisa sirumo sako.

Mitengo 25:1

Se mbimo yile Israyeli a nga zumba Sitime, vathu va to khata kumaha wugango ni vanana vamahorana a Vamowabhi.

Genesisi 22:3

Sekoko Abrahamu a to wuka ni mabimbi-kutxa, e longela mbongola yakwe, e teka sithumi simbidi kumweko ni mwanana wakwe Isaake, a txi funya ni tikhuni ta kuya hisa ngu tona mhamba; a to tsula ka wukhalo wu Txizimu txi nga mkomba wona.

Genesisi 21:14

Sekoko Abrahamu a to wuka ni mixo, e teka sakudya ni txibhembe txa mati e rweka Hagari, se a to m'belekisa mwanana, ngu msana a to mu humisa. Hagari a to huma e pepeseka mu txiwulani ka Bherisebha.

Joxuwa 6:12

Msana keto, Joxuwa a to wuka ni mabimbi-kutxa, se vaphaxeli va to rwala dibhokiso da Mkona.

Joxuwa 6:15

Se ku to maheka taku, ka ditshiku da wutxhanu ni mambidi, ve phindula ngu kugwimba ka wuronga, se ngu kufana ni toneto, va to tenderuka didhoropa mtxhanu wa sikhati ni simbidi; ka dona ditshiku edo dwe, va to tenderuka didhoropa mtxhanu wa sikhati ni simbidi.

Joxuwa 7:16

Sekoko Joxuwa a to wuka ni mabimbi-kutxa, e tshuketisa hafuhi va ka Israyeli, madingano ni tihunzu tawe; se ku to sawulwa lihunzu la ka Judha.

Joxuwa 8:10

Se Joxuwa a to wuka ni mabimbi-kutxa, a txi bala vathu; ene ni madhota a ka Israyeli va to thangeka masoni ka vathu, va txi yalwa ni Ayi.

Valamuli 20:19

Va to khukha koko vanana va ka Israyeli ni mixo, va txi ya gova ve wukela Gibheya.

1 Samuwele 17:20

Sekoko Dhavhidha a to wuka ni mixo ngutu, e siya tinvuta takwe ni mwoleleli wokari, se e teka mrwalo wakwe e tsula, madingano ni ti Jese a nga mu leletisa tona; se a to hoka ka wukhalo wa sikotxikani, mbimo yile dibutho da yimbi di nga ti ti longisela kuya kulwani, na di txi embelela tindando ta yimbi.