Joxuwa 21:44 - Bhiblia Yo Sawuleka

⁴⁴ Mkoma a va ningile kuhumula ka otshe madhawa, madingano ni ti a nga xambanya tona ka vatate vawe; kha ka maneka ni wammweyo wa valala vawe, a nga tsana a txi ema masoni kwawe. Mkoma a to ningela votshe valala manzani kwawe.

Joxuwa 21:44 Referans Kwoze

Joxuwa 11:23

Ngu kumaha keto, Joxuwa a to teka dotshe ditiko diya, nga tona ti Mkoma a nga ti wombile ka Mosi; se Joxuwa a to di ningela di txi maha thomba ya vanana va ka Israyeli, madingano ni kuabanelana kwawe, ngu tihunzu tawe; se ditiko di to humula yimbi.

Vahebheru 4:9

Hambi keto, kuhumula ku ngadi ho ku, ku nga siyelwa vathu va Txizimu.

Eksodha 23:31

Ni na komba muhingano wako, kukhukhela ka Linene lo Bhilivila kala ka Linene la Vafilista, ni kukhukhela txiwulani kala mnamboni. Ni na ningela manzani kwako vaaki va ditiko donedo, ati to u na va tutumisa hafuhi kwako.

Joxuwa 22:9

Vanana va ka Rubheni ni vanana va ka Gadhi va to tsula kumweko ni hafu ya lihunzu la ka Manasi, va txi siya vanana va ka Israyeli kona Silo, ditikoni ka Kanana, va txi ya ditikoni ka Gileyadhi, adile i kuthomba yawe, va nga ningwa madingano ni txileleto txi a nga txi maha ngu Mosi.

Joxuwa 22:4

Se konkuwa Mkoma, Txizimu txanu, a ningile kuhumula ka vananu, akule a nga kuthembisa kwawe. Ngu toneto, tshumelelani matendani kwanu, ka ditiko da thomba yanu adi Mosi, txithumi txa Mkoma, a nga mi ninga, akheya mtxhatuko ka Jordhani.

Joxuwa 1:15

kala kuza Mkoma a txi ninga kuhumula ka vananu, kufana ni nanu, se ni vona va na mane ditiko di Mkoma, Txizimu txanu, a va ningako; sekoko mi na tshumelela ka ditiko di di mi lumbako, a nga mi ninga Mosi, txithumi txa Mkoma, akheno mtxhatuko ka Jordhani, ngu didhawa da wutxani.

Joxuwa 1:13

Alakanyani dipswi di a nga mi leleta Mosi, txithumi txa Mkoma, a txi khene: “Mkoma, Txizimu txanu, wa mi ninga kuhumula, kambe wa mi ninga ditiko diya.”

Eksodha 33:14

Mkoma a wombile a txi khene: “Ani ngu wutumbu wangu ni na kupangalata ni na kuhumuta.”

Dhewuteronome 21:10

“Mbimo yile u no huma u txi ya yimbini kasi ku yalwa ni valala vako, ni kuva Mkoma, Txizimu txako, a txi va ningela manzani kwako, na u di va ñote nga tikhumbi,

Joxuwa 23:1

Ngako ku di pindile mbimo yo lapha, msana ka kuva Mkoma a di humutile Israyeli kulwa ni votshe valala vakwe va nga ti hafuhi nayo, na se Joxuwa a di kumbile ngutu,

Isaya 63:14

Kufana ni txihari txi txi relelako mikovani, Moya wa Mkoma wu va ningile kuhumula; ngu toneto u tsimbitisile vathu vako, kasi ku ti mahela ditina do dhundeka.

Dhewuteronome 2:36

Kukhukhela Aroweri, ku ku mabambe ka mlonga wa Arnoni, ni didhoropa di di ku hagari ka mkova kala Gileyadhi, kuwalo didhoropa di athu hi nga mbi wulela ka dona; Mkoma, Txizimu txathu, a hi ningile otshe madhoropa masoni kwathu.

Joxuwa 1:5

Ni wammweyo kha na mbi tsana masoni kwako, otshe masiku a kuhanya kwako; kufana ni kule ni nga va ni Mosi, ngu toneto, ni na va ni nawe; kha ni na mbi kuleka, hambi ku kusiya.

Joxuwa 2:24

Se va to kha vona ka Joxuwa: “Kha ditshuri Mkoma a ningete dotshe ditiko diya manzani kwathu, nguko hambi votshe vaaki va kona va gumile mtamo masoni kwathu.”

Joxuwa 11:8

Se Mkoma a to va ningela manzani ka va ka Israyeli; vona va to va khozisa, va txi va tutumisa, kala ka Didhoropa da Hombe da Sidhoni, ni Mezerefoti-Mayimi, ni mkovani ka Misipa, ngu didhawa da wutxani. Va to va dayetela, va si siyi ni wammweyo.

Joxuwa 11:12

Se Joxuwa a to teka otshe madhoropa a vafumelivo, a txi daya votshe vafumeli va kona ngu ditxhari, e va lovisa, nga ti Mosi txithumi txa Mkoma, a nga ti leletete tona.

2 Makronika 13:16

Se vanana va ka Israyeli va to thava masoni ka va ka Judha, Txizimu txi va ningela manzani ka va ka Judha.