Joxuwa 2:1 - Bhiblia Yo Sawuleka

¹ Se Joxuwa, mwana Nune, a to ruma vavamna vambidi ngu Sitime, kuya xola ngu txihunja, a txi khene: “Tsulani, mi txi ya xola ditiko da Jeriko.” Va to tsula koko, va txi ya wulela nyumbani ka digelegele dokari, di nga ti dhanwa ku i Rahabhi, va ti ya otela koneyo.

Joxuwa 2:1 Referans Kwoze

Vahebheru 11:31

Ngu likholo, Rahabhi wa digelegele, kha dawa kumweko ni vakanganyisi, nguko a amukete sinyengwani ngu kuthutha.

Jakobe 2:25

Kufana ni toneto, nene Rahabhi, wa digelegele, ina kha mahwa mlulami ngu mithumo mbimo yi a nga amukela mitumi a txi yi tshumeta ngu yimwani nzila, kani?

Matewu 1:5

Salmoni ni Rahabhi, va to veleka Bhowazi, Bhowazi ni Rute va to veleka Obhedhi, Obhedhi a to veleka Jese.

Mitengo 25:1

Se mbimo yile Israyeli a nga zumba Sitime, vathu va to khata kumaha wugango ni vanana vamahorana a Vamowabhi.

Vaefesu 5:5

Zivani ti to awalo m'thu wu a no mana thomba ya mfumo wa Kristu ni wa Txizimu, ngako i di m'gelezi mwendo wu a mahako mithumo ya nzambwa, mwendo mnaveli wa tithomba, awu i ku mkhozeli wa sa walo.

Matewu 10:16

“Wonani, ni mi ruma nga tinvuta hagari ka maxolwa; ngu toneto, txharihani nga minyoka, mi txi va vo mbi na wukhuxu kufana ni situvane.

Joxuwa 3:1

Joxuwa koko, a to khukha ngu Sitime ni mabimbi-kutxa, e tsula kala Jordhani, ene ni votshe vanana va ka Israyeli, aha va nga ya humula kona, va si se kutxhatuka.

Mitengo 13:2

“Ruma vathu va txi ya xola ditiko da Kanana, adi ni ngadi ningela ka vanana va ka Israyeli. Mi na sawula m'thu mmweyo, mmweyo, ka nyumba yimwani ni yimwani, ka vatate vanu, mi ruma dwe awu i ku wa hombe wa kona.”

Valamuli 18:17

Sekoko na va di kwelete vavamna vale va mtxhanu, avale va nga ti tsute kuya xola ditiko, va to wulela nyumbani, veya teka txithombe txo vatwa, ni efodhe, ni titerafime, ni txithombe txo wumbwa, na mphaxeli a di emile ha txidingeni, kumweko ni 600 wa vavamna vale va nga ti xomile matxhari.

Valamuli 18:2

Se vanana va ka Dhani, va to rumela ngu ka lihunzu lawe, mtxhanu wa vavamna va tindena, va mihinganoni kwawe, va kuta ngu Zora ni Exitawoli, kasi kuya xola ni kuya ziva ditiko; se va to va gela ku kha vona: “Tsulani mi ya zivisisa ditiko.” Va to tsula mmangoni ka Efrayime, kala m'tini ka Mika, eho va nga ya otela kona.

Joxuwa 5:10

Mbimo yile koko vanana va ka Israyeli va nga ti govile Giligali, va to maha txialakanyiso txa Pasika, ka ditshiku da digumi ni mune ka mtxima, ni minova, tibalani ka Jeriko.

Mitengo 33:49

Se va to zumba hafuhi ni Jordhani, kukhukhela Bheti-Jesimote, kala Abhele-Sitime, mikovani ka Vamowabhi.

Joxuwa 21:31

Helikate ni wudyiselo wa kona, ni Rohobhi ni wudyiselo wa kona: Mune wa madhoropa.

Valamuli 18:14

Sekoko vavamna vale va mtxhanu va nga ya xola ditiko da Layisi, va to xamula ka vanawe va txi kha vona: “Ina ma tiziva taku, tinyumba mule ku ni efodhe yimweyo, ni titerafime, ni txithombe tximwetxo txo vatwa, ni tximwani txo wumbwa kani? Wonani koko konkuwa, ati mi no ti maha.”

Joxuwa 1:18

Ni wihi m'thu wu a no kaneta sileleto sako, asi engisi mapswi ako ka totshe ti u no mruma, a na dawa; aniko tsana dwe, uva ni mtamo.

Joxuwa 2:2

Sekoko ku to rumelwa dipswi ka mfumeli wa Jeriko, daku kha vona: “Wona taku wusiku wuwa, ahawa ku bwakile vavamna vokari va ka Israyeli, ku ta xola ditiko.”

Mika 6:5

Anu vathu vangu, alakanyani makungo a Bhalake, mfumeli wa Mowabhi, ni ti a nga mxamula Bhalahamu, mwana Bheyori, kukhukhela Sitime kala Giligali; kasi ku mi ziva wululamo wa Mkoma.

Genesisi 42:9

Sekoko Josefa a to alakanya miloro yi a nga lora ngu didhawa dawe, se e va gela ku khene: “Anu mi sinyengwani! Mi tela ku ta xola mi wona wufenze wa ditiko.”

Genesisi 42:16

Rumani mmweyo wanu eya wuyisa mnanda wanu; anu motshenu mi ñotwe, kala kuza hi wonisisa ti to ati mi wombako nda ditshuri mwendo hi nga ta ditshuri. Hahanze keto, ni xambanya ngu wutomi wa Faro, ti to anu mi sinyengwani.”

Mitengo 13:1

Se Mkoma a to gela Mosi a txi khene:

Valamuli 1:23

Se va nyumba ya ka Josefa va to rumela tixoli kuya xola Bheteli (se ditina da kale da didhoropa diya i Luza).