Joxuwa 11:12 - Bhiblia Yo Sawuleka

¹² Se Joxuwa a to teka otshe madhoropa a vafumelivo, a txi daya votshe vafumeli va kona ngu ditxhari, e va lovisa, nga ti Mosi txithumi txa Mkoma, a nga ti leletete tona.

Joxuwa 11:12 Referans Kwoze

Dhewuteronome 7:2

Ngako Mkoma, Txizimu txako, a txi ma ningela kwako, awe u txi ma khozisa, u ma fuvisa ni ku ma lovisa, u nga mahe txitumelelano nawo, kambe u nga ma mahele wumbilu.

Joxuwa 11:15

Nga kule Mkoma a nga ti leletete ka Mosi, txithumi txakwe, nene Mosi a leletisile toneto ka Joxuwa; se Joxuwa a to ti maha totshe eto; asi siyi dipswi ni da dimwedo ka ale Mkoma a nga leleta ka Mosi.

Joxuwa 10:37

se va to ya khozisa didhoropa, ve fuvisa ngu ditxhari, mfumeli wa kona, ni otshe madhoropa ale ma nga ti fumwa ngu dona, ni sotshe sile si nga ya maneka ka dona si txi hanya.

Joxuwa 10:35

se ka dona ditshiku edo da dimwedo, va to di khozisa ve di lovisa ngu ditxhari; ka dona ditshiku edo kambe, va to dayela vathu va dona, ni sotshe so hanya, kufana ni ti a nga maha Lakisi.

Joxuwa 10:32

Se Mkoma a to ningela didhoropa da Lakisi manzani ka va ka Israyeli, avale va ngadi khozisa ngu ditshiku da wumbidi, ve di lovisa ngu ditxhari, ni sotshe so hanya, asile si nga ti ti ho ka dona, kufana ni ti va nga mahela Libhina.

Joxuwa 10:30

Se Mkoma a to di ningela ni dona ni mfumeli wa dona, manzani ka va ka Israyeli, ava va ngadi khozisa ngu ditxhari, ni votshe avale va nga ti ti hanya ka dona; kha va nga leka ni wammweyo wo sala. Va to maha ka mfumeli wa kona ta kufana ni ti va nga maha ka mfumeli wa Jeriko.

Joxuwa 10:28

Se ka dona ditshiku edo da dimwedo, Joxuwa a to khozisa didhoropa da Makedha, a txi daya mfumeli wa dona, ngu ditxhari, a txi lovisa votshe va nga txi hanya ka dona; kha nga siya ni m'boti ka dona, a to maha ka mfumeli wa kona ta kufana ni ti a nga maha ka mfumeli wa Jeriko.

Joxuwa 9:24

Sekoko va to xamula ka Joxuwa, va txi kha vona: “Ngako kha ditshuri ku nga ziviswa ka sithumi sako taku, Mkoma, Txizimu txako, a leletete Mosi, txithumi txakwe, ti to a txi mi ninga dotshe ditiko diya, ni kufuvisa votshe vaaki va ditiko masoni kwanu, hi ni kuthava ngutu ka wutomi wathu ngu mhaka yanu. Ngu mhaka yeto, hi mahile tiya.

Joxuwa 8:31

ngako Mosi, txithumi txa Mkoma, a nga leleta ka vanana va ka Israyeli, madingano ni ti ti nga bhalwa dibhukuni ka Mlayo wa Mosi, taku, txiluvelo txa marigwi a kwa mbi vatwa, etxo txitimwi ka txona ku nga mbi sanzekwa simbi; se txitimwi ka txona, va to ningela miningelo yo hiswa ka Mkoma, va txi ningela miningelo ya kudikha.

Joxuwa 8:8

“Se ku na maheka taku, mi di tekile didhoropa, mi na hisa didhoropa ngu mndilo; mi txi maha madingano ni dipswi da Mkoma; wonani taku ni mi leletete.”

Joxuwa 11:13

Aniko madhoropa otshe ma nga ti aketwe mimangoni, va ka Israyeli kha va ma hisa, hahanze ka didhoropa da Hazori, adi Joxuwa a ngadi hisa.

Dhewuteronome 9:3

Ngu toneto, ti zive nyamsi ti to Mkoma, Txizimu txako, ngene a no thangela masoni kwako, kufana ni mndilo wo hisa; ngene a no lovisa ni ku va fuvisa masoni kwako. Sekoko awe u na va hinga, u txi va fuvisa, nga ti Mkoma, a nga womba.

Joxuwa 10:20

Mbimo yi Joxuwa ni vanana va ka Israyeli va nga khozisa Vaamori, aha koza ve va lovisa, na avale va miboti ya kuhanya va di tsute ka madhoropa o tsana,

Joxuwa 13:6

Votshe vaaki va mmangoni, kukhukhela Libhanoni kala Misirefoti-Mayimi, votshe Vasidhoni; ani nipune ni na va tutumisa, masoni ka vanana va ka Israyeli. Awe u na phakela ditiko diya, di maha thomba ya vanana va ka Israyeli, nga ti ni nga ku leletisa tona.

Joxuwa 21:44

Mkoma a va ningile kuhumula ka otshe madhawa, madingano ni ti a nga xambanya tona ka vatate vawe; kha ka maneka ni wammweyo wa valala vawe, a nga tsana a txi ema masoni kwawe. Mkoma a to ningela votshe valala manzani kwawe.