Joxuwa 11:11 - Bhiblia Yo Sawuleka

¹¹ Se va to dayela ngu ditxhari, sotshe sivangwa so hanya, kha va nga siya ni txa tximwetxo txo hanya; kambe va to hisa ni didhoropa da Hazori.

Joxuwa 11:11 Referans Kwoze

Joxuwa 10:40

Ngu toneto, Joxuwa a khozisile dotshe ditiko, mimango ni Negebhe, ni libala ni mikova yotshe, ni vafumeli va kona votshe; kha nga leka ni wammweyo wo sala, a to si lovisa sotshe si si nga ya maneka si txi hanya, nga ti Mkoma, Txizimu txa ka Israyeli, a nga va leletisa tona.

Dhewuteronome 20:16

Kambe ka madhoropa a matiko awa Mkoma, Txizimu txako, a no kuninga ma txi maha thomba yako, u nga leke ni txa tximwetxo txivangwa txi txi hanya.

Dhewuteronome 7:2

Ngako Mkoma, Txizimu txako, a txi ma ningela kwako, awe u txi ma khozisa, u ma fuvisa ni ku ma lovisa, u nga mahe txitumelelano nawo, kambe u nga ma mahele wumbilu.

Dhewuteronome 3:7

Kambe hi tekile sotshe sifuyo, ni sotshe si hi nga handa amu madhoropani, si txi maha sathu.

Joxuwa 6:21

Se va to lovisa ngu ditxhari sotshe si si nga ti ti ho didhoropani, kukhukhela ka wamwamna, wamsikati, mfana, txikosana, tihomu, sifuyo sa sidotho, ni timbongola.

Joxuwa 6:24

Se va to hisa didhoropa ngu mndilo, ni sotshe si si nga ti ti ho ka dona, hahanze ka silivhela dwe, ni nzalama, ni siya sa txikete, ni sa simbi, va to si ningela si maha thomba Nyumbani ka Mkoma.