Jona 1:3 - Bhiblia Yo Sawuleka

³ Se Jona a to khukha e tutuma, a txi ya Tarxixi, kule ni khohe ya Mkoma, se mbimo yile a nga relela eya Jope, a to ya mana txitimela txa mati txi nga ti ti ya Tarxixi, sekoko a to xava dithikithi dakwe, e wulela mndani ka txona, kasi ku a txi tsula navo Tarxixi, kule ni khohe ya Mkoma.

Jona 1:3 Referans Kwoze

Joxuwa 19:46

ni Me-Jarkoni, ni Rakoni, ni muhingano wule wu ku ngu masoni ka Jope.

Genesisi 4:16

Se Kayini a to khukha ngu masoni ka Mkoma, eya zumba ditikoni ka Nodhe, wutxani ka Edheni.

Mithumo 9:36

Didhoropani ka Jopa, ku ti ni wamsikati wa mgondiswa, awu a nga ti dhanwa ku i Tabhita, atiya ngu Txigriki ti txhamusako ku Dhorkasi. Ene a ti taletwe ngu mithumo ya wumbilu ni wuha.

Mithumo 9:43

Pedro a to zumba Jopa mbimo yo lapha m'tini ka mtxhuki wa madhowo, a dhanwako ku i Simoni.

Jona 4:2

Se a to kombela ka Mkoma, a txi khene: Yowe! Mkoma! Ina hi nga tona tiya ni nga womba, ni di ngadi ditikoni kwangu kani? Ngu mhaka yeto, ni ti vhikete, ni tutumela kuya Tarxixi, ngu kuziva taku, u Txizimu txo pfela, ni wumbilu, txo timisela, ni kutala ngu wunene, ni ti taku wa hunduluka ka to biha.

Isaya 23:6

Pindani mi tsula Tarxixi, kambe pekani huwa anu vaaki va txitondoloni.

Isaya 23:1

Mahungu a Tiro. Pekani huwa, anu mi ku sitimelani ka Tarxixi, nguko a xasetwe, aha koza ku si sali ni nyumba kwakwe, se kha ku nga ni ko a nga wulela ni wammweyo; kukhukhela ditikoni ka Kitimi, va zivisilwe tiya.

1 Vafumeli 19:3

Mbimo yile a nga muwona a to khukha e tutuma, kasi kuhulukisa wutomi wakwe, eta Bherisebha ka Judha, e ta siya kona mfana wakwe.

2 Vatesalonika 1:9

Txitsayiso txawe ku nava kulova ko mbi guma, kha va na mbi ka nga yi wona khohe ya Mkoma, hambi kuphatima ka wukoma wakwe,

1 Vakorinto 9:16

Kutxhumayela Evhangeli, kwangu, hi nga mhaka ya ku ti bhumisa phungo ngu yona, i fanelo yi ni nga rwekwa. Dikhombo dangu, ngako ni si txhumayeli Evhangeli!

Mithumo 26:19

“Ngu toneto, mfumeli Agripa, ani kha na lamba txiwoniso txiya txa nzumani:

Ezekhiyele 27:12

Tarxixi a ti ti thumisana ni nawe, ngu mhaka ya kutala ka totshe tixaka ta tithomba; ni silivhela, ni simbi, mthovhu ni simbi yo nemela ngutu mi ti ti thumisana ka makhalo ako.

Isaya 23:10

Tshawunyeta kufana ni Nilo, ngu ditikoni kwako, awe mwanana wa muhorana wa Tarxixi; kha ku ngadi ni libhande madhawani kwako.

Jobe 1:12

Se Mkoma a to khene ka Sathani: Wona ti taku, sotshe a ku naso si manzani kwako; wo lamba walo kusanzeka diwoko dako. Se Sathani a to khukha masoni ka Mkoma.

2 Makronika 2:16

Se athu hi na wila mapulango amangi ani Libhanoni, hi ma wuyisa ngu mambale, ngu linene ani Jope, se awe u na ma teka u ma yisa Jerusalema.

Mithumo 15:38

Kambe Paulo a woni ti to kha ti faneli kutsula ni m'thu wuwa a nga hambana navo Panfiliya, ngu kulamba kuvhunetana navo.

Luka 9:62

Aniko Jesu a to mu angula ku khene: “Awu a ñolako digejo, e tshembereka a txi wonetela msana, kha nga ni fanelo ya Mfumo wa Txizimu.”

Ezekhiyele 3:14

Sekoko Moya wu to ni gula wu txi ni teka; se ni to tsula ni di henyile ngutu, ku txi tura moya wangu; aniko dianza da Mkoma di ti ti ni mtamo txitimwi kwangu.

Isaya 60:9

Ngu ditshuri, sitondolo si na ni verela, se kukhata, nzitimela sa Tarxixi, si no neha vanana vako, vale vatako ngu kule, va nata ni nzalama yawe ni silivhela yawe, kusawulekisani ka ditina da Mkoma, Txizimu txako, ni Msawuleki wa Israyeli, nguko a ku dhumisile.

Isaya 2:16

E wukela sotshe sitimela sa matini ka Tarxixi, ni sotshe sitimela sa mixowo yo tshura ngutu.

Jobe 2:7

Sekoko Sathani a to khukha masoni ka Mkoma, eya peka Jobe, ngu txivango txo biha, kukhukhela hahatshi ka mkondo kala txitimwi ka msungo.

1 Vafumeli 19:9

Se koneyo a to wulela amu ka diphala e otela kona wusikuwo; se dipswi da Mkoma di tile kwakwe di txi ta kha dona: Wo maha txani ahawa kani Elija?

Genesisi 3:8

Se va to engisa dipswi da Mkoma Txizimu, a nga ti tsimbila-tsimbila amu thembweni, ngu mbimo ya minova; wamwamna ni wamsikati va to sisala hagari ka mindonga ya thembweni, ngu kuthava khohe ya Mkoma Txizimu.

Mithumo 9:38

Se ngako Lidha i nga ti hafuhi ni Jopa, vagondiswa, va di engisile ti to Pedro waho, va to ruma vavamna vambidi, kuya m'dhana, va txi kha vona: “Kuluveta u txi ta kheno kwathu.”

Mithumo 9:42

Mhakeyo yi to ziwa ngu dotshe didhoropa da Jopa, se vavangi ve kholwa ka Mkoma.

Ezra 3:7

Va to ningela male koko ka vale vo aka ngu marigwi, vo wilela, va yimwani mithumo, ve va ninga sakudya, so sela, ni mtona ka Vasidhoni ni ka Vatiro, kasiku va na ya wuya ngu Jope ni mapulango, ngu mnamboni ka Kedhari, ngako va nga ti ningilwe ngu Siro, mfumeli wa Persiya.

Masalmo 107:23

Avale va tsimbilako mu lineneni ngu sitimela sa mati, kasi kumaha wukwewu mu matini ka hombe,

Jeremiya 10:9

Silivhela yi nga atetwa yi nehilwe ngu Tarxixi, ni nzalama ya Ufazi; mthumo wa manza a vatshuli; si ambate mkuxe wa nzuma; sotshe siya, mthumo wa titxhari.

Jona 1:10

Sekoko vavamna va to tala ngu kuthava ka hombe, va txi m'gela ku kha vona: U mahete txani awe toneto kani? Nguko va txi tiziva vavamna vale taku, a ti ko tutuma eya kule ni khohe ya Mkoma, nguko ene se a ti ti va gete.

2 Makronika 2:15

Konkuwa, nyamne wangu rumela fulaho ka sithumi sako, ni sevhadha, ni mafura ni vinya asi a nga womba-womba ngu sona.

2 Makronika 9:21

Nguko mfumeli a di ni sitataru sa Tarxixi, ni sitataru sa tikhumbi ta Hiramu, kumweko ngu malembe mararu, ku txi wuya sitataru sa Tarxixi si txi tisa nzalama ni silivhela, ni makwasa a tinzofu, ni tikhawu ni mapavawu.

Ezekhiyele 2:8

Kambe awe mwanana wa m'thu, engisa ti ni kugelako, u nga kanete, kufana ni nyumba yo kaneta; tula txisofu, u dya asi ni ku ningako.