Johani 1:1 - Bhiblia Yo Sawuleka

¹ Kukhatani ku ti ni Dipswi; Dipswi di ti ni Txizimu, Dipswi i ti Txizimu.

Johani 1:1 Referans Kwoze

Genesisi 1:1

Kukhatani Txizimu txi vangile nzuma ni mafu.

Johani 17:5

Se konkuwa, ni dhumise, awe Tata, masoni kwako, ngu wudhumo wule ni nga ti nawo, kumweko ni nawe, na ditiko di sanzi kumahwa.”

Mtuletelo 19:13

a ti ambate nguwo yi nga ti betilwe mnohani, se ditina di a dhanwako ngu dona va kha vona: “Dipswi da Txizimu.”

Vakolosa 1:17

Ene a thangelete sotshe, se sotshe si tsaniswa ngu ngene.

Johani 1:14

Dipswi di ti mahile m'thu, e aka hagari kwathu; hi wu woni wudhumo wakwe, wudhumo wu Tate a nga ninga Mwanana wakwe wa Mmweyo ekha, wo tala ngu makatekwa ni ditshuri.

Mtuletelo 22:13

Ani ngani Alfa ni Omega, Wo khata ni Wo gwita, Makhato ni Magwito.

Johani 1:2

Dona Dipswi kukhatani di ti ka Txizimu.

Mtuletelo 1:8

Ani ngani Alfa ni Omega, kha Mkoma Txizimu, awu a kuho, awu a nga ti ho, awu a tako, awu i ku nyamne wa mtamo.

Vafilipiya 2:6

Ene, hambiko i ku Txizimu ngu wutumbu wakwe, kha lava kuhumelelisa wuzimu wakwe,

Isaya 9:6

Nguko hi veleketwe mfana, hi ningilwe mwanana wa mfana; se wukoma wu txitimwi ka makata akwe; ditina dakwe a na dhanwa ku Didhota do Xamalisa, Txizimu txa Mtamo, Tate wa Mbimo Yotshe, Mkoma wa Kudikha.

Matewu 1:23

“Wotuma a na mana txirumbu e veleka mwanana wa m'zambi, awu a no raywa ditina daku i Emanuweli, (Emanuweli, ati ti wombako ku ‘Txizimu txi na ni nathu.’ ”)

Mtuletelo 21:6

A to engeta kambe a txi khene: “Ona mapswi awa ma tatisekile. Ani ngani Alfa ni Omega, ngani Makhato ni Magwito; ka wu a ku ni ditora ni na mninga mahala mati a txisima txa wutomi.

Vahebheru 13:8

Jesu Kristu ngeneyo wammweyo, nyamnova, nyamsi ni yotshe mbimo.

Isaya 7:14

Ngu toneto, Mkoma apune, a na mi ninga txikombiso: Wonani taku, wotuma a na mana txirumbu e veleka mwanana wa m'zambi, se ditina dakwe i Emanuweli.

1 Johani 5:20

Athu ha tiziva ti to a tile Mwanana wa Txizimu, e ta hi ninga mapimo, kasi kuziva Txizimu txa ditshuri. Se athu hi maneka hi di tshangani ni Txizimu txi i ku txa ditshuri, ngu konaho ka Mwanana wa txona Jesu Kristu. Awuwa ngene i ku Txizimu txa ditshuri ni wutomi wo mbi guma.

1 Timoti 3:16

Na tsanisa ti to msisalo wa wukhongeli wathu mbwa hombe: “A wonekisilwe nga m'thu, a wombilwe wo lulama moyani, a wonwi ngu tingelozi, a nuwetwe hagari ka matiko, a tumetwe ha mafuni, a kwetisilwe txitimwi kudhumiswani.”

Johani 16:28

Ni humile ngu ka Tata, ni tile ha mafuni. Konkuwa na khukha ha mafuni ni tsula ka Tata.”

Mtuletelo 1:17

Mbimo yi ni nga mu wona, ni to wa minengeni kwakwe, ni txi nga ni to fa. Ene a to ni sanzeka dianza dakwe da txinene, a txi ni gela ku khene: “U nga thave. Ani ngani wa kukhata ni kugwitisa,

Johani 20:28

Se Tomasi a to khene: “Mkoma wangu ni Txizimu txangu!”

Titosi 2:13

na hi txi verela txithembo txathu txa ditshuri, i ku kupfaliswa ka Txizimu txathu txa hombe ni Muhanyisi wathu Jesu Kristu.

Vahebheru 7:3

Ene kha nga ni tate, hambi mame, hambi lihunzu, kha nga ni makhato a masiku akwe, hambi magwito a kuhanya kwakwe, aniko a fana ni Mwanana wa Txizimu, i mphaxeli kala kupinduka.

Mtuletelo 3:14

Ka ngelozi ya Dibanza da Laodhikheya, bhala u txi khawe: “A womba tiya awu i ku Amen. Fakazi yo thembeka ni ya ditshuri, makhato a sivangwa sa Txizimu.

Vaefesu 3:9

ni kukombisa masoni ka votshe txyavelo txa makungo awa ma nga ti sisilwe ngu kale ni kale ngu Txizimu, m'vangi wa sotshe,

Mtuletelo 1:2

awu a xambanyako ti to totshe ti a nga ti wona i Dipswi da Txizimu ni wufakazi wa Jesu Kristu.

1 Johani 5:7

Nguko ku na ni tifakazi tiraru:

Varoma 9:5

avava i ku lixaka la vakokwani vathu, avava hambi Kristu a nga velekelwa kwawe ngu ka wuthu, ene a ku txitimwi ka sotshe somaha, i ku Txizimu txi txi dhumiswako yotshe mbimo. Amen.

Johani 1:18

Txizimu kha txi zivi kuwonwa ngu m'thu; Mwanana wa txona wa Mmweyo ekha, awu a ku kumweko ni Tate, ngene a nga hi zivisa ati Txizimu txi ku ngu tona.

Masalmo 45:6

Txikhalo txako txa wukoma txi fanana ni txikhalo txa Txizimu txi txi hanyako kala kupinduka, wukoma wako wu na va mfumo wa kululama.

Mtuletelo 2:8

Ka ngelozi ya Dibanza da Esmirna, bhala u txi khawe: “A womba tiya awule wo khata ni kugwitisa, awule a nga ti fite, se e tshumela e hanya.

2 Pedro 1:1

Ani Simoni Pedro, txithumi ni mpostoli wa Jesu Kristu, ni bhalela vale va nga amukela likholo la lisima kufana ni lathu, ngu kululama ka Txizimu, ni Muhanyisi wathu Jesu Kristu.

Mtuletelo 1:11

“Ati u ti wonako, ti bhale amu ka dibhuku, u txi ti rumela ka mabanza a mtxhanu ni mambidi: Efesu, Esmirna, Pergamo, Tiyatira, Sardhisi; Filadhelfiya ni Laodhikheya.”

Luka 24:53

Txotshe txikhati va ti maneka Dithepeleni, va txi dhumisa Txizimu.

Johani 8:58

Jesu a to khene kwawe: “Ngu ditshuri, ngu ditshuri, na mi gela ku khani: Na Abrahamu a sinzi ku va ho, ‘Ani ngani Wuwa.’ ”

Vakolosa 1:15

Kristu i Txifaniso txa Txizimu txi txi si wonwiko, Matiwula a sotshe sivangwa,