Jeremiya 9:16 - Bhiblia Yo Sawuleka

¹⁶ Ni na va hangalasa hagari ka matiko awa vona hambi vatate vawe va nga mbi ma ziva, ni na rumela ditxhari, niza ni va heta.

Jeremiya 9:16 Referans Kwoze

Ezekhiyele 5:12

Ka mitengo yiraru ya vathu vako, wo khata wu na fa ngu mitungu, ni kuhetwa ngu nzala; se mtengo wa wumbidi wu na dawa ngu ditxhari madhawani kwako; se wumwani mtengo ni na wu hangalasa ka otshe madhawa, na ni txi vatutumisa ngu ditxhari.

Ezekhiyele 5:2

U na hisa lipimo limwelo la wuraru la misisi ngu mndilo, hagari ka didhoropa, ngako ma di gumile masiku a kurandela; sekoko u na teka limwani lipimo, u txi li wilela ngu ditxhari u txi horoloka didhoropa; se lipimo la wuraru lo gwitisa, u na li xwaya; nguko ni na li tutumisa ngu ditxhari.

Dhewuteronome 28:64

Se Mkoma a na mi hangalasa hagari ka matiko otshe, kukhukhela magwito ka mafu kala kumwani magwito ka mafu, se koneyo u na ya khozela simwani sizimu, asile awe ni vatate vako mi nga mbi si ziva, so mahwa ngu mapulango ni marigwi.

Levhi 26:33

Ni na mi hangalasa amu matikoni, ni txi mi fuvisa ngu matxhari, ditiko danu di na maha txiwula, madhoropa anu ma na maha marumbi.

Jeremiya 44:27

Sekoko ni na va pfisa kupanda na i si nga wunene; se votshe vathu va ka Judha va ku ditikoni ka Egipta va na hetwa ngu ditxhari ni nzala, veza votshe va txi bhi.

Jeremiya 13:24

Ngu konaho, ni na va hangalasa kufana ni mthungu awu wu huhiswako ngu diphuho da mu txiwulani.

Jakobe 1:1

Ani Jakobe, txithumi txa Txizimu ni txa Mkoma Jesu Kristu, ka tihunzu ta digumi ni timbidi ti nga hangalaka ni otshe matiko, ni mi navelela wutomi.

Zakariya 7:14

Se ni na va hangalasa ngu txingulu, hagari ka otshe matiko ale va nga mbi ma ziva, se ditiko di na maha dirumbi msana kwawe, aha kaku, ku si pindi m'thu ni wammweyo ka dona, hambi kutshumela, nguko va lekile ditiko da dinene, di maha dirumbi.

Ezekhiyele 20:23

Kambe ni va guletete dianza amu txiwulani, kasi ku va hangalasa hagari ka matiko, ni ku va theketa ha mafuni;

Ezekhiyele 14:17

Ni ku ngako ni txi tisa ditxhari txitimwi ka ditiko, ni txi khani: Awe ditxhari, pinda ngu ditikoni mule: Se ani ni txi thavisa ka dona vathu ni sihari;

Ezekhiyele 12:15

Ngu toneto, va na tiziva taku ani ngani Mkoma, mbimo yile ni no va hangalasa hagari ka matiko, ni txi va wavalasa mafuni.

Ezekhiyele 11:17

Ngu kumaha keto, womba ku khawe: Mkoma a womba tiya: Ni na mi sengeleta hagari ka vathu, kambe ni na mi wuyisa ngu ka matiko ale mi nga tshotshwa ka ona.

Jeremiya 29:17

Mkoma wa Mabutho a Tiyimbi a khene: Ni na va rumela ditxhari, ni nzala, ni mtungu, ni na va maha va txi nga maxanvu o bava, ma si sikotiko kudyiwa ngu mhaka ya kubava ka ona.

Jeremiya 25:27

U na va gela, u txi khawe: Mkoma wa Mabutho a Tiyimbi, Txizimu txa Israyeli, a khene: Selani mi txi leva, mi kosa, mi txi wa, mi si wuki kambe, ngu mhaka ya yimbi ni no yi rumela kwanu.

Jeremiya 24:10

Ni na va rumela ditxhari, ni nzala, ni mtungu, veza va txi bhi ka ditiko diya, ni nga va ninga vona ni vatate vawe.”

Masalmo 106:27

ti to txi na hangalasa vanana vawe hagari ka vamatiko, txi va hangalasa hagari ka mifumo.

Nehemiya 1:8

Alakanya koko dipswi di u nga leleta Mosi txithumi txako, u txi khawe: Anu mi na hambuka, se ani ni na mi hangalasa hagari ka matiko.

Dhewuteronome 32:26

Ni ti khani: “Ni na va hangalasa, va si swi va txi alakanywa hagari ka mafu!”

Dhewuteronome 28:36

Mkoma a na ku rurisa awe, kumweko ni mfumeli wule u no va u di m'vekile txitimwi kwako, a txi kuyisa ka ditiko di u si di ziviko awe ni vatate vako, se koneyo u na ya khozela simwani sizimu, so mahwa ngu mapulango ni marigwi.

Dhewuteronome 28:25

Mkoma a na maha ti to u txi xulwa ngu valala vako, u na huma u txi yalwa ni valala vako ngu nzila yimweyo, kambe u na ya tutuma u txi thava ngu mtxhanu wa tinzila ni timbidi, masoni kwawe! U na va txixamaliso ka mifumo yotshe ya ha mafuni

Dhewuteronome 4:27

Mkoma a na mi hangalasa hagari ka vamatiko, se mi na sala mi di va mtengo wa wudotho, hagari ka mifumo yiya, Mkoma a no va a txi mi yisa ka yona.

Jeremiya 8:19

Hi nga pfa dipswi da txidilo da mwanana wa txisikati wa vathu vangu, adi di humako ditikoni ka kule, di txi kha dona: Kasi Mkoma khangaho Siyoni kani? Ina Mkoma wakwe kha nga kwakwe kani? Ngu kutxani va nga vhinjukisa kuhenya kwangu ngu sifananiso sawe, ni sizimu sa vamatiko kani?

Ekleziyaste 12:5

ni ku ngako makhalo o guleka ma txi zinginika, kuva ni kuthava hanzila, kuthunga mkhungu, ni humbi yi maha yo nemela, ufa ngu kunavela; nguko m'thu wa tsula ka nyumba yo gwita, se vale vo saluka, va na tsimbila-tsimbila mtendelani;

Jeremiya 7:29

Yola misisi ya msungo wako, u txi yi tshotsha kule, indaya peka huwa mimangoni, nguko Mkoma a lambile ni kuleka lihunzu li li nga wusa kuhenya kwakwe.

Ezekhiyele 27:2

Awe koko mwanana wa m'thu, wusa txidilo txo dila Tiro.

Amosi 5:16

Ngu toneto, a womba tiya Mkoma, Txizimu txa Mabutho a Tiyimbi, Mkoma: Ka otshe magondo ku nava ni kudila: Ni ka sotshe sigava va na kha vona: Yowe! Yowe! Kambe va na dhana m'dimi kuya dila, ni ku ta dila ka vale va zivako madilelo.

Mika 2:4

Kedo ditshiku, va na thula divingu txitimwi kwanu, kambe va na wusa txidilo txo thisa, va txi kha vona: Hi hoxotilwe do gwita! A tekile thomba ya vathu vangu! Eto a ni handisako tona! A teka tithembwe tathu e ti abanisela!