Jeremiya 7:13 - Bhiblia Yo Sawuleka

¹³ Kona kuwa koko, mi di mahile totshe tiya, kuwomba Mkoma, ni wombile kwanu i di ngadi mixo, ni mi gela, aniko kha ma engisa; ni to mi dhana, kambe kha ma xamula.

Jeremiya 7:13 Referans Kwoze

Isaya 65:12

kambe ni na mi ningela ka ditxhari, motshenu mi na nama mi dayelwa, nguko ni mi dhani, aniko kha ma xamula; ni wombawombile, kambe kha ma engisa, aniko mi mahile ti i ku to biha masoni kwangu, mi sawute sile ani ni nga si si tsakeli.

Jeremiya 7:25

Kukhukhela ditshiku di vatate vanu va nga khukha ngu dona ditikoni ka Egipta kala kuwa, ditshiku ni ditshiku, i di ngadi mixo, ni rumete kwanu sithumi sangu sotshe, i ku vaprofeti.

Mavingu 1:24

Ani ni mi dhani, aniko anu mi lambile; nguko ni nawulutile diwoko dangu, aniko kha ka maneka wo pfisisa;

Matewu 23:37

“Jerusalema! Jerusalema! U dayako vaprofeti, u txi balisela ngu marigwi ava va rumelwako kwako! Nzi khati singani ni nga navela kusengeleta vanana vako nga kule ka khukhu yi fundamelako sisondwana sa yona ngu mabhapi, se awe u txi lamba!

Zakariya 7:13

Se ku to maheka tito, ngako ene a nga kwangula, vona kha va engisa, ngu toneto, ni vona va na kwangula, aniko ani kha ni na mbi va engisa, kuwomba Mkoma wa Mabutho a Tiyimbi.

Hoseya 11:7

Nguko vathu vangu va wekelela ku ni leka, hambiko va dhanako Nyatxitimwi, kha ngaho kwawe a m'guletako.

Hoseya 11:2

Kambe ngako ni txi va dhana vona va ti nitshuralela; va ti ti phaxela ka va ka bhahali, ve hisela dibaselo sithombe so vatwa.

Jeremiya 44:4

Ni mi rumelete sotshe sithumi sangu i ku vaprofeti, ni mixo ngutu ku ta womba tiya: Mi nga maheni wubihi wu ni wu nyenyako.

Jeremiya 35:17

Mkoma, Txizimu txa Mabutho a Tiyimbi, Txizimu txa ka Israyeli, a womba tiya: Wona, ni na neha txitimwi ka Judha, ni ka votshe va zumbako Jerusalema, dotshe dikhombo ni ngadi womba kwawe; nguko ni khala ku va gela, aniko kha va engisa; ni va dhani, aniko kha va xamula.

Jeremiya 35:15

Se ni mi rumete sithumi, i ku vaprofeti, va txi phindula, ve rumela va txi kha vona: Hundulukani, konakuwa, mmweyo ni mmweyo nzilani kwakwe ko biha, mi txi txhukwatisa mithumo yanu ya yinene, kambe mi nga londeteleni simwani sizimu; kasi ku si thumela; se ngu kumaha keto, mi na zumba ka ditiko di ni nga mi ninga, anu ni vatate vanu; aniko kha ma riya tinzeve, hambi ku ni engisa ani.

Jeremiya 25:3

Kukhukhela ka dilembe da digumi ni mararu da kufuma ka Josiya, mwana Amoni, mfumeli wa ka Judha, kala ka diya ditshiku, mndani ka magumi mambidi a malembe ni mararu, Mkoma a ti womba-womba ni nani, ni di txhumayete kwanu i di ngadi mixo, aniko anu kha ma engisa.

Jeremiya 11:7

Nguko kukhukhela ditshikwedo ni nga humisa ngu dona vatate vanu ditikoni ka Egipta, kala kuhoka nyamsi, ni va gete ni txi ngadi ni vinduka ni mixo, ni va laya, ni txi khani: Engisani dipswi dangu!

Isaya 66:4

Kambe ani ni va maha ve kanganyiseka, ni na tisa kuthava txitimwi kwawe, nguko ni dhani, aniko kha ka xamula ni wammweyo, ni wombawombile, aniko kha va engisa, kambe va mahile to biha masoni kwangu, se ve sawula ti ani ti nga si ni tsakisi.

Isaya 50:2

Ngu kutxani ni ngata ni si ta mana m'thu kani? Ngu kutxani ni nga mi dhana, ku si oroveli ni wammweyo kani? Ina dianza dangu di to khwanyela, niza ni si sikoti kutirula kani? Ni ku mwendo kha ni ngadi ni mtamo kasi kutxhatxhisa kani? Wonani taku, ngu kukawuka kwangu na omisa linene, ni maha ti to minambo yi hunduluka yiva siwula, kala kuza sihaka sa kona si nunga, nguko kha ku nga ni mati, se sa fa ngu ditora.

Jeremiya 13:11

Nga kule libhandi li namarelako ha txiwununi ka m'thu, ngu toneto ni mahile ti taku yotshe nyumba ya ka Israyeli ni yotshe nyumba ya ka Judha ti txi namarela kwangu, kuwomba Mkoma, kasi di txi maneka kwangu ditiko, ni ditina, ni wudhundo, ni wuhombe; aniko kha va tumela kuengisa.

Jeremiya 26:5

kuva mi txi na engisa timhaka ta sithumi sangu i ku vaprofeti, ava ni nga va rumela kwanu, i di ngadi mixo, aniko anu kha ma engisa;

Jeremiya 32:33

Va ni tshuralete, kha va ni engisa; hambiko ni nga va gondisa kambe ni kambe, kha va engisa ti taku va kawukwa.

Jeremiya 35:14

Timhaka ta Jonadhabhe, mwana Rekabhi, ati a nga laya vanana vakwe ti to va si seli vhinya, va ti xayisile; kha va sela kala ni nyamsi kuwa; nguko va engisile mlayo wa tate wawe; ani koko nitako ni txi womba kwanu, ni phindula ni mi gela, aniko anu, kha ma ni engisa.

Jeremiya 44:23

Ti komba ku mi hisile dibaselo, mi onhete Mkoma, kambe kha ma thava dipswi da Mkoma, kha ma tsimbila ngu sileleto ni wufakazi wakwe, mi humeletwe ngu dikhombo diya, nga ti ti wonekisako tona ni ka diya ditshiku.

Jeremiya 5:21

Engisani koko, anu vathu vo bharuka, mi singako ni mapimo, mi ku ni maso ma si woniko, ni tinzeve ti si engisiko!

Jeremiya 6:10

Ni na gela mani, ni maha wufakazi waku va na wu engisa kani? Tinzeve tawe maphanzeve, kha va sikoti kuengisa. Mhaka ya Mkoma njiruko kwawe kha va yi dhundi.

Jeremiya 11:8

Aniko kha va engisa, hambi kuhuphuta nzeve yawe. Mmweyo ni mmweyo a to so mbetete e mwalaleka ngu kubanga ka mbilu yakwe yo biha. Nguko ni nehile txitimwi kwawe timhaka totshe ta txiya txitumelelano, txi ni nga va laya ku txi xayisa, aniko kha va txi xayisa.

Jeremiya 13:10

Ditiko diya do biha, adi di si tumeliko kupfa mapswi angu, adi di tsimbilako ngu kubanga ka mbilu ya dona, di txi londetela simwani sizimu, di txi si thumela ni ku si khozela, di na fana ni libhandi li li si vhuniko txilo.

Jeremiya 29:19

nguko kha va engisa timhaka tangu, kuwomba Mkoma, aha ni nga va rumelela sithumi sangu i ku vaprofeti ngu kusimamisa. Aniko kha ma engisa, kuwomba Mkoma.

Hoseya 9:17

Txizimu txangu txi na va lamba, nguko kha va txi engisi; va na tsimbila-tsimbila hagari ka matiko va si thumi txilo.