Jeremiya 6:16 - Bhiblia Yo Sawuleka

¹⁶ Mkoma a khene: Emani tinzilani, mi wonisisa; mi wotisela tinzila ta kale, mi txi khanu: Kasi nzila ya yinene ngu yihi kani? Sekoko, tsimbilani ngu yona. Mi na mana kuhumula ka mihefemulo yanu. Aniko vona va to xamula, va txi kha vona: Kha hi tumeli kutsimbila ngu yona.

Jeremiya 6:16 Referans Kwoze

Isaya 30:21

Se tinzeve tako ti na engisa dipswi msana kwako, di txi kha dona: Nzila ngu yona yi; tsimbilani ka yona, mi nga jikeni miya txinene mwendo txibhabha.

Jeremiya 18:15

Nguko vathu vangu va ni divate, va hisile dibaso ka sifananiso. Si va humbile tinzilani kwawe, amu ka mapfhela a kale. Kuva ve wekelela ka nzila yo timeta, ya kwa mbi dhodwa.

Dhewuteronome 32:7

Alakanya masiku a kale, u txi khumbula malembe a tiveleko ni tiveleko ti nga pinda. Wotisa tate wako a na kuxawutela, wotisa madhota ako ma na kugeletela.

Jeremiya 7:23

Aniko, ati ni nga va laya, ngu ti taku: Engisani dipswi dangu, sekoko ni na va Txizimu txanu, anu mi na va vathu vangu; tsimbilani ngu tinzila ti ni nga mi laya ngu tona, kasi ku mi na zumbiseka kwati.

Vakolosa 2:6

Ngu toneto, kufana ni ku mi nga amukela Mkoma Kristu Jesu, hanyani mi di txilo tximwetxo nayo;

Isaya 2:5

Ngonani, anu va nyumba ya ka Jokobe, he tsimbileni kuwonekelani ka Mkoma.

Johani 12:35

Se Jesu a to va xamula a txi khene: “Liwoningo li ngadi ni nanu ngu mbimoanyana. Tsimbilani mi di ngadi ni liwoningo, kasiku txidema txi si mi mani, nguko awu a tsimbilako txidemani, kha kuzivi amu a yako kona.

Jeremiya 18:12

Aniko va na xamula, va txi kha vona: “Wa ti karata walo, hi na maha kuranda kwathu athu vanyamne, mmweyo ni mmweyo a na maha ngu kubanga ka mbilu yakwe yo biha.”

Jeremiya 22:21

Ni wombawombile ni nawe ti txi ngadi ti kuhumela kwati, Aniko u txi khawe: “Kha ni na mbi engisa.” Ngu ona mahanyelo ako kukhukhela wananani, aku, khu na mbi pfa dipswi dangu.

Jeremiya 44:16

Kasi ngu dipswi di u nga hi zivisa ngu ditina da Mkoma, kha hi na mbi kuxonipha awe;

Vahebheru 11:2

Ngu mhaka ya likholo, vakale va mani nduma ya yinene.

Johani 13:17

Ngako mi txi tiziva tiya ni ku ti thuma, mi katekile.”

Malakiya 4:4

Alakanyani Mlayo wa Mosi, txithumi txangu, awu ni nga wu rumela kwakwe kona Horebhi ka votshe va ka Israyeli, awu i ku sileleto ni wulamuli.

Vahebheru 6:12

Athu kha hi lavi ku mi txi hinduka mi maha mikara, aniko, londetelani avale va amukelako thomba ya sithembiso ngu likholo ni kutimisela.

Isaya 8:20

Amu ka mlayo ni mu ka wufakazi! Ngako va si wombi dipswi diya, kha va na mbi dhuka ve wona wuronga.

Luka 16:29

Aniko Abrahamu a xamute a txi khene: ‘Vona va na ni Mlayo wa Mosi ni tigondo ta Vaprofeti, va na va engise.’

Isaya 28:12

nga kule ni nga khani: Akuwa nguhumula, ningani kuhumula ka kuhumula; se ayiya i mbimo yo ndinda moya; aniko kha va lava kuengisa.

Johani 5:39

Anu mi wonisisa Mibhalo ngu kualakanya tito, mi na mana wutomi wo mbi guma ka yona, kasi ngu yona yi ni fakazelako.

Mithumo 17:11

Vona va ti ni mialakanyo ya yinene kupinda ya Vatesalonika. Va amukete dipswi ngu yotshe mbilu. Ditshiku ni ditshiku va ti gonda dibhuku, kasi kuwonisisa ditshuri da totshe timhaka.

Varoma 4:12

I tate wawe ni vona va va wukwera, na i si nga mhaka ya wukwera dwe, kambe ngu kuwa va tsimbilako ngu nzila ya kukholwa, ayi tate wathu Abrahamu a nga tsimbila ngu yona, ni mbimo yi a nga sinzi kuyiswa wukwerani.

Jeremiya 2:25

Thela kota ti to mkondo wako wu si mwalalelwi ngu kathula, ni mkolo wako ti to wu mana ditora! Aniko u khawe: “Wa ti karata walo! Nguko ni randa sizimu sa vamatiko ni nga txi na si londetela.”

1 Vafumeli 8:36

va engise awe koko nzumaniyo, u divalela txionho txa sithumi sako ni txa vathu vako va ka Israyeli, ni ku va gondisa to va na tsimbile ngu nzila ya yinene, nisa mati ka mafu awa u nga ninga vathu vako kuva thomba.

Masalmo 116:7

Moya wangu, themba Mkoma, nguko Mkoma a kukatekisile.

Jeremiya 12:16

Ngako va di gondile tinzila ta vathu vangu, ti taku va txi xambanya ditinani kwangu, va txi kha vona: Mkoma a hanyako; nga ku va nga gondisa vathu vangu kuxambanya ngu Bhahali, sekoko va na maneka hagari ka vathu vangu.

Jeremiya 31:21

Ti emisele sikombiso, guleta siwindi, veka mbilu yako amu ka ditshuri, ka nzila yile u nga tsimbila ngu yona; wuya awe wotuma wa Israyeli, wuya madhoropani kwako.

Jeremiya 42:3

Kuva Mkoma Txizimu a na hi kombisa nzila yi hi no tsimbila ngu yona, ni ti hi dinganako ku ti maha.

Jeremiya 50:5

Va na wotisa va di nzilani ka Siyoni, tikhohe tawe ti na rendekela koneyo, va nata ti pananisa ni Mkoma, ka Txitumelelano txo mbi gwita, txi na kwa mbi dhuka txi divalwa.

Valamuli 2:17

Aniko ni ka kudotho kha va engisa valamuli; va to maha wugango wo londeta simwani sizimu, kambe va txi si khizamela; va to kuluveta kuleka nzila yi va nga tsimbila ngu yona vatate vawe, yo engisa sirumo sa Mkoma; se vona kha va mahisa eto.

2 Makronika 19:11

Tiziveni ti to Amariya, mphaxeli wa hombe a na va i di mthangeli wanu ka toshe timhaka ti ti lumbako Mkoma; se ka timhaka ta mfumo, mi na thangelwa ngu Zebhadhiya, mwana Ismayeli, mthangeli wa nyumba ya va ka Judha. Valevhi va na vhunetela ka mithumo ya dibhazani. Thumani mi di tsani, Mkoma a na va ni vale va kululama.

Isaya 46:9

Alakanyani timhaka ti ti nga pinda ta kale ngutu: Taku ani ngani Txizimu, se kha ku na tximwani Txizimu, kha ku nga ni tximwani txo fana ni nani;

Isaya 57:2

Ene a na wulela ngu kuthutha; va na humula mibhedhuni kwawe, vale va no maneka va di tsimbite kululamani kwawe.

Jeremiya 7:3

Mkoma wa Mabutho a Tiyimbi, Txizimu txa ka Israyeli, a khene: Txhukwatisani mahanyelo anu ni mithumo yanu, sekoko ni na mi tumela kusimamisa mi aka ka wuwa wukhalo.

Jeremiya 7:24

Aniko kha va engisa hambi ku riya tinzeve; se va to tsula makungoni kwawe ni mu ka kubanga ka timbilu tawe to biha, va to tshumelela msana, kha vaya masoni.