Jeremiya 51:29 - Bhiblia Yo Sawuleka

²⁹ Ngu toneto, ma na zinginika mafu, ma na pfa kupanda, nguko kuwomba kumweko ka Mkoma kutsanisa kuwukela Bhabhilona, kasi kumaha ti to ditiko da Bhabhilona di txi fuviswa, di si mani vazumbi.

Jeremiya 51:29 Referans Kwoze

Jeremiya 51:43

Madhoropa akwe ma mahile marumbi, ditiko da txigwangwa da txiwula, ditiko da kwa mbi na vo zumba, hambi kupinda ngu kona mwanana wa m'thu.

Jeremiya 8:16

Diguwa da mahantxhi akwe di pfala Dhani; mafu otshe ma zinginika ngu kuemba ka ona ka mtamo; nguko va tile ve ta hetisa ditiko ni sotshe si ku ka dona, didhoropa ni votshe va va zumbako ka dona.

Amosi 8:8

Ditiko di na mbi zinginika ngu kona ha ka tiya kani? Kha va na mbi dila votshe va va hanyako ka dona kani? Kha ditshuri dotshe ditiko di na guleka ku nga mnambo wa hombe, di na ginyalatwa, di na nyuvela ku nga mnambo wa Egipta.

Jeremiya 50:45

Sekoko, pfanani txileleto txa Mkoma txo sola Bhabhilona, ni kuwomba kwakwe madingano ni Vakaldheya: Ngu ditshuri ava vavadotho ngutu va mtxhambi, va na va ndinda-ndinda; ngu ditshuri di na fuviswa dizumbo dawe.

Jeremiya 50:13

Ngu mhaka ya kuhenya ka Mkoma, kha ku na mbi zumba m'thu, ku na maha txiwula, ni mmhi a no pinda ngu Bhabhilona a na xamala ni kuveta mloti, a txi wona tiphango ta kona.

Jeremiya 10:10

Aniko Mkoma Txizimu txa ditshuri, Txizimu txi txi hanyako, Mfumeli wa kupindukela; mafu ma dhudhumela kuhenyani kwakwe, matiko kha ma na kuema masoni ka txiviti txakwe.

Mtuletelo 18:2

Konako yona yi to kwangula ngu dipswi da mtamo, yi txi kha yona: “A wite, a wite Bhabhilona wa hombe, a hindukile e maha wuzumbelo wa madhimoni, wuthavelo wa totshe tixaka ta mimoya ya nzambwa, wuthavelo wa totshe tixaka ta sinyana sa nzambwa ni so nyenyeza.

Joyeli 2:10

Masoni kwakwe, mafu ma na dhudhumela, nzuma yi na dekadeka; ditambo ni mtxima si na maha sa mtima, ni tinyeleti ti na thavisa kuphatima ka tona.

Jeremiya 50:43

Mfumeli wa Bhabhilona a pfite nduma yawe, se ma so hololo manza akwe, e ñolwa ngu xomulo, kupanda, nga ka wamsikati a hefemulako.

Isaya 14:16

Ava va kuwonako, va na kuwonisisa, va txi kha vona: Ngene m'thu wu a nga zinginisa mafu, awu a nga zinginisa mifumo kani?

Jeremiya 50:36

Di nata ditxhari txitimwi ka va makuhu, kha va na mbi pfa txilo: Ditxhari di nata txitimwi ka tindena tawe, ti na tsivala.

Jeremiya 50:46

Ka diguwa da kutekwa ka Bhabhilona, ma dhudhumete mafu; se huwa yi pfate matikoni.

Jeremiya 51:26

Kha ku na mbi tekwa kwako dirigwi do di thumisa, hambi dirigwi do khatisa, nguko u na va u di phwarasetwe do gwita, kuwomba Mkoma.

Jeremiya 51:28

Sawulekisani matiko kupinda ene, vafumeli va Medhiya, vathangeli va tiyimbi ni votshe vafumeli vawe, ni dotshe ditiko di va di fumako.

Isaya 24:20

Mafu otshe ma na dhedhereka kufana ni didevi, kambe ma na zinginiswa, me thaviswa ni wusiku, nga mtxhatxha; se wuhambunyeti wa ona wu na ma nemelela, ma nawa, ma si wuki kambe.

Jeremiya 51:37

Se Bhabhilona a na maha mmumbu, m'ti wa vamwamilambo, txixamaliso txo vetisa miloti, ku si nga ni muaki ni wammweyo.