Jeremiya 51:25 - Bhiblia Yo Sawuleka

²⁵ Ti wone, na kuwukela, awe mmango, mkhunduluseli, kuwomba Mkoma, u khundumusako dotshe ditiko, kambe ni na nawuluta dianza dangu, ni txi kurindilita amu marigwini, se ni na kuhisa ngu mndilo wa hombe.

Jeremiya 51:25 Referans Kwoze

Mtuletelo 8:8

Se ngelozi ya wumbidi ni yona yi to veta mpundu wa yona. Se txilotxo txo nga mmango wo tura, txi to vinzwa lineneni. Se didhawa da wuraru da linene di to hinduka di maha mnoha;

Zakariya 4:7

U mani awe, mmangowe wa hombe kani? Masoni ka Zorobhabheli u na va libala; nguko ene a na tisa dirigwi do khata, se vathu va na kwangula, va txi kha vona: Wumbilu, wumbilu wu nave kwakwe.

Jeremiya 50:31

Wona ti taku ani na kuwukela awe nyakutikulise, kuwomba Mkoma, Txizimu txa Mabutho a Tiyimbi, nguko di hokile ditshiku dako, i ku mbimo yi ni no kuendela ngu yona.

Jeremiya 51:58

Mkoma wa Mabutho a Tiyimbi a khene: Maguma o anama a Bhabhilona, kha ditshuri ma na wiswa, ni matimba akwe o tshura ma na hiswa ngu mndilo, ma txi karala.

Jeremiya 51:53

Hambi i di kova ku Bhabhilona a nga kwela nzumani, mwendo kutsanisa kuguleka ka diguma dakwe, ni ndi na m'rumela vaxaseli, kuwomba Mkoma.

Isaya 13:2

Gwimbani m'jeke txitimwi ka mmango wa kwa mbi na txilo; va dhaneni ngu dipswi do guleka, mi va dyoweta ngu dianza, kasi kuva txi wulela ngu sike sa vathangeli.

Dhaniyeli 4:30

mfumeli a to wotisa, a txi khene: Ina hi nga ene Bhabhilona wa hombe wu ni nga muaka kasi kumaha nyumba ya wukoma, ngu mtamo wa mfumo wangu, ni wudhumo wa wuhombe wangu kani?

Jeremiya 51:7

Bhabhilona i ti ti kopo ya nzalama manzani ka Mkoma, ayi yi nga ti ti levisa dotshe ditiko; Matiko ma sete vhinya yakwe; ngu mhaka yeto matiko ma xangile.

Jeremiya 25:9

ni na rumela kuya dhana tixaka totshe ta vathu ta Wuphemba, kuwomba Mkoma, ni ka Nebhukodhonosori, txithumi txangu, i ku mfumeli wa Bhabhilona; ni na va leka velwa ni ditiko diya, ni vazumbi va kona, ni matiko otshe o gwatamelana nado; ni na va lovisela magwito, ni na va maha txidiwukiso, ni txiruko, ni marumbi a kala kupinduka.

Genesisi 11:4

Va to kha vona: “A hi ti akeleni didhoropa ni txitezi, atxiya txiroro txa kona txi no hoka nzumani, se ditina dathu di na va ni nduma, kasi ku hi si hangalaswi ka otshe mafu.”

2 Pedro 3:10

Kambe ditshiku da Mkoma di na tisa ku nga dikhamba; ka donedo ditshiku, tinzuma ti na pinda ti txi dhinda ngutu, tinyeleti ti na nyivilika ngu kupfa kuhisa ka hombe; ditiko ni mithumo ya dona si na hya si txi guma.

Masalmo 138:7

Ngako ni txi tsimbila hagari ka kuxaniseka awe wa ni hanyisa; u na nawuluta dianza dako u ni vhikela ka txiviti txa valala vangu se dianza dako da txinene di na ni hanyisa.

Jeremiya 50:25

Mkoma a tute sizenda sakwe, a thavisile siya so kombisa kuhenya kwakwe; nguko Mkoma, Mkoma wa Mabutho a Tiyimbi a ni mthumo a lavako ku wu maha ditikoni ka Vakaldheya.

Jeremiya 25:12

Aniko ngako ku di pindile mtxhanu wa magumi ni magumi mambidi a malembe, ni na tsayisa mfumeli wa Bhabhilona ni ditiko da kona, ngu mhaka ya kuwekela kwawe, kuwomba Mkoma; ni ditiko da Vakaldheya ni na di maha diva txiwula, kala kupinduka.