Jeremiya 51:16 - Bhiblia Yo Sawuleka

¹⁶ A txi pfalisa dipswi ngu kudhinda ka hombe ka mati nzumani, ni tihunguva, kukhukhela magwito ka mafu: Wa maha kukeluka ma txi wa mati, ni kuhumisa moya ngu mu wu zumbako kona.

Jeremiya 51:16 Referans Kwoze

Masalmo 135:7

Ene wa wuyisa marefu a diphuho ngu magemeta-mitshi ka mafu; wa humisa singwalangwanda, wa wisa mati a nzuma wa tulela maphuho me huma ngu ku khotelwani ka ona.

Jona 1:4

Aniko Mkoma a to rumela moya wa hombe lineneni, se ku to maheka txihuhuri txa hombe lineneni, se txitimela txi txi nga txo lava ni kubhandeka.

Masalmo 18:13

Mkoma a to dhinda a di nzumani, Nyatxitimwi a huwelete ngu dipswi dakwe.

Jona 4:8

Se ku to maheka taku, kuhumani ka ditambo, Txizimu txi rumela moya wo hisa wa wutxani, se ditambo di peka msungo wa Jona, se a to tsivala; e navela ngu wotshe moya wakwe kufa, a txi khene: “I txhuko kwangu kufa kupinda kuhanya.”

Amosi 9:7

Ina hi nga anu vanana va ka Israyeli kwangu, nga vanana va Vaetiyopia kani? Kuwomba Mkoma. Ina kha na kwelelisa vanana va ka Israyeli ngu ditikoni ka Egipta, ni Vafilista ngu Kafitori, ni Vasiriya ngu Kiri kani?

Ezekhiyele 10:5

Se diguwa da tibhapi ta makerubhima di to pfala kala ka muhubhe wa hahanze, kufana ni dipswi da Txizimu txa Mtamo-wotshe txi txi womba-womba.

Masalmo 147:18

Ngu msana wa rumela dimwani dipswi, se maralala me nyivilika; wa ruma diphuho, di txi futeta, se mati ma txi khulunga.

Masalmo 104:7

aniko awe u ma kawukile, se ona me thava, se ma di engisile kudhinda ka dipswi dako, ma to kuluveta me phwa.

Masalmo 78:26

Txi to humisa ngu nzumani diphuho da wutxani se ngu mtamo wa txona txi tisa diphuho da wulambwe!

Masalmo 68:33

Ka wule tsimbilatsimbilako a di gadhile tinzuma ta tinzuma, kukhukhela kaleko! Wona taku wa rumela dipswi dakwe ni kuninga kudhinda ko thisa ngutu.

Masalmo 46:6

Matiko ma ngungurukela, mifumo ya gingiseka. Kambe Txizimu txi womba dipswi, mafu ma so bhandekela.

Jobe 40:9

Mwendo u ni diwoko do nga da Txizimu, mwendo u nga bhonga ngu dipswi nga da txona kani?

Jobe 38:22

Mwendo u wulete kala sisangalani ka hunguva, mwendo u woni sisangala sa maralala,

Jobe 37:13

kumahela kuva txikhawuliso ka mafu mwendo kuva tikatekiso ka mafu, hambi kuninga kuhanya kakunene.

Eksodha 14:21

Sekoko Mosi a to nawuluta dianza dakwe txitimwi ka linene, se Mkoma a to abanisa mati ka wotshe wusiku wule, ngu moya wa mtamo, wa kuta ngu wutxani; se linene li txi maneka li di omile.

Eksodha 10:19

Sekoko Mkoma a to maha to moya wa mswa-ditambo wu txi futeta ngu mtamo, se moya wonewo wu to khukhula humbi yotshe wu txi ya yi vhunga lineneni ko Bhilivila; aha ku nga mbi sala ni ya yimweyo humbi ka dotshe ditiko da Egipta.

Eksodha 10:13

Sekoko Mosi a to guleta ndonga yakwe txitimwi ka ditiko da Egipta. Mkoma a to wuyisa mu ditikoni ka Egipta diphuho da wutxani ka dotshe ditshiku dile ni ka wotshe wusiku wule. Mbimo yi di nga txa, diphuho da wutxani di manekile di txi wuyisa humbi.

Genesisi 8:1

Se Txizimu txi to alakanya Nowa ni sotshe sihari sa txitinga ni sotshe sifuyo si a nga ti naso ngalavani; Txizimu txi to maha diphuho di txi futeta txitimwi ka ditiko, se mati ma to khata kuphwa.