Jeremiya 50:6 - Bhiblia Yo Sawuleka

⁶ Vathu vangu ndinvuta to mwalala, vadyisi va tona ngu vona va nga ti mwalata, va ti lekile ti txi pengela kuya mimangoni, ti si alakanyi kutshumelela dizumboni ka tona.

Jeremiya 50:6 Referans Kwoze

Isaya 53:6

Athu hotshethu hi ti ti hangalakile kufana ni tinvuta; mmweyo ni mmweyo a ti ti tsimbila ngu nzila yakwe, aniko Mkoma a mrwekile wubihi wathu hotshethu.

Matewu 9:36

Ngako Jesu a di woni dibutho da vathu, a to va pfela wusiwana, nguko va ti ti karate ni kurereka, nga tinvuta to mbi na m'dyisi.

Matewu 10:6

Kukhata tsulani ka tinvuta ti ti nga hangalaka ta Nyumba ya ka Israyeli.

Ezekhiyele 34:14

Ni na ti dyisela ka makhalo amanene, sibala sa kona si na maneka ka mimango yo lapha ya ka Israyeli; koneyo ti na otela ka txibala txatxinene, kambe ti na dya ka wudyiselo wa kunona, mimangoni ka Israyeli.

Jeremiya 50:17

Nvuta yo mwalala ngene Israyeli; tingonyamo ti mtutumisile. Mfumeli wa Asiriya ngene a nga khata ku m'vhandamulela; se ngu magwito Nebhukodhonosori, mfumeli wa Bhabhilona, a to mfunya marambu.

Masalmo 119:176

Ni pepesekile kufana ni nvuta yo mwalala; tsimbita txithumi txiya txako, nguko ani kha na divala sirumo sako.

Jeremiya 50:19

Israyeli ni na mmaha e tshumelela dizumboni kwakwe, a na dyisela Karmeli ni Bhasani; moya wakwe wu na khuriswa kona Efrayime ni Gileyadhi.

Jeremiya 3:6

Mkoma a to womba kwangu ka masiku a mfumeli Josiya, a txi khene: “Ina u ti woni ti a nga maha Israyeli wu wo tiwuka kani? Ene a kwete mimango yotshe yo guleka, ni hahatshi ka yotshe mindonga yo nyuka, konamo a ta so mbetete wugangoni.

Masalmo 116:7

Moya wangu, themba Mkoma, nguko Mkoma a kukatekisile.

Masalmo 91:1

Awule a zumbako kusisalani ka Nyatxitimwi a na humula mtsudini ka Nyamitamo,

1 Pedro 2:25

Nguko, mi ti ti fana ni tinvuta ta kuhangalaka, aniko akuwa mi tshumete mi wuya ka M'dyisi ni Muwoneleti wa mimoya yanu.

Matewu 15:24

Jesu a to xamula a txi khene: “Ani kha na rumelwa vamwani hahanze ka tinvuta ti ti nga mwalala ta nyumba ya ka Israyeli.”

Jeremiya 10:21

Nguko vadyisi va bharukile, kha va xota Mkoma; ngukonaho kha va humeleli, sotshe sibala sawe si hangalakile.

Jeremiya 3:23

Kha ditshuri hi thembile walo kuhanyiswa ku kutako ngu mimwayani, ni ngolovanya ya mimwayani kha yi vhuni txilo. Kha ditshuri kuhanyiswa ka Israyeli kuta ngu ka Mkoma, Txizimu txathu.

Jeremiya 2:32

Ina m'horana a nga divala wubombi wakwe, mwendo wa ku ngadi kulowolwa kudivala sihiwa sakwe kani? Kambe ditiko dangu di ni divate kale.

Jeremiya 2:20

Nguko ngale ni di funyile dikange dako, ni bhenula tingoti tako, u nje khawe: Na mbiswa ni txi thuma, nguko u sisate ka yotshe mimango yo guleka, ni hahatshi ka yotshe mindonga yo nyuka, u maha wugango.

Isaya 32:2

Se wamwamna wule a na fana ni txivhikelo txo vhikela moya, a na nga wuthavelo ka txihuhuri, ni ku nga lidhonga la mati ka makhalo a kuoma, ni mtsudi wa dirigwi da hombe ka ditiko da txihala.

Isaya 30:15

Nguko Mkoma Txizimu, Msawuleki wa Israyeli, a khene: Ngu kuhunduluka ni kuthutha, ku ndi na maneka kuhanyiswa kwanu; kuzumbisekani ni mu ka kuthemba, ku ndi na maneka mtamo wanu, aniko kha ma ti lava.

Masalmo 90:1

Mkoma, awe u wuthavelo wathu ka liveleko ni liveleko.

Masalmo 32:7

Awe u wuthavelo wangu; Awe wa ni xayisa kuxanisekani; Awe wa ni tsanisa ngu tindando To tsanikisa ti txhatxhisako.

Masalmo 23:2

Wa ni humuta hagari ka lihunga lo nakana kambe wa ni gola a txi ni yisa ka mati o tenga.

Jeremiya 13:16

Dhumisani Mkoma, Txizimu txanu, na ku si se maha txidema, mikondo yanu yi si se humbwa mimangoni ko phuma; mi txi ngadi mi verela liwoningo a na li phemberusa li maha mtsudi wa kufa, ni txidema txo phindeletisa kuphuma.

Jeremiya 23:1

Dikhombo ka vadyisi va va onhako, ni kuhangalasa tinvuta ta wudyiselo wangu, kuwomba Mkoma.

Jeremiya 33:12

Mkoma wa Mabutho a Tiyimbi a khene: Ka wuwa wukhalo wu nga maha txiwula, wu singako ni m'thu hambi txihari, ni ka otshe madhoropa a wona, ku ngadi ku txi na vaho wukhalo wa vadyisi, ava va mahako ti to sifuyo sawe si txi zumba ka wona.

Ezekhiyele 13:10

Ti komba taku ina, tikomba taku va xenga vathu vangu, va txi kha vona: Kuthuthile, na ku si nga ni kuthutha; se mmwani a aka diseta ngu ndope, kambe vamwani va txi di kopola ngu txitsowo,

Ezekhiyele 34:15

Ni na dyisa tinvuta tangu, kambe ni na ti maha ti humula, kuwomba Mkoma Txizimu.

Ezekhiyele 34:16

Ni na tsimbila ni lava yile yo mwalala, kambe ni na wuyisa yile yo penga, ni txi tsanisa yile yo khudukiswa, ni kuthuma yile yo lwala; aniko ayile yo ena ni yile ya mtamo ni na ti khundumusa; tona ni na ti dyisa ngu wululamo.

Isaya 1:3

Homu ya ziva nyamne wa yona, ni mbongola ya wu ziva mkawu wa nyamne wa yona; aniko Israyeli kha zivi txilo, vathu vangu kha va pfisisi txilo.