Jeremiya 49:5 - Bhiblia Yo Sawuleka

⁵ I mani a nota ni wukela kani? Wona ti taku ni na tisa kuthava txitimwi kwako, kuwomba Mkoma wa Mabutho a Tiyimbi, ka votshe va va nga kurandela; mi na tshotshwa hahanze, mmweyo ni mmweyo a na lava kuthangela, kha ku nga ni wu a no tsanisa vamwani.

Jeremiya 49:5 Referans Kwoze

Jeremiya 49:29

Va na hamdwa, matenda awe, sifuyo sawe, mijiyo yawe, ni siya sawe, va na honyolwa makameli awe; va na va mahela diguwa: Kuho kuthava ngu ka otshe madhawa!

Jeremiya 46:5

“Ti mahisa kutxani kuve dhudhumela, ve tshumelela msana kani?” Tindena tawe ti pekilwe, “ta tutuma, kha ti woni ni msana, kuthava kuho ka otshe madhawa, kuwomba Mkoma.

Amosi 4:3

Mi na huma ngu lisoko, mmweyo ngu mmweyo, ni ya mi mirinza Hermoni, kuwomba Mkoma.

Jeremiya 20:4

Nguko Mkoma a khene: “Ni na kumaha txidhukiso txako upune, ni txa maxaka ako otshe; vona va na dawa ngu matxhari a valala vawe, awe wutumbu u na ti wona. Ni na ningela dotshe ditiko da Judha manzani ka mfumeli wa Bhabhilona, a na va yisa kuñolwani Bhabhilona, e va daya ngu ditxhari.

Jeremiya 15:8

Tinoni tawe ti engetekelani kupinda mtxhefa wa linene. Ni nehile mlovisi wu a dayako vamame va mazambi ni mitshikari. Ngu txidhukisa ni rumete txitimwi kwawe kuxaniseka ni kuthava.

Isaya 16:3

Teka wudhota, hi mahele wululamo, se veka mtsudi wako ni mitshikari wu txi nga wusiku; sisa vale vo tovelwa, u nga ningele vale va tutumako.

Mavingu 28:1

Vaonhi va thava na va sa tutumiswa ngu m'thu; aniko ni wihi wo lulama, a thembekile kufana ni txingonyamwana.

Jobe 15:21

Diguwa da tihuwa di tinzeveni kwakwe; hambi mu ko thutha, wata kwakwe mxaseli.

2 Vafumeli 19:7

Wona ati to ni na thela moya kwakwe, se ene a na pfa diguwa, a na tshumelela ditikoni kwakwe; ngu ditxhari ni na mmaha ewa ditikoni kwakwe.

Joxuwa 2:9

Se a txi ya khene ka vavamna vale: “Na tiziva ti to Mkoma a mi ningile ditiko diya, ni ti to kuthisa kwanu ku txitimwi kwathu, niku votshe vaaki va ditiko va gumile mtamo masoni kwanu.

Jeremiya 16:16

“Ni na dhana vakukuti vavangi, kuwomba Mkoma: Va na va ndinda; ni na dhana vaxoti votala, va na va xota mimangoni kotshe, ni ka simangwana, ni ka totshe tiphako ta marigwini.

Sidilo 4:15

Va ti tshumetela vathu va txi kha vona: “Khukhani! Mi nyete! Khukhani, khukhani, mi nga hi khuteteni!” Se va hindukile va tendeleki ni valuveli; hambi va matiko va ti ti: “Vathu vava va nge sikoti kuzumba hagari kwathu.”

Jeremiya 6:25

Mi nga yeni thembweni hambi kutsimbila tinzilani; nguko ditxhari da mlala diho konemo da dhukisela ka otshe madhawa.