Jeremiya 44:16 - Bhiblia Yo Sawuleka

¹⁶ Kasi ngu dipswi di u nga hi zivisa ngu ditina da Mkoma, kha hi na mbi kuxonipha awe;

Jeremiya 44:16 Referans Kwoze

Luka 19:27

Se valala vangu, ava va nga mbi ti lava ku ni va fuma, va tiseni hawa, mi va daya masoni kwangu.’ ”

Luka 19:14

Aniko vathu va ditiko dakwe va ti mu vengela, ve ruma mitumi msana kwakwe, kuya womba tito: ‘Kha hi ti lavi kufumwa ngu m'thu wuwa.’ ”

Dhaniyeli 3:15

Se konkuwa koko, mi txi lava kuhuluka, mbimo yi mi no pfa diguwa da mpundu, ni sitende ni tingoma ni makhombela ni titshodi, ni wa totshe tixaka ta sivetaveta, khizamani mi khozela txithombe txile ni nga txi maha, mi na va mi txi maha kwati; aniko ngako mi si txi khozeli, mi na rinzwa ka mbimo yoneyo, mndani ka txikho txa mndilo wu wu turako ngutu; se ngu txihi Txizimu txi nga sikotako ku mi txhatxhisa manzani kwangu kani?

Jeremiya 38:4

Sekoko vathangeli va to gela mfumeli va txi kha vona: Awuwa m'thu a na dawe, nguko wa rera mawoko a tindena ti ti nga sala ka diya didhoropa, ni mawoko a votshe vathu ngu ku va gela timhaka to nga tiya; m'thu wuwa kha xuveli wunene amu ka ditiko diya, aniko a di xuvela makhombo.

Jeremiya 18:18

Sekoko va to kha vona: “Ngonani hi ta maha txikungo txo wukela Jeremiya; nguko vaphaxeli kha va na mbi tandeka ku hi ninga m'layo, hambi txhari ku hi ninga wusungukati, hambi vaprofeti ku hi ninga dipswi. Ngonani hi na ya muhika ngu tidimi tathu, hi si khataleli timhaka takwe.”

Jeremiya 11:10

Va tshumelete sionhoni ka vakokwani vawe, va va nga lamba kuengisa timhaka tangu. Va londetete simwani sizimu, ve si khozela. Nyumba ya ka Israyeli ni nyumba ya ka Judha ti funyile txitumelelano txangu atxi ni nga txi maha ni vatate vawe.

Jeremiya 11:8

Aniko kha va engisa, hambi kuhuphuta nzeve yawe. Mmweyo ni mmweyo a to so mbetete e mwalaleka ngu kubanga ka mbilu yakwe yo biha. Nguko ni nehile txitimwi kwawe timhaka totshe ta txiya txitumelelano, txi ni nga va laya ku txi xayisa, aniko kha va txi xayisa.

Jeremiya 8:12

Ina va ni tingana ngu kumaha manyala kani? Kha va na tingana, hambi kupima ti taku nji txani kuwiswa tingana! Ngu konaho, va na wa kumweko ni va vawako, kambe va na humbwa ka mbimo ya kutsayiswa kwawe, kuwomba Mkoma.

Jeremiya 8:6

Ni riyile nzeve, ni engisela, aniko kha va wombi ditshuri; kha ngaho a hundulukako kubihani kwakwe, a txi khene: Intxani ni nga txi maha kani? Votshe va tutuma nga mahantxhi ma kuluvetelako kulwani.

Isaya 3:9

Tikhohe tawe ta va kona; va andisa sionho sawe, kufana ni Sodhoma; kha va si baramisi. Dikhombo ka mihefemulo yawe! Nguko vo ti mahela kubiha vona vapune.

Masalmo 2:3

Kambe va kha vona: “A hi funyeni makhodha awe! A hi tshotsheni kule ni nathu majoke awe!”

Eksodha 5:2

Aniko Faro a to khene: “I maniMkoma, wa ku naza ni engisa dipswi dakwe, ni leka va ka Israyeli, ve tsula kani? Kha ni m'zivi Mkoma, kambe kha ni na mbi leka va ka Israyeli ve tsula.”

1 Samuwele 8:19

Hambi keto, vathu kha va lava kuengisa dipswi da Samuwele; se va to kha vona: Ahim-him, kambe ku na ve ni mfumeli txitimwi kwathu.

Mavingu 1:24

Ani ni mi dhani, aniko anu mi lambile; nguko ni nawulutile diwoko dangu, aniko kha ka maneka wo pfisisa;

Jeremiya 13:10

Ditiko diya do biha, adi di si tumeliko kupfa mapswi angu, adi di tsimbilako ngu kubanga ka mbilu ya dona, di txi londetela simwani sizimu, di txi si thumela ni ku si khozela, di na fana ni libhandi li li si vhuniko txilo.

Jeremiya 42:13

Aniko ngako anu mi txi khanu: Kha hi na mbi zumba ka diya ditiko, mi si londisi dipswi da Mkoma, Txizimu txanu.

Jeremiya 43:2

sekoko a to womba-womba Azariya mwana Hoxaya, ni Johanani mwana Kareya, ni votshe vavamna va mabava va txi kha vona ka Jeremiya: “Awe u womba makuhu! Mkoma, Txizimu txathu, kha kurumela ku ta womba ku: Mi nga tsuleni mi txi ya luvela Egipta.

Jeremiya 44:24

Jeremiya a to engeta e womba ka votshe vathu ni ka vavasikati a txi khene: Engisani dipswi da Mkoma anu motshe va ka Judha, mi ku ditikoni ka Egipta.

Jeremiya 6:16

Mkoma a khene: Emani tinzilani, mi wonisisa; mi wotisela tinzila ta kale, mi txi khanu: Kasi nzila ya yinene ngu yihi kani? Sekoko, tsimbilani ngu yona. Mi na mana kuhumula ka mihefemulo yanu. Aniko vona va to xamula, va txi kha vona: Kha hi tumeli kutsimbila ngu yona.

Jeremiya 44:25

Mkoma wa Mabutho a Tiyimbi, Txizimu txa Israyeli, a womba tiya: Anu ni vasikati vanu kha ma womba dwe ngu txisofu txanu, aniko kambe mi ti mahile ngu manza anu, mi txi khanu: Ngu ditshuri hi na maha ati hi nga thembisa, ta kuhisela dibaselo Mfumeli wa txisikati wa Nzumani, ni ku mninga miphaxo; ngu ditshuri mi tsanisile sixambanyo sanu, kambe ngu ditshuri mi mahile sixambanyo sanu.