Jeremiya 44:10 - Bhiblia Yo Sawuleka

¹⁰ Kha mi ti soli kala ni nyamsi kuwa, kha mi kombi txithavo, kha ma tsimbila ngu milayo yangu ni sileleto sangu, ni nga si veka masoni kwanu ni ka vatate vanu.

Jeremiya 44:10 Referans Kwoze

Mavingu 28:14

A katekile m'thu wule a simamisako ni txithavo; aniko awule a bangisako mbilu yakwe, a na gwitisa ku wa kubihani.

Mtuletelo 15:4

Mkoma, i mani a no mbi thava ni kupfalisa ditina dako, kani? Ina! Ngawe dwe u ku msawuleki! Yotshe mifumo yi nata khizama masoni kwako, nguko mithumo yako ya kululama yi ha kubasani.”

1 Pedro 5:6

Ngu konaho, ti vekeni hahatshi ka diwoko da mtamo, da Txizimu, kasi ku txona, txi nata mi guleta ka mbimo yi yi lavekako.

Jeremiya 8:12

Ina va ni tingana ngu kumaha manyala kani? Kha va na tingana, hambi kupima ti taku nji txani kuwiswa tingana! Ngu konaho, va na wa kumweko ni va vawako, kambe va na humbwa ka mbimo ya kutsayiswa kwawe, kuwomba Mkoma.

Varoma 11:20

Ngu txona; ma phatutwe ngu ku ambi kholwa; se awe u tsani ngu mhaka ya kukholwa, u nga ti kulise, aniko thava!

Luka 23:40

Aniko awule mmwani a to teka dipswi a txi mu kawuka, a txi khene: “Khu xoniphi Txizimu, hambiko nawe u manekako u di kona kuabaniswani kumweko nayo, kani?

Matewu 27:54

Sekoko, mthangeli wa dizana, ni vale yi nga ti navo ve woneleta Jesu, ngako va di woni kuzinginikela ka mafu ni timwani ti nga humelela, va to dhuka, va txi kha vona: “Kha ditshuri awu i ti Mwanana wa Txizimu!”

Malakiya 4:2

Aniko kwanu anu mi thavako ditina dangu, ku na huma ditambo da wululamo, se wuhulukisi wu na va hahatshi ka tibhapi ta dona; kambe mi na huma mi txi ndaka-ndaka ku nga marole hahanze ka txibala.

Ezekhiyele 9:4

Se Mkoma a to khene kwakwe: Tsimbila ngu hagari ka didhoropa, ngu hagari ka Jerusalema, u veka sikombiso ka timbanza ta vavamna vale va ku ni mahika, va dilako, ngu mhaka ya otshe manyala ale ma mahekako hagari ka didhoropa.

Jeremiya 36:24

Mfumeli ni sithumi sakwe ngako va ti pfite timhaka tiya, kha va thava, kambe kha va bhandelela simaha sawe,

Jeremiya 10:7

Awe Mfumeli wa matiko, i mani asi ku thaviko kani? U fanete kuthavwa, nguko hagari ka totshe titxhari ta vamatiko, ni ka mifumo yawe yotshe, lambi, khangaho wu a fananako ni nawe.

Isaya 66:2

Nguko dianza dangu di mahile sotshe simaho siya, se sotshe simaha siya si to mahwa, kuwomba Mkoma; aniko wonani awu ni no muwona: Ka txisiwana, ni wule wo xaniseka moyani, kambe a dhudhumelako masoni ka dipswi dangu.

Isaya 57:15

Nguko a womba tona eto Nyatxitimwi, wa Kuthaviseka, a zumbako kupindukani, eyo ditina dakwe i ku Kusawuleka: Ni zumba ka wukhalo wo guleka ni kusawuleka, kumweko ni kuxaniseka, ni kukarateka moyani, kasi kuwusa moya wa vale vo karateka, ni kuwusa timbilu ta vaxaniseki.

Mavingu 16:6

Wubihi wu thaviswa ngu wumbilu ni ditshuri; kuthava Mkoma, ka hulukisa vathu kubihani.

Mavingu 14:16

Txhari ya thava yi vayilela to biha, aniko txiphukuphuku txa henya txi ti maha txo tsana.

Mavingu 8:13

Kuthava Mkoma ngu venga wubihi; na venga kutikulisa ni mahanyelo o biha, ni nzila ya walo, ni txisofu txo ruketela.

Masalmo 51:17

Mhamba yi yi tsakisako Txizimu ngu kupandiseka ka mbilu. Awe Txizimu khu nyenyi mbilu yi yi pandisekako ni kutiveka hahatshi.

Masalmo 34:18

Mkoma a hafuhi ka vale va ku kupandisekani ka mbilu; ene wa hanyisa avale va si swiko va di ni kuthemba.

2 Makronika 34:27

A ku u nga dhukiswa mbiluni kwako, u ti veka hahatshi masoni ka Txizimu, mbimo yi u nga pfa mapswi akwe madingano ni wukhalo wuwa ni vathu va kona, u txi ti veka hahatshi, u vharulela ni syambalo sako, u dila masoni kwangu, ani ni ku pfite, kuwomba Mkoma.

2 Makronika 33:19

Se mkombelo wakwe, ni ti Txizimu txi nga wu amukelisa tona, ni sotshe sionho sakwe, ni wubihi wakwe, ni makhalo o guleka ale a nga aka e veka ni sithombe sawe so vatwa, na a sanzi kutiveka hahatshi, wonani ti to totshe ti bhatwe ka mabhuku a vahuti.

2 Makronika 33:12

Se ene a di pandisekile, a to khongela masoni ka Mkoma Txizimu txakwe, e ti veka hahatshi ngutu masoni ka Txizimu txa vatate vakwe,

2 Makronika 32:26

Se Ezekhiya a to ti sola e ti veka hahatshi ngu mhaka ya kanu ya kutikulisa ka mbilu yakwe kumweko ni vathu va Jerusalema; se kuhenya ka hombe ka Mkoma ku yata txitimwi kwawe, ka masiku a Ezekhiya.

2 Vafumeli 22:19

Ngako mbilu yako yi nga rawula, u ti namisa masoni ka Mkoma, mbimo yile u nga engisa ni txi henya ngu wukhalo wuwa, ni vazumbi va kona, va ti dingana kufuviswa ni kuve txiruko, u vharulete syambalo sako, u dite masoni kwangu, kambe ni ku engisile, kuwomba Mkoma.

1 Vafumeli 21:29

Khwa ti wona taku Akabe wa ti namisa masoni kwangu kani? Ngako koko a ti namisako masoni kwangu, kha ni na mbi tisa kubiha kuwa ka masiku a kuhanya kwakwe, aniko ni na tisa wubihi wuwa ka masiku a kuhanya ka mwanana wakwe, nyumbani kwakwe.

Eksodha 10:3

Se Mosi ni Aroni, va yite kambe ka Faro, va txi ya m'gela tiya: “Mkoma, Txizimu txa Vahebheru, a khene: U na gwita mbimo muni kukaneta u si ti veki hahatshi masoni kwangu kani? Leka vathu vangu ve huma, kasi va txi ya ni khozela.

Eksodha 9:30

Kambe na tiziva ti to awe ni mahalamu ako, kha mi nzi kuva ni txithavo ka Mkoma Txizimu.”

Eksodha 9:17

Awe u ngadi u txi ti guleta u txi wukela vathu vangu, u txi lamba ku va leka ve tsula kani?

Masalmo 78:10

kha va xonipha txitumelelano txawe ni Txizimu kambe va lambile kuvekisa mlayo wa txona;

Jeremiya 6:15

Ina va pfite tingana ngako va di mahile manyala kani? Kota, kha va pfa tingana. Kambe kha va zivi ku wa tingana. Ngu konaho, va na wa kumweko ni vamwani; va na wa ngu mbimo yi ni va tsayisako, kuwomba Mkoma.

Jeremiya 26:4

Va gele, u txi khawe: Mkoma a khene: Ngako mi si engisi mi txi tsimbila ngu mlayo wangu, awu ni nga mi ninga,

Jeremiya 32:23

va tota ve ta di khozisa, aniko kha va engisa dipswi dako, hambi kutsimbila ngu mlayo wako; ni totshe ti u nga ti va layile ku ti maha, kha va ti maha; uza u txi va humisela otshe makhombo awa.

Jeremiya 44:23

Ti komba ku mi hisile dibaselo, mi onhete Mkoma, kambe kha ma thava dipswi da Mkoma, kha ma tsimbila ngu sileleto ni wufakazi wakwe, mi humeletwe ngu dikhombo diya, nga ti ti wonekisako tona ni ka diya ditshiku.

Isaya 42:24

I mani a nga ningela Jakobe kuva e handwa, ni Israyeli manzani ka makhamba kani? Ina hi nga Mkoma wule va nga muonhela, wule va nga lamba kutsimbila ngu nzila yakwe, va si engisi mlayo wakwe kani?

Jeremiya 5:3

O Mkoma, ina maso ako kha ma vereli tinene kani? Awe u va pekile, aniko kha vapfa kupanda. U va lovisile, aniko kha va tumela kulaywa. Va bangisile tikhohe tawe kupinda ni dirigwi Va lambile kuhunduluka.