Jeremiya 4:27 - Bhiblia Yo Sawuleka

²⁷ Nguko Mkoma a khene: “Ditiko dotshe di na hasamulwa, aniko na mbi di hetisela magwito.

Jeremiya 4:27 Referans Kwoze

Jeremiya 46:28

U nga thave, awe txithumi txangu Jakobe, kuwomba Mkoma, nguko ni ni nawe; nguko ni na heta otshe matiko ale ni nga kutshotsha ka ona; aniko awe kha ni na mbi kuhetisa, ni na kupeka ngu kupimela, kha ni na mbi leka ku kutsayisa.

Jeremiya 5:18

Hambi ti di ngeto, kuwomba Mkoma. Kha ni na mbi ku fuvisela magwito keyo masiku!

Jeremiya 5:10

Kwelani magumani kwawe, mi txi ma khundumusela aniko mi nga ma heteleni magwito. Thaviselani tidhavi tawe nguko hi nga ta Mkoma.

Jeremiya 30:11

Nguko ani ni kumweko ni nawe, kuva ni txi kuhanyisa, kuwomba Mkoma. Nguko ni na heta otshe matiko awa ni nga ti ku hangalasile ka ona; aniko awe kha ni na mbi kuhetisa; ni na kulaya ngu wululamo, kha ni sikoti ku kuleka u sa pekwa.

Ezekhiyele 11:13

Se ku to maheka taku, ni txi ngadi ni profeta, a txi fa Palatiya, mwana Bhenaya; sekoko ni to wa ngu khohe, ni dila ngu dipswi da hombe, ni txi khani: Yowe! Awe Mkoma Txizimu! U lava kuhetisa miboti ya Israyeli kani?

Levhi 26:44

Hambi ka toneto, ngako va di payutwe veya maneka ditikoni ka valala vawe, kha ni na mbi va leka, kha ni na mbi va tsukula aha koza ni txi va fuvisa, ni divala txitumelelano txi ni nga txi maha navo, nguko ani ngani Mkoma, Txizimu txawe.

Ezekhiyele 33:28

Se ni na maha ti taku ditiko di maha dirumbi, ni txixamaliso, kambe wu na hunguleka mtamo wa kutikulisa kwakwe; mimango ya ka Israyeli yi na maha marumbi do gwita, aha ko ni wammweyo kha na mbi pinda ngu ka yona.

Ezekhiyele 6:14

Se ni na guleta dianza dangu txitimwi kwawe, ni savalisa mafu awe, ma txi maha txisapa ngutu kupinda txiwula txa didhawa da Ribhila, kotshe mu va zumbako kona; se va na tiziva ti to ani ngani Mkoma.

Jeremiya 18:16

Eko va maha ti to ditiko dawe diva txixamaliso, ni txiruko ngu ha ku si gwitiko. Ti taku ni wuhi a pindako ngu kona e xamala, e zinginisa msungo wakwe.

Jeremiya 7:34

Madhoropani ka Judha, ni mu magondoni ka Jerusalema, ni na malata dipswi da kuzumbiseka, ni dipswi da litsako, ni dipswi da mteki, ni dipswi da mtekiwa; nguko ditiko di na maha dirumbi.

Jeremiya 4:7

Ngonyamo yi humile txigotoni ka yona, ni m'hasamuli wa matiko, a khukhile wukhaloni kwakwe kasi kuhangalasa ditiko dako, a hasamula a madhoropa ako ti taku ku si ngadi kuakwa ka ona.

Isaya 24:1

Wonani taku Mkoma wa maha ti to mafu meva txiwula, kambe wa ma kona, wa hindula zumbelo ya ona, e hangalasa vaaki va ona.

2 Makronika 36:21

kasiku txi na tatiseka dipswi di Mkoma, a di womba ngu txisofu txa mprofeti Jeremiya, kala ku ditiko di txi titsakela ngu Masabbata a dona; di humula mbimo yotshe, kala mu ka mtxhanu wa magumi ni mambidi wa malembe.

Nehemiya 9:31

Kambe, ngu mhaka ya wunene wako wa hombe, khwa va haxula, hambi ku va leka; nguko awe u Txizimu txa wunene ni wumbilu.

Jeremiya 4:20

Kuhuwelela ngu kuloviswa txitimwi ka kulovisa, nguko ditiko dotshe di hasamutwe. Matenda angu ma khundumutwe ngu txidhukisa, ni midhuti yangu ngu mbimwanyana.

Jeremiya 9:11

Ni na maha ngu Jerusalema mimumbu ya marigwi, dizumbo da maxolwa; madhoropa a ka Judha ni na ma maha marumbi, ku si vi ni m'thu.

Jeremiya 25:11

Dotshe diya ditiko di na va marumbi ni txidiwukiso; ni matiko awa, ma na thumela mfumeli wa Bhabhilona, mndani ka mtxhanu wa magumi ni magumi mambidi a malembe.

Jeremiya 44:6

Ku thekete koko, kuhenya kwangu ku txi tura txitimwi ka madhoropa a Judha, ni mu ka tinzila ta hombe ta Jerusalema; ona ma to maneka i ti siwula ni sihala nga ti ma wonekisako tona nyamsi.

Ezekhiyele 20:17

Hambi keto diso dangu di va divalete, ni si va dayi, hambi ku va heta amu txiwulani.

Levhi 26:31

Madhoropa anu ni na ma maha marumbi, ni khundumusela makhalo anu o nyenyeza, na mbiswa ni txi tsakela mafura a miphaxo yanu, o bhumula.

Isaya 17:6

Hambi keto, a na salelwa ngu miboti yokari, nga mndonga wa muolivha, wu di zuzilwe: Wu salako ni mihando yimbidi, mwendo yiraru, titshangwe ka madhavi, ni mune mwendo mtxhanu ka madhavi o nava ngutu, a mndonga wo veleka ngutu, kuwomba Mkoma, Txizimu txa Israyeli.

Sidilo 2:7

Mkoma a lekile txiluvelo txakwe a tsukute ni wukhalo wakwe wo sawuleka, a ningete manzani ka valala maguma a tinyumba tawe ta wukoma; va pekile huwa Nyumbani ka Mkoma nga disthiku da msengeletano wa mpipi.

Zefaniya 1:18

Hambi silivhela yawe mwendo nzalama yawe, kha si na mbi sikota ku va hulukisa, ka ditshiku da kuhenya ka Mkoma, aniko ngu mndilo wa kuhiseka kwakwe, otshe mafu awa ma na fuviswa, nguko kha ditshuri a na lovisa votshe vazumbi va ha mafuni ngu txidhukisa.