Jeremiya 4:19 - Bhiblia Yo Sawuleka

¹⁹ Mbiluni kwangu, mbiluni kwangu! Ni ni kupandiseka mbiluni kwangu! Mbilu yangu ya bhibhika-bhibhika, kha ni sikoti kumalala; nguko dihika dangu di pfite txiwungulati txa mpundu, ni tihuwa ta tiyimbi.

Jeremiya 4:19 Referans Kwoze

Habhakuki 3:16

Ni di ti engisile ani, mndani kwangu kudhuka, ngu dipswi dakwe txisofu txangu txi dhudhumete; kuwulete kusina marambuni kwangu, se ni dhudhumela mndani kwangu; na humula ani ka ditshiku do pandiseka, ngako ni txi nata lwa ni vathu vale va nota hi hoxota.

Isaya 22:4

Ngu toneto, ni khani: Mi nga ni woneteleni, ni na dila ngu txiviti; mi nga karaleni ngu ku ni thavelela, ngu kuhaxulwa ka mwanana wa muhorana wa vathu vangu.

Isaya 16:11

Ngu mhaka yeto, masembe angu ma tuma, ngu mhaka ya Mowabhi, kufana ni txitende, ni mndani kwangu, ngu mhaka ya Kiri-Heresi.

Jeremiya 9:10

Ni na theketa mirongo ni peka huwa ngu mhaka ya mimango, ni dilela wudyiseloni ka txiwula, nguko ku hyite; kha ku ngadi ni m'thu a pindako ngu kona, hambi kupfa kubhoma ka tihomu; sinyana sa nzuma ni sihari si tutumile, si tsute.

Jeremiya 9:1

I ti ku msungo wangu ka Txizimu wo hinduka wu ve mati, ni maso angu kuva txibuka txa mirongo, sekoko ni ndi na va dila wusiku ni mitshikari, vafi va mwanana wa txisikati wa vathu vangu!

Isaya 21:3

Ngu toneto, txiwunu txangu txi taletwe ngu kupanda ka hombe; kupandiseka ku ni ñote ku nga kupandiseka ka wule a lumwako; na xaniseka ngutu, aha ko kha ni sikoti ni kuengisa, ni dhukile ngutu, kha ni sikoti ni kuwona.

Vagalatiya 4:19

Vanavangu, na pandiseka ta tinene ngu nganu, kufana ni wamsikati wu a lumwako ngu kulava kuhefemula, kala kuza txiemo txa Kristu txi woneka hagari kwanu.

Dhaniyeli 8:27

Se ani Dhaniyeli, ni to guma mtamo, ni lwala masiku okari; sekoko ni to wuka ni maha mithumo ya mfumeli; kambe ni xamalisilwe ngu mhaka ya txiwoniso, aniko ku si nga ni m'thu wu a txi pfisisako.

Dhaniyeli 7:15

Se ngu kwangu, ani Dhaniyeli, moya wangu wu to xaniseka mndani kwangu, ni siwoniso sangu si to ni xamalisa.

Isaya 15:5

Mbilu yangu ya dila ngu mhaka ya Mowabhi; vahombe vawe va tutumile veya Zowari, kufana ni dirole da malembe mararu, nguko va dila va txi kwelela Luwiti, nguko, nzilani ka Horhonayi, va wusa kudila ka hombe ngutu.

Masalmo 116:7

Moya wangu, themba Mkoma, nguko Mkoma a kukatekisile.

Varoma 10:1

Vanathu, kuxuva ka mbilu yangu ni mikombelo yi ni va mahelako ka Txizimu vanana va ka Israyeli, ngu ti to ve hanyiswa.

Amosi 3:6

Ina ku nga pekwa mpundu didhoropani vathu va si dhudhumeli ngu kuthava kani? Ina ku nga humelela wubihi didhoropani, na wu sa mahwa ngu Mkoma kani?

Dhaniyeli 7:28

Txiwoniso txi gwitete hawa, se ngu kwangu ani Dhaniyeli, mapimo angu ma to ni xamalisa ngutu, ni khohe yangu yi to txitxa; aniko ni to veka timhaka keto mbiluni kwangu.

Sidilo 2:11

Maso angu ma karate ngu mirongo, moya wangu wu ha kukaratekani. Ni gumile mtamo ngu kupandiseka ngu mhaka ya kuloviswa muhorana wa vathu vangu; nguko va tsivala vafana ni timenzani to mama, magondoni ka didhoropa.

Sidilo 1:16

Se kona kuwa, ni dila ngu totshe ti ti nga ni humelela; maso angu kha ma emi kuhuma mirongo; awule a nga ti fanete ku ni malatela ni ku ni tsanisa a maneka kule ngutu ni nani; vanana vangu va hangalasilwe, nguko mlala a ni xute.

Jeremiya 23:9

Xungetano ngu vaprofeti, mbilu yangu yi bhandekile; Marambu angu otshe ma dekadeka; no nga m'thu wu a nga leva, mwendo wu a nga leviswa ngu vhinya, ngu mhaka ya Mkoma ni mahungu akwe o sawuleka.

Jeremiya 20:9

Sekoko ani ni ti khani: Kha ni na mbi mu alakanya, hambi kuwombawomba ngu ditina dakwe; aniko eto mbiluni kwangu ti to nga mndilo wo tura, na wu di tsivetwe marambuni kwangu; kambe ni rerekile ngu kuxaniseka se kha ni sikoti.

Jeremiya 13:17

Aniko mi si engisi, ni na dila txihunjani ngu mhaka ya wugwili wanu, maso angu ma na dila ngutu, me humisa mirongo, nguko vathu va Mkoma va yiswa wukarawani.

Jeremiya 4:21

Ni na wu wona mbimo muni m'jeke, ni kupfa kutuma ka mpundu kani?

Jeremiya 4:5

Zivisani kona Judha mi peka huwa kona Jerusalema, mi txi khanu: Vetani mipundu ditikoni, mi kwangula, mi txi khanu: Tshanganani mi tutumela madhoropani ka mikhokhola.

Masalmo 146:1

DhumisaMkoma! Awe moya wangu, dhumisa Mkoma!

Masalmo 119:136

Mirongo yangu ya khulunga nga mnambo, nguko mlayo wako kha wu xoniphwi.

Masalmo 119:53

Na pandiseka mbiluni kwangu, ngako ni txi wona vabihi va si khatali ngu milayo yako.

Masalmo 103:1

Ni lava kudhumisa Mkoma ngu wotshe moya wangu; ngu yotshe mbilu yangu ni lava kudhumisa Txizimu txo sawuleka.

Masalmo 16:2

Ni wombile ka Mkoma ni txi khani: Awe ngawe Mkoma wangu, hahanze kwako kuwalo tximwani txi ni tsakisako.

Valamuli 5:21

Txinambwana txa Kixoni txi va kukuletile, mnambo wule wa kale, mnambo wa Kixoni. Awe moya wangu, tsimbila u di tsani!

Mitengo 10:9

Se ngako ditikoni kwanu mlala e lava ku mi lwisa, mi na veta mipundu yo mi xomisa, mi na alakanywa masoni ka Mkoma, Txizimu txanu, a na mi hulukisa manzani ka valala vanu.

Genesisi 49:6

Moya wangu wu nga wulele sikungoni kwawe, nduma yangu yi nga wuletiswe misengeletanoni kwakwe, nguko kuhenyani kwawe va dayete vavamna, ve sakana ngu kulimata misiha ya tihomu.

1 Vakorinto 14:8

Kufana ni toneto, mpundu wu txi mahwa nyamvetwe, i mani a no ti lulamisela kuya yimbini kani?

Jeremiya 6:24

Hi pfite nduma yawe, mawoko athu ma guma mtamo; hi tetwe ngu msanekera, ni kupanda nga ka wamsikati wu a lumwako.

Jeremiya 8:21

Ni karateka ngu mhaka ya txilonda txa mwanana wa txisikati wa vathu vangu, ni ni xomulo, ni ñotwe ngu kuthava.

Jeremiya 42:14

Mi txi khanu: Athu hi na tsula ditikoni ka Egipta, amu hi no mbi wona yimbi, kha hi na mbi pfa kuvetwa ka mpundu, hambi kupfa nzala ya sakudya, hi na ya zumba koneyo.

Jeremiya 49:2

Ngu toneto, mata masiku, kuwomba Mkoma, aha ni no pfalisa diguwa da yimbi ya Rama yo wukela vanana va Amoni, a na maha mmumbu wa marumbi ni makhalo ya a ma fumelako ma na hiswa ngu mndilo; Israyeli a na lumbwa ngu vale a nga txi va lumba, kuwomba Mkoma.

Jeremiya 50:22

Diguwa da kulwa diho ha mafuni, ni da kukhundumusela.

Dhaniyeli 4:19

Sekoko Dhaniyeli awule ditina dakwe i ku Bheltexezari, a to xamala, a txi dwee, ngu ora yimweyo, a txi karateka mapimoni kwakwe. Se mfumeli Nebhukodhonosori a to womba, a txi khene: “Bheltexezari, u nga karateke ngu mhaka ya mloro, hambi txhamuselo ya wona.” Bheltexezari a to xamula a txi khene: Nyamne wangu, mloro wuwa wu na wukele vale va ku nyenyako, ni txhamuselo ya wona, ka valala vako.

2 Vafumeli 4:19

A so khene ka tate wakwe: Yowe! Msungo wangu! Yowe! Msungo wangu. Tate wule a to khene ka mmweyo wa vafana: Mteke u m'heleketa ka mwamwakwe.

2 Vafumeli 8:11

Se a to mronolela a txi muwonisisa, eza ewa tingana; se m'thu wa Txizimu, a to dila.

Isaya 21:4

Mbilu yangu yi vhilukile, na dhudhumela ngu kuthava; kuswa ka ditambo ni nga ti kulava, ku ni mahile ni dhudhumela.

Jeremiya 8:18

Ni na ti thavelelisa kutxani kupandiseka kwangu kani? Mbilu yangu ya xaniseka.

Sidilo 1:20

Wona Mkoma, ati ni xanisekisako tona; moya wangu wu ha kukaratekani ngutu. Ni ha kupandisekani ka hombe ngutu, nguko ni ti lambisile ngutu. Hahanze kheya, ni dawetwe vanana ngu ditxhari; mndani kwangu ku ni lifo.