Jeremiya 33:11 - Bhiblia Yo Sawuleka

¹¹ Ku na pfala dipswi da mkulungwani ni da litsako, dipswi da mteki ni da mtekiwa, ni dipswi da va va ku kha vona: Dhumisani Mkoma wa Mabutho a Tiyimbi, nguko mnene, nguko wumbilu wakwe mbwa kala kupinduka; ni mapswi a va va nehako miningelo ya kubonga Nyumbani ka Mkoma. Nguko ni wuyisa ava va nga ñolwa ka wuwa wukhalo, va na nga mbimoni ka kale, kuwomba Mkoma.

Jeremiya 33:11 Referans Kwoze

1 Makronika 16:34

Dhumisani Mkoma, nguko mbwa mnene: Ni lirando lakwe li zumba ngu ha ku si gwitiko.

Masalmo 107:22

Phaxani timhamba ta kubonga mi txi huwelela mithumo yakwe ngu litsako.

Masalmo 107:1

Bongani Mkoma, nguko ene mnene, nguko wunene wakwe mbwa yotshe mbimo.

Masalmo 106:1

Dhumisani Mkoma! Bongani Mkoma, nguko ene mbwa mnene, nguko lirando lakwe kha li nga ni magwito.

Vahebheru 13:15

Ngu ngene ahi ningeleni yotshe mbimo mhamba yo dhumisa Txizimu, ti ti wombako m'hando wa txisofu txi txi fakazako ditina dakwe.

Isaya 51:11

Ngu kumaha keto, va na wuya vale va nga tirulwa ngu Mkoma, kambe va na tshumelela Siyoni ngu kutsaka ka hombe, ni kutsaka ka kwa mbi gwita ku nava txitimwi ka misungo yawe; va na mana kuzumbiseka ni litsako, kupandiseka ni kuketa si na tutuma.

2 Makronika 29:31

Ezekhiya a to xamula a txi khene: Konkuwa anu mi nga ti ningela ka Mkoma, tshuketani mi tisa mhamba ni miningelo ya kudhumisa, Nyumbani ka Mkoma. Se msengeletano wu to tisa mhamba ni miningelo ya kubonga, vamwani ngu kuranda kwawe, va humisile miningelo ya kuhiswa.

2 Makronika 5:13

Se votshe va ti ti veta ni kuembelela ngu dipswi dimwedo, va txi dhumisa ni kubonga Mkoma, va txi kha vona nguko mnene; nguko wunene wakwe wu zumba ngu ha ku si gwitiko, sekoko direfu dokari di to tata nyumba, Nyumba ya Mkoma.

Mtuletelo 18:23

Kutura ka dilambu kha ku na mbi ngadi ku txi woninga kwako; dipswi da mwamna ni msikati kha di na mbi ngadi di engiswa kwako, nguko vaxavisi vako i ti tinganakana ta ditiko, kambe ngu matiloti ako u kanganyisile yotshe mifumo.”

Johani 3:29

Nyamne wa msikati ngu mteki, se pheleketi ya mteki yo mu bangalata ni ku mu engisa, yi tsaka ngu kutsaka ka hombe, ngako yi txi pfa dipswi da mteki: Aliya ngu lona litsako langu, lona li hetisekile.

1 Makronika 16:8

Dhumisani Mkoma, huwelelani ditina dakwe, nuwelani simaho sakwe hagari ka vathu.

Zakariya 8:19

A womba tiya Mkoma wa Mabutho a Tiyimbi: Kutitona ka mtxima wa wumune, ni kutitona ka mtxima wa wutxhanu, ni kutitona ka wa wutxhanu ni yimbidi, ni kutitona ka mtxima wa wugumi, ku nava kunengela ni kutsaka, ni mibuso ka nyumba ya ka Judha, ngu toneto dhundani ditshuri ni kudikha.

Zefaniya 3:14

Embelela ngu kutsaka awe dihorana da Siyoni; Tsaka kambe awe Israyeli; ti tsakele u txi peka mikulungwani ngu mbilu yako yotshe, awe dihorana da Jerusalema.

Jeremiya 33:7

Ni na wuyisa va vo ñolwa va ka Judha ni Israyeli, ni na va akisa nga kale.

Jeremiya 7:34

Madhoropani ka Judha, ni mu magondoni ka Jerusalema, ni na malata dipswi da kuzumbiseka, ni dipswi da litsako, ni dipswi da mteki, ni dipswi da mtekiwa; nguko ditiko di na maha dirumbi.

Isaya 52:9

Kwangulani mi embelela, mi pfalisa kumweko, anu marumbi a Jerusalema! Nguko Mkoma a thavelete vathu vakwe, a tirute Jerusalema.

Masalmo 116:17

Ni na phaxa mhamba ya ku kudhumisa ni txi khozela ditinani ka Mkoma.

2 Makronika 7:3

Se votshe vanana va ka Israyeli, mbimo yi va nga wona ti to mndilo ni wudhumo wa Mkoma sa txhika txitimwi ka nyumba, va to khizama ve namisa tikhohe tawe ti gwesa mafu, ve khozela ni kudhumisa Mkoma, nguko mbwa mnene, ni lirando lakwe li na zumba ngu ha ku si gwitiko.

Zakariya 10:7

Se va ka Efrayime va na nga tindena, mbilu yawe yi na tsaka nga va to sela vhinya, se vanana vawe va na wona ve tsaka, timbilu tawe ti na tsakela Mkoma.

Zakariya 9:17

Nguko nga tona ti wu nga kulisa tona wunene wawe! Ni ti va nga tshurisa tona! Se fulaho yi na tshurisa majaha, ni vhinya ya yiphwa yi na tshurisa mahorana.

Jona 2:9

Aniko ani ni na kuninga miphaxo ngu dipswi do bonga, a ti ni nga xambanya ni na ti maha; kuhanyiswa kuta ngu ka Mkoma!

Jeremiya 33:26

ni na leka liveleko la Jakobe ni la Dhavhidha txithumi txangu, ti taku ni si dhuki ni teka hagari ka vanana vakwe awu a no fumela liveleko la Abrahama, Isaake ni Jakobe, nguko ni na wuyisa va vo ñolwa vawe ni txi va hawukela.

Jeremiya 25:10

Ni na malata hagari kwawe dipswi da kutsaka ni kusakana, dipswi da va va tekanako, diguwa da marigwi a txitshindo, kumweko ni liwoningo la dilambu.

Jeremiya 16:9

Nguko Mkoma wa Mabutho a Tiyimbi, Txizimu txa ka Israyeli, a khene: Wona, ti to ni na malata dipswi da kuzumbiseka, ni dipswi da litsako, dipswi da mteki, ni dipswi da wo tekwa, masoni kwanu, ka awa masiku.

Nehemiya 12:43

Ka ditshiku donedo va to maha mphaxo wa hombe, ve tsaka, nguko Txizimu txi ti ti va ningile litsako la hombe. Se vavasikati ni vanana va to tsaka ni vona. Ngu mamahelo eyo kutsaka ka Jerusalema ku to pfala kule.

Nehemiya 8:12

Sekoko, vathu votshe va to tsula veya dya ve sela, ve rumela sakudya ka vamwani, ve maha m'buso wa hombe, nguko va pfisisile mapswi ale va nga gelwa ona.

Ezra 6:22

Se va to maha m'buso wa Mapawu o mbi Tshumbelwa, mndani ka mtxhanu wa masiku ni mbambidi, ngu kutsaka, nguko Mkoma a ti va tsakisile, na kambe a ti phemberusile mbilu ya mfumeli wa Asiriya e va dhunda, ni kutsanisa manza awe ka mthumo wa Nyumba ya Txizimu, Txizimu txa ka Israyeli.

Isaya 51:3

Nguko Mkoma a na thavelela Siyoni, kambe a na thavelela otshe makhalo ale i ku marumbi, se txiwula txa kona a na txi maha txi fanana ni thembwe ya Edheni, ni txiwunda txa kona txi na fana ni thembwe ya Mkoma; kuzumbiseka ni litsako si na maneka ka m'ti wuwa, ni mithumo ya kubonga, kumweko ni dipswi da m'zeno.

2 Makronika 20:21

Josafati a to pfana ni vathu vakwe, e veka mtxawa wa vaembeleli masoni ka dibutho dakwe da yimbi, ava va nga ti ti embelela ni kudhumisa Mkoma va txi kha vona: Dhumisani Mkoma nguko lirando lakwe li zumba ngu ha ku si gwitiko.

Isaya 35:10

Se ava va nga tirulwa va Mkoma, va na tshumela veya Siyoni ngu kutsaka; kambe kutsaka ko mbi gwita ku nava txitimwi ka misungo yawe; va na mana mathomo ni litsako, kambe kupandiseka kwawe ni miketo si na tutuma.

Jeremiya 17:26

Va nata ngu madhoropani a ka Judha, ni madhawani ka Jerusalema, ni ditikoni ka Bhenjamini, ni tibalani, ni mimangoni, ni wulambwe, ve neha miningelo yo hiswa ni miphaxo, ni miningelo ya mpupu, ni dibaselo, ni miningelo ya kudhunda amu Nyumbani ka Mkoma.

Jeremiya 30:19

Ku na huma ngu konemo kudhunda ni mapswi a litsako; ni na va andisa, va si hunguleki; ni na va kulisa, kha va na mbiswa ve kanyiswa.

Jeremiya 32:44

Va na xava tithembwe ngu male, ve bhala mapapilo a mxavo, ve ma tsanisa, ve dhana tifakazi, amu ditikoni ka Bhenjamini ni madhawani ka Jerusalema, ni madhoropani ka Judha, ni ka madhoropa a mimangoni, ni madhoropa a tibalani, ni madhoropani ka mswa-ditambo; nguko ni na wuyisa vo ñolwa, kuwomba Mkoma.

Nahume 1:7

Mkoma mnene, dikhokhola ka ditshiku da xomulo, kambe wa va ziva ava va thembako kwakwe.

Masalmo 85:7

Hi kombe awe Mkoma, wumbilu wako u hi ninga kuhanyisa kwako!

Masalmo 147:13

Ene wa tsanisa sikhoto sa matimba ako e katekisa vanana vako va ku mndani kwako.

Isaya 52:8

Engisani huwa ya vawoneleli vako! Vona va guleta mapswi, ve embelela kumweko, nguko ngu maso awe va na muwona, mbimo yile Mkoma a no tshumelela Siyoni.

Jeremiya 29:14

Ni na manwa ngu nganu, kuwomba Mkoma, ni na tshumeta va va nga ñolwa, ni na mi sengeleta ngu ka otshe matiko, ni ka otshe madhawa, awa ni nga mi hangalasa ka ona, kuwomba Mkoma; ni na tshumela ni txi mi wuyisa ka wukhalo wu ni nga mi tutumisa ka wona, mi txi ya wukhumbini.

Jeremiya 30:3

Nguko ma ngadi ma txi ta masiku, kuwomba Mkoma, ayo ni no tshumeta ngu ona ava vo sungwa, i ku Israyeli ni Judha, kuwomba Mkoma. Ni na va wuyisa ditikoni mu ni nga ha vakokwani vawe, va na di fumela.

Amosi 9:14

Ni na thavisa wukhumbi wa vathu vangu va ka Israyeli, kambe va na aketa madhoropa o xaselwa, se va na zumba ka ona, ve phaya mivhinya, ve sela vhinya ya kona, ve phaya mipeto ya mindonga, ni kudya mihando ya kona.