Jeremiya 31:6 - Bhiblia Yo Sawuleka

⁶ Nguko ku na hoka ditshiku dile vawoneleli va mimangoni ka Efrayime va no dhana ngu dona, va txi kha vona: Khukhani, ahiyeni Siyoni ka Mkoma, Txizimu txathu.

Jeremiya 31:6 Referans Kwoze

Jeremiya 50:19

Israyeli ni na mmaha e tshumelela dizumboni kwakwe, a na dyisela Karmeli ni Bhasani; moya wakwe wu na khuriswa kona Efrayime ni Gileyadhi.

Hoseya 9:8

Efrayime i ti muwoneleli kumweko ni Txizimu txangu, kambe mprofeti a fana ni litshenga la mxoti wa sinyana ka totshe tinzila takwe, m'lala nyumbani ka Txizimu txakwe.

Hoseya 1:11

Se vanana va ka Judha ni vanana va ka Israyeli votshe va na sengeletana, ve ti emisela mthangeli mmweyo dwe, ve huma ditikoni; nguko di na va da hombe ditshiku da Jezireyeli.

Ezekhiyele 33:2

Awe mwanana wa m'thu, womba-womba ka vanana va vathu vanu, u txi khawe kwawe: Ngako ni txi tisa ditxhari txitimwi ka mafu, se vathu va ditiko ve teka wamwamna wokari hagari kwawe, ve mmaha muwoneleli wawe;

Ezekhiyele 3:17

Awe mwanana wa m'thu, ni kuvekile kuve muwoneleli wa nyumba ya ka Israyeli; se awe u na pfa dipswi da txisofu txangu, se u na va txharihisa wukhaloni kwangu.

Jeremiya 6:17

Ni vekile vawoneleli hagari kwanu, ni txi khani: Pfanani kutuma ka mpundu. Aniko va xamute, va txi khani: Kha hi na mbi ku engisa.

Isaya 62:6

O Jerusalema! Ni vekile vawoneleli txitimwi ka maguma ako, ava va no mbi malala wusiku ni mitshikari; o anu mi khumbukako Mkoma, mi nga thukeni mi malala,

Isaya 40:9

Awe u m'zivisi wa mahungu amanene ka Siyoni, kwela ka mmango wo guleka. Awe u m'zivisi wa mahungu amanene ka Jerusalema, guleta dipswi ngu mtamo; di gulete, u nga thave, womba ka madhoropa a ka Judha, u txi khawe: Wonani, nditxe hawa Txizimu txanu.

2 Makronika 13:4

Abhiya a to ema txitimwi ka mmango wa Zemarime, wu ku mimangoni ka Efrayime, a txi khene: Ni engiseni awe Jerobhowamu ni nanu motshenu va ka Israyeli!

Ezra 1:5

Sekoko vathangeli va vatate va miti ya tihunzu ta ka Judha ni Bhenjamini, ni vaphaxeli, ni Valevhi, ni votshe vale Moya wa Txizimu wu nga va wusa, va to ya kuya aka Nyumba ya Mkoma, wu a ku Jerusalema.

Masalmo 84:5

Va katekile vale va manako kuvhunwa ngu ngawe, avale va navelako kutsimbila kala mmangoni ka Siyoni.

Jeremiya 3:14

Wuyani, anu vanana vo tiwuka, kuwomba Mkoma, nguko ni nyamne wanu. Ni na teka mmweyo ka m'ti ni m'ti, ni vambidi ka lihunzu ni lihunzu, mi siya Siyoni.

Jeremiya 31:12

Vanata va txi embelela ngu litsako aniya mmangoni ka Siyoni, ve tutumela wunene wa Mkoma, amu ka fulaho, ni vhinya, ni mafura, amu ka tihambana ni marole, dihika dawe di na fana ni thembwe yi yi nga nakaniswa, kha va na mbiswa ve dhindirika.

Isaya 27:13

Se ku na maheka ka ditshiku dile, taku ku na vetwa mpundu wa hombe, se vale va nga ti mwalate ditikoni ka Asiriya, ni vale va nga tsuliswa ditikoni ka Egipta, va na tshumela ve wuya, ve ta khozela Mkoma, mmangoni ko sawuleka, kona Jerusalema.