Jeremiya 31:25 - Bhiblia Yo Sawuleka

²⁵ Nguko ni tsakisile muhefemulo wo karala, ni wotshe muhefemulo wo xaniseka ni wu khurisile.

Jeremiya 31:25 Referans Kwoze

Matewu 5:6

Va katekile ava va ku ni nzala ni ditora da wululami, nguko va na khuriswa!

Johani 4:14

aniko awule a selako mati yawa ni no mninga ani, kha na mbiswa a txi pfa ditora; kambe mati yawa ni no mninga, ma na hinduka mndani kwakwe ma txi maha txisima txa mati yawa ma mu ningako wutomi wo mbi guma.”

Matewu 11:28

Ngonani kwangu, motshenu mi nga karala, mi nemelwako ngu mrwalo, ani ni na mi humuta.

Masalmo 107:9

Nguko ene wa tima ditora ka vale va di pfako, wa khurisa avale va pfako nzala.

Jeremiya 31:14

Ni na khurisa mimoya ya vaphaxeli ngu mafura, sekoko vathu vangu va na khura ngu silo sa sinene sangu, kuwomba Mkoma.

2 Vakorinto 7:6

Aniko Txizimu txi txi thavelelako va va ti vekako hahatshi ka txona, txi hi thavelete ngu kubwaka ka Titosi,

Isaya 50:4

Mkoma Txizimu a ni ningile lidimi lo gondisa, kasi ku ni ziva kuwomba ngu mbimo ya kona, dipswi da dinene ka wule wo karala. Ene wa ni wusa mixo ni mixo, wa ti tula tinzeve kasi ku ni engisa, kufana ni vale va gondako.

Luka 1:53

Avale va nzala a va khurisile ngu sa sinene, e hangalasa avale va kutithemba, na va si nga ni txilo manzani.

Isaya 32:2

Se wamwamna wule a na fana ni txivhikelo txo vhikela moya, a na nga wuthavelo ka txihuhuri, ni ku nga lidhonga la mati ka makhalo a kuoma, ni mtsudi wa dirigwi da hombe ka ditiko da txihala.

Isaya 40:29

A ninga mtamo ka wule a nga karala, kambe engetela mtamo ka wule asi ngako ni mtamo ni wa wudotho.

Jeremiya 31:12

Vanata va txi embelela ngu litsako aniya mmangoni ka Siyoni, ve tutumela wunene wa Mkoma, amu ka fulaho, ni vhinya, ni mafura, amu ka tihambana ni marole, dihika dawe di na fana ni thembwe yi yi nga nakaniswa, kha va na mbiswa ve dhindirika.

Ezekhiyele 34:14

Ni na ti dyisela ka makhalo amanene, sibala sa kona si na maneka ka mimango yo lapha ya ka Israyeli; koneyo ti na otela ka txibala txatxinene, kambe ti na dya ka wudyiselo wa kunona, mimangoni ka Israyeli.

Masalmo 23:3

Wa xayisa moya wangu kambe wa ni tsimbitisa ngu tinzila to lulama, ngu mhaka ya ditina dakwe.

Isaya 41:17

Vaxaniseki ni vale vo pwata va lava mati, kambe kha ma ngaho, se tidimi tawe ta oma ngu ditora; aniko ani Mkoma, ni na va engisa, ani Txizimu txa ka Israyeli kha ni na mbi va leka.