Jeremiya 31:22 - Bhiblia Yo Sawuleka

²² U na peperukela kala yihi mbimo mwananawe, wo bharuka kani? Nguko Mkoma a vangile tximaha txa txiphya ha mafuni: Wamsikati a na vhikela wamwamna.

Jeremiya 31:22 Referans Kwoze

Jeremiya 49:4

Ngu kutxani u txi ti dhumisa mikovani, ka mikova yako yo tshura, awe mwanana wa txigevenga u thembako tithomba tako, u txi khawe:

Jeremiya 7:24

Aniko kha va engisa hambi ku riya tinzeve; se va to tsula makungoni kwawe ni mu ka kubanga ka timbilu tawe to biha, va to tshumelela msana, kha vaya masoni.

Matewu 1:21

a na veleka mwanana wa m'zambi, awu u no m'raya ditina daku i Jesu, nguko Ene a na hanyisa ngamu yakwe ka sionho sawe.”

Hoseya 11:7

Nguko vathu vangu va wekelela ku ni leka, hambiko va dhanako Nyatxitimwi, kha ngaho kwawe a m'guletako.

Hoseya 8:5

Dirole dako, awe Samariya, di lambilwe; kuhenya kwangu kuturile txitimwi kwawe; Va na pwata mnandu kala ditshiku muni, kani?

Hoseya 4:16

Nguko va ka Israyeli va ni kanu kufana ni homu ya makati ya kanu; konkuwa Mkoma a na va dyisa kufana ni txinvutana ka wukhalo wo anama.

Jeremiya 4:14

“Jerusalema, kuwula mbilu yako kubihani, kasi ku u na hanyiswa; Maalakanyo ako o biha ma na zumba ni nawe kala yihi mbimo kani?

Jeremiya 3:22

Wuyani, anu vanana vo tiwuka, ani ni na thavisa ku phawuka kwanu. “Ngathu vava, hi tile kwako; nguko awe u Mkoma, Txizimu txathu.

Jeremiya 3:6

Mkoma a to womba kwangu ka masiku a mfumeli Josiya, a txi khene: “Ina u ti woni ti a nga maha Israyeli wu wo tiwuka kani? Ene a kwete mimango yotshe yo guleka, ni hahatshi ka yotshe mindonga yo nyuka, konamo a ta so mbetete wugangoni.

Jeremiya 2:36

Ngu kutxani u kuluvetako kujika, u txitxa nzila yako kani? U engeta u xowokiswa ngu Egipta, ngako u nga wiswa tingana ngu Asiriya.

Jeremiya 2:23

U nga wombisa kutxani ku khawe, kha na nyenyeziswa, kha na londisela Bhahali kani? Hi nga wona nzila yako mreleloni, alakanya ti u nga maha; awe u dikameli da mazambo di tutumelako hale ni hale.

Jeremiya 2:18

U tsimbilela txani ngu nzila ya Egipta, kuya sela mati a Nilo kani? U tsimbilela txani ngu nzila ya Asiriya kuya sela mati a mnambo kani?

Isaya 7:14

Ngu toneto, Mkoma apune, a na mi ninga txikombiso: Wonani taku, wotuma a na mana txirumbu e veleka mwanana wa m'zambi, se ditina dakwe i Emanuweli.

Mitengo 16:30

Aniko ngako Mkoma a txi rumela txilo txatxiphya, ni kungako mafu ma txi asama txisofu txa ona meva mita ni sotshe siya sawe, ve relela diyivani va txi hanya, mi na tiziva to ava vathu va henyisile Mkoma.

Genesisi 3:15

Se ni na veka livengo hagari kwako ni wamsikati, hagari ka liveleko lako ni liveleko lakwe; aliya li no ku ganyata msungo, se awe u txi li luma txizenende.”

Zakariya 7:11

Sekoko vona kha va lava kuengisa, va to ni komba makata o ni nyenya, ve tsiva ni tinzeve tawe, kasi ku va si engisi.

Hoseya 14:4

Ani ni na holisa ku ni tshuralela kwakwe, ani ngu kutilava kwangu, ni na va randa; nguko kuhenya kwangu ku khukhile kwawe.

Jeremiya 14:7

Hambi ngako sionho sathu si txi hi xowokisa, awe Mkoma hi vhune ngu mhaka ya ditina dako. Nguko hi tiwukile kakungi, hi txi kuonhela.

Jeremiya 13:27

Ni wonile wugango wako, ni kudila ka kunavela kwako, wugango wako wo phindeletisa, amu mimangoni ni mu tithembweni. Dikhombo kwako Jerusalema! U na verela kala yihi mbimo na u si basiswi kani?

Jeremiya 3:14

Wuyani, anu vanana vo tiwuka, kuwomba Mkoma, nguko ni nyamne wanu. Ni na teka mmweyo ka m'ti ni m'ti, ni vambidi ka lihunzu ni lihunzu, mi siya Siyoni.

Vagalatiya 4:4

Mbimo yi txi nga hoka txikhati txa kona, Txizimu txi rumete Mwanana wa txona, a nga velekwa ngu wamsikati, a nga tumela kufumwa ngu Mlayo,

Jeremiya 3:8

Ni to wona ti taku, hambiko ni nga tovela Israyeli, ni mninga dipasi da kuhambana ngu mhaka ya wugango wakwe, Judha ndiya yakwe yo mbi thembeka, kha thava, aniko nene a to tsula eya maha wona wugangowo.

Jeremiya 3:1

Vona va kha vona: Ngako wamwamna a txi tovela msikati wakwe, eyo wamsikati e ti tsulela, eya tekwa ngu mmwani wa wamwamna, ina mwamna wakwe wo khata a nga mtshumelela kambe kani? Ditiko edo kha di na mbi bihiswa ngu kumaha eto kani? Aniko awe, u nga hungala ni sigango so tala, ina u na tshumelela kwangu, kuwomba Mkoma.

Jeremiya 3:4

Ni konkuwa, u ngadi u txi dila kwangu, u txi khawe: “Tata, u ti ti mngana wa wuphya wangu kani?