Jeremiya 31:20 - Bhiblia Yo Sawuleka

²⁰ Ina Efrayime hi nga mwanangu a randekako kani? Txirandwa ngu mbilu kani? Nguko hambi ni txi m'wukela, na khumbula ngu kupinda mpimo mbilu yangu ya bhibhikela ngu mhaka yakwe, kambe ni na m'hawukela, kuwomba Mkoma.

Jeremiya 31:20 Referans Kwoze

Isaya 55:7

M'bihi a na leke nzila yakwe, m'thu wa kwa mbi lulama a na leke mipimiso yakwe, se a na hundulukele ka Mkoma, ene a na mpfele wusiwana; a na tshumelele ka Txizimu txathu, nguko nja hombe ngutu mu ko divalela.

Isaya 63:15

Wona na u di nzumani, se u wona na u di ka wukhalo wako wo sawuleka, ni kudhundeka. Txi hayi txiluse txako, ni mithumo yako ya mtamo kani? U nga thavise kwangu lirando la mndani kwako ni la wumbilu wako!

Masalmo 103:13

Mkoma mbwa kuthutha ka vale va m'thavako kufana ni tate wo thutha ka vanana vakwe.

Hoseya 14:4

Ani ni na holisa ku ni tshuralela kwakwe, ani ngu kutilava kwangu, ni na va randa; nguko kuhenya kwangu ku khukhile kwawe.

Valamuli 10:16

Se va to thavisa sizimu sa vamatiko hagari kwawe, ve thumela Mkoma; sekoko Mkoma a to pandiseka dihikani kwakwe ngu mhaka ya kuxaniseka ka va ka Israyeli.

Vafilipiya 1:8

Txizimu i fakazi yangu ka ti to ani na xuva ku mi wona motshe, ngu lirando la Jesu Kristu.

Luka 15:24

nguko mwanana wu wangu, a nga ti fite, se a tshumete a txi hanya, a ti mwalate, se e tshumela e manwa.’ Se va to khata kubusa.”

Jeremiya 48:36

Ngu toneto, yi na pfalisa ku nga tshodi mbilu yangu ngu vavamna va Kiri-Heresi; na va di luzile mpfuno wu va nga sengeleta.

Isaya 16:11

Ngu mhaka yeto, masembe angu ma tuma, ngu mhaka ya Mowabhi, kufana ni txitende, ni mndani kwangu, ngu mhaka ya Kiri-Heresi.

Jeremiya 31:9

Va na wuya va txi dila, ni txi va heleketa na va txi khongela; ni na va thangela minamboni ka mati, ngu nzila yo basa, eyo va na kwa mbi huma ka yona; ngu ku ni ku tate ka Israyeli, matiwula angu ngu Efrayime.

Jeremiya 3:19

Se ani ni txi khani: Ni na kuvekisa kutxani hagari ka vanana, ni na kuninga ditiko da kunaveleka, i kuthomba ya mabutho a matiko kani? Ni txi khani: Mi na ni dhana mi txi khanu: Tata. Kha mi na mbiswa mi phawuka mi txi ni siya.

Ndando ya Tindando 5:4

Txirandwa txangu txi to wuletisa diwoko ngu ha ka ditshoko da ditimba, se mbilu yangu yi to nyawukelwa ngu lirando.

Mavingu 3:12

Nguko Mkoma a kawuka wule a mrandako, kufana ni tate, ka mwanana wule a mnavelelako wunene.

1 Vafumeli 3:26

Aniko, wamsikati wule mwanana wakwe i nga ti wule wo hanya, a to womba ka mfumeli (ngako a nga dhukiswa mbiluni kwakwe ngu mhaka ya mwanana wakwe), a txi khene: O! Awe nyamne wangu, mningeni mwananeyo wo hanya, mi nga duketeni ni ku m'daya. Se mmwani a ti ti khene: Mwendo mbwako mwendo mbwangu; a na abaniswe.

Dhewuteronome 32:36

Mkoma a na emela vathu vakwe, kambe a na va ni wumbilu ngu sithumi sakwe. Ngako a txi wona ti to mtamo wawe wu ngumile ni ti to kha ka sala m'thu wo sungwa mwendo wo thuseka,

Genesisi 43:30

Josefa a to kuluveta a txi huma nguko a ti hefemuteka, ngu mhaka ya mnanda wakwe, ni mirongo yi to khata kuhuma, se a to wulela txibhiyani kwakwe a txi ya dilela kona.

Luka 15:32

Ti ni fanelo kubusa, hi txi tsaka nguko mnanda wu wako a ti fite, e tshumela a txi hanya; a ti mwalate, e tshumela a txi manwa!’ ”

Jeremiya 3:12

Tsula u ya nuwela mahungu awa wuphemba, u txi khawe: Wuya Israyeli, awe u nga phawuka, kuwomba Mkoma. Na mbiswa ni mi henyela, nguko ni ni wumbilu, kuwomba Mkoma, na mbi kho ni henya kala kupinduka.

Jeremiya 33:26

ni na leka liveleko la Jakobe ni la Dhavhidha txithumi txangu, ti taku ni si dhuki ni teka hagari ka vanana vakwe awu a no fumela liveleko la Abrahama, Isaake ni Jakobe, nguko ni na wuyisa va vo ñolwa vawe ni txi va hawukela.

Ezekhiyele 33:11

Va gele, ani na hanya, kuwomba Mkoma Txizimu, kha ni tsakiswi ngu kufa ka m'bihi, aniko ngu ku m'bihi e hunduka ka nzila yakwe, e hanya; hundulukani, hundulukani ka tinzila tanu ta walo; nguko koko mi na fela txani, anu va nyumba ya ka Israyeli kani?

Levhi 26:44

Hambi ka toneto, ngako va di payutwe veya maneka ditikoni ka valala vawe, kha ni na mbi va leka, kha ni na mbi va tsukula aha koza ni txi va fuvisa, ni divala txitumelelano txi ni nga txi maha navo, nguko ani ngani Mkoma, Txizimu txawe.

Isaya 30:18

Ngu mhaka yeto, Mkoma a na verela ku mi mahela wumbilu; kambe ngu kumaha keto, a na guletwa kasi ku e mi pfela wusiwana, nguko Mkoma Njizimu to dinganisa. Va katekile votshe vale va thembako kwakwe.

Sidilo 3:22

Wumbilu wa Mkoma, ngu wona wu mahako ti to hi si fuviswi; nguko wumbilu wakwe kha wu na magwito.