Jeremiya 30:7 - Bhiblia Yo Sawuleka

⁷ Yowe! Ani sikwangu! Ditshiku diya da hombe, kha ku na dimwani do fana nado! Kambe i mbimo ya dikhombo ka Jakobe; hambi keto, ka dona, a na huluka.

Jeremiya 30:7 Referans Kwoze

Dhaniyeli 12:1

Se ka mbimo yoneyo, ku na humelela Migeli, mthangeli wa hombe, a wuselwako vanana va ditiko dako, kambe ku nava ni mbimo ya kuxaniseka, ko mbi khala kuhumelela, kukhukhela ku nga va ni mfumo kala ka mbimo yile; aniko ka yoneyo mbimo, vathu vako va na hulukiswa, votshe vale va no maneka va di bhatwe amu ka dibhuku.

Malakiya 4:1

Nguko wonani taku ditshiku dile, dita di txi tura nga m'dhikila; votshe va va ti kulisako ni votshe va va mahako wubihi, va na nga mwasi, se ditshiku di di nota di na va tshokomisa, kuwomba Mkoma wa Mabutho a Tiyimbi, taku kha di na mbi va siyela mkoloti, mwendo didhavi.

Dhaniyeli 9:12

Se ene a to tsanisa dipswi dakwe, dile a ngadi womba kwathu, ni ka valamuli vathu vale va nga ti lamula, ngu kutisa dikhombo da hombe txitimwi kwathu; ngu kumaha keto, mhaka yile yi nga humelela Jerusalema, kha yi khali kumaheka hahatshi ka yotshe nzuma.

Joyeli 2:11

Se Mkoma wa guleta dipswi dakwe masoni ka masotxhwa akwe; nguko magovelo a kona nga mangi ngutu; nguko a ni mtamo, wu a mahako ti di nga womba dipswi da Mkoma; nguko ditshiku da Mkoma nda hombe kambe da thisa, se i mani waku a ngadi xanisa kani?

Varoma 11:26

ngu toneto, votshe va ka Israyeli va na hanyiswa, nga ti ti nga bhalwa taku: “Mtiruli a na huma ngu Siyoni, a na thavisa sisolo ka Jakobe.

Marku 13:19

Nguko ka oneyo masiku ku nava ni sixaniso sa hombe ngutu, saku kukhukhela makhatoni ka ditiko di Txizimu txi ngadi vanga kala konkuwa, kha si khali ku va ho, kambe kha si na mbi nga vaho.

Hoseya 1:11

Se vanana va ka Judha ni vanana va ka Israyeli votshe va na sengeletana, ve ti emisela mthangeli mmweyo dwe, ve huma ditikoni; nguko di na va da hombe ditshiku da Jezireyeli.

Sidilo 1:12

Kha ti pandisi tiya, kwanu motshenu mi pindako ngu nzila, kani? Emani, mi wonisisa, mwendo ku ni mpando wo nga wangu! Mkoma a nga ni tisela wona, ngu ditshiku da txiviti txa kupandiseka kwakwe.

Jeremiya 30:10

U nga thave koko, awe txithumi txangu Jakobe, kuwomba Mkoma, kambe u nga xamale, awe Israyeli; nguko ni na kuhumisa ka matiko a kule, ni vanana vako, ngu ditikoni ka wukhumbi wawe; se Jakobe a na wuya, e ta humula, kambe a na zumbiseka, kha ku na mbi vaho wo m'dhukisela.

Masalmo 34:19

Vathu vo lulama va dukwa ngu sixaniso so tala, aniko Mkoma wa va hulukisa ka sotshe.

Mtuletelo 6:17

nguko di hokile ditshiku da hombe da kuhenya kwawe, se i mani a no sikota kuema, kani?

Mithumo 2:20

Ditambo di na hinduka di maha txidema, mtxima wu na hinduka wu maha mnoha di sinzi kuhoka ditshiku da Mkoma, ditshiku da hombe do tala ngu wudhumo.

Joyeli 2:31

Ditambo di na hinduka di maha txidema, se mtxima wu na maha mnoha, na di si se ta ditshiku da hombe da Mkoma.

Sidilo 4:6

Nguko wubihi wa vathu va ka kwathu, mbwa hombe kupinda wa Sodhoma, i ku m'ti wu wu nga mwalatwa ngu mbimwanyana, i si nga ngu diwoko da m'thu aniko da Txizimu.

Sidilo 2:13

Awe Jerusalema, ni kuninga wufakazi wa txani kani? Ni nga kudinganisa ni mani awe mwanana wa dihorana wa Jerusalema kani? Ni nga kufananisa ni mani kasi ku kuthavelela awe wotuma wa Siyoni kani? Nguko txilonda txako nja hombe nga linene; i mani a no kukalamukisa kani?

Masalmo 25:22

Awe Txizimu, hulukisa Israyeli ka sotshe sixaniso sakwe!

Genesisi 32:7

Sekoko Jakobe a to tala ngu kuthava ni kukarateka. Ti di ngeto, a to abanisa vathu va a nga ti navo, tinvuta ni tihomu, ni makamelu ku txi maneka mitxawa yimbidi.

Isaya 20:6

Sekoko ka ditshiku donedo, vaaki va txitondoloni, va na kha vona: Wonani ti ti humelelako vale hi nga va themba, avale hi nga ti ti tutumela kwawe, kasi ku hi huluka ka mfumeli wa Asiriya! Se athu koko, hi na hulukisa kutxani kani?

Jeremiya 2:27

Ava va wombako ka mndonga va txi kha vona: Awe u tate wangu, se va txi kha vona ka dirigwi: Ani ni velekilwe ngu ngawe; nguko va ni tshuralete, kha va ni rendekeli; aniko, mbimo ya dikhombo, va na kha vona: Ema, u txi hi xanguta!

Jeremiya 2:28

Sekoko si hani sizimu sako asi u nga ti mahela kani? Hi nga si leka si txi ema, hi wona ngako si txi sikota ku kuhanyisa ka mbimo ya makhombo! Nguko sizimu sako si dingana ni mtengo wa miti yako, awe Judha.

Jeremiya 14:8

Awe u kuthemba ya Israyeli, Muhanyisi wathu ka mbimo ya sikarato, ngu kutxani u txi nga u wa matiko ditikoni, nga muendi wu a hambukako kasi e fungala wusiku wumwewo kani?

Joyeli 1:2

Engisani tiya anu madhota, kambe pfisisani motshenu vaaki va ditiko: Ina ti humelete tiya ka masiku anu kani? Mwendo kambe ka masiku a vatate vanu kani?

Joyeli 1:15

Yowe! Ditshiku dile! Nguko ditshiku da Mkoma di hafuhi, di nata kufana ni kufuvisa ka wu wa Mtamo-wotshe.

Zakariya 14:7

Aniko di na va ditshiku do ziwa ngu Mkoma; kha ku na mbi va ni mitshikari mwendo wusiku; se ku na maheka taku, ngu mbimo ya mitshikari ku nava ni kuwonekela.

Mika 4:9

Se ngu kutxani u dilako ngutu kani? Ina kha nga ho mfumeli kwako kani? Ina di to fa didhota dako kani? Mwendo u to manwa ngu kupanda ko nga ka wamsikati wu a lumwako kani?

Habhakuki 3:16

Ni di ti engisile ani, mndani kwangu kudhuka, ngu dipswi dakwe txisofu txangu txi dhudhumete; kuwulete kusina marambuni kwangu, se ni dhudhumela mndani kwangu; na humula ani ka ditshiku do pandiseka, ngako ni txi nata lwa ni vathu vale va nota hi hoxota.