Jeremiya 3:14 - Bhiblia Yo Sawuleka

¹⁴ Wuyani, anu vanana vo tiwuka, kuwomba Mkoma, nguko ni nyamne wanu. Ni na teka mmweyo ka m'ti ni m'ti, ni vambidi ka lihunzu ni lihunzu, mi siya Siyoni.

Jeremiya 3:14 Referans Kwoze

Jeremiya 2:19

Kubiha kwako ku na kutsayisisa, u pekwa ngu wubihi wako, ngukonaho, ti zive ku tibihile kuleka Mkoma, Txizimu txako. Ni kwa mbi thava ka tisa kupandiseka, kuwomba ene apune Mkoma Txizimu txa Mabutho a Tiyimbi.

Jeremiya 31:32

Hi nga txitumelelano txo fana ni txi ni nga maha ni vatate vawe, ka ditshiku dile ni nga va ñola ngu dianza, kasi ku va humisa ngu ditikoni ka Egipta, se vona va txipisile txitumelelano txangu, hambiko ani ni ngadi va thembisile, kuwomba Mkoma.

Isaya 54:5

Nguko M'vangi wako i mwamna wako; ditina dakwe Mkoma wa Mabutho a Tiyimbi; se Msawuleki wa Israyeli, ngene mtiruli wako; ene a na dhanwa ku Txizimu txa otshe mafu.

Jeremiya 23:3

Ani nipune ni na sengeleta misalela ya tinvuta tangu, ti huma ngu ka otshe matiko amu ni nga ti hangalasa kona, ni txi ti tshumetela wudyiseloni ka tona; ti na veleka ti txi anda.

Jeremiya 3:8

Ni to wona ti taku, hambiko ni nga tovela Israyeli, ni mninga dipasi da kuhambana ngu mhaka ya wugango wakwe, Judha ndiya yakwe yo mbi thembeka, kha thava, aniko nene a to tsula eya maha wona wugangowo.

Jeremiya 2:2

Tsula, kwangula tinzeveni ka Jerusalema, u txi khawe: Mkoma a khene: “Na alakanya wunene wa wuphya wako, Ni lirando lako mbimo yi u nga wutwa ngu yona; mbimo yile u nga ti ni londetela txiwulani, Ka ditiko di ku nga sa phaywa txilo

Isaya 10:22

Nguko hambi ku vathu vako, awe Israyeli, va fanako ni mtxhefa wa lineneni, miboti yokha ngu yona yi no hulukiswa; kulovisa kutsanisilwe, ka thekelela ngu kululama.

Isaya 6:13

Kambe ngako ku txi sala mmweyo hagari ka va digumi, nene a na pinda hagari ka mndilo, kufana ni mndonga wa mkusu ni wa mtshula, hambi yi di witwe, txitsha txa thunga, txi humisa mazokoro. Se mbewu yo sawuleka, i nava kutsana kwakwe.

Varoma 9:27

Isaya nene wa huwelela ta Israyeli, a txi khene: “Hambiko mtengo wa vanana va ka Israyeli wu fanako ni mtxhefa wa lineneni, miboti yokha ngu yona yi no poniswa;

Jeremiya 3:1

Vona va kha vona: Ngako wamwamna a txi tovela msikati wakwe, eyo wamsikati e ti tsulela, eya tekwa ngu mmwani wa wamwamna, ina mwamna wakwe wo khata a nga mtshumelela kambe kani? Ditiko edo kha di na mbi bihiswa ngu kumaha eto kani? Aniko awe, u nga hungala ni sigango so tala, ina u na tshumelela kwangu, kuwomba Mkoma.

Isaya 17:6

Hambi keto, a na salelwa ngu miboti yokari, nga mndonga wa muolivha, wu di zuzilwe: Wu salako ni mihando yimbidi, mwendo yiraru, titshangwe ka madhavi, ni mune mwendo mtxhanu ka madhavi o nava ngutu, a mndonga wo veleka ngutu, kuwomba Mkoma, Txizimu txa Israyeli.

Isaya 1:9

I ti ku Mkoma wa Mabutho a Tiyimbi a sa hi siyela miboti, hi ndi na nga Sodhoma, di fana ni Gomora.

Isaya 31:6

Hundulukelani ka wule koko vanana va ka Israyeli va nga mtshuralela ngutu.

Isaya 57:17

Ngu mhaka ya wubihi wa likungo lakwe, ni henyile, ni va peka; ni to barama, ni henya; aniko sindaka-milayo si to tsimbitisa ngu nzila ya kuranda ka mbilu ya sona.

Jeremiya 3:12

Tsula u ya nuwela mahungu awa wuphemba, u txi khawe: Wuya Israyeli, awe u nga phawuka, kuwomba Mkoma. Na mbiswa ni mi henyela, nguko ni ni wumbilu, kuwomba Mkoma, na mbi kho ni henya kala kupinduka.

Jeremiya 29:14

Ni na manwa ngu nganu, kuwomba Mkoma, ni na tshumeta va va nga ñolwa, ni na mi sengeleta ngu ka otshe matiko, ni ka otshe madhawa, awa ni nga mi hangalasa ka ona, kuwomba Mkoma; ni na tshumela ni txi mi wuyisa ka wukhalo wu ni nga mi tutumisa ka wona, mi txi ya wukhumbini.

Jeremiya 31:6

Nguko ku na hoka ditshiku dile vawoneleli va mimangoni ka Efrayime va no dhana ngu dona, va txi kha vona: Khukhani, ahiyeni Siyoni ka Mkoma, Txizimu txathu.

Jeremiya 31:12

Vanata va txi embelela ngu litsako aniya mmangoni ka Siyoni, ve tutumela wunene wa Mkoma, amu ka fulaho, ni vhinya, ni mafura, amu ka tihambana ni marole, dihika dawe di na fana ni thembwe yi yi nga nakaniswa, kha va na mbiswa ve dhindirika.

Hoseya 5:15

Ni na tsula, ni tshumela ni wuya ka wukhalo wangu, kala kuza ve tipfa mnandu, ve lava khohe yangu; ngako vona va di kupandisekani, va na ni lava ngu mabimbi-kutxa.

2 Makronika 30:6

Ku to rumelwa mitumi ka dotshe ditiko da Israyeli ni da Judha, yi di ni mapapilo awa ma nga bhalwa ngu dianza da mfumeli ni vathangeli vakwe madingano ni kuruma ka Mkoma a txi khene: Vanana va Israyeli, hundulukelani ka Mkoma, Txizimu txa Abrahama, ni Isaake, ni Israyeli, kasi ku ni txona txi tshumelela kwanu mi nga huluka manzani ka vafumeli va Asiriya.

Isaya 27:12

Se ku na maheka ka ditshiku dile taku, Mkoma e sengeleta mihando yakwe, kukhukhela milongani ka mnambo, kala ka mnambo wa Egipta; se anu vanana va ka Israyeli, mi na haphelwa, mmweyo-mmweyo.

Isaya 44:22

Na hangalasa sihambunyeto sako kufana ni hunguva, ni sionho sako kufana ni direfu; tshumelela kwangu nguko ni ku tirute.

Isaya 55:7

M'bihi a na leke nzila yakwe, m'thu wa kwa mbi lulama a na leke mipimiso yakwe, se a na hundulukele ka Mkoma, ene a na mpfele wusiwana; a na tshumelele ka Txizimu txathu, nguko nja hombe ngutu mu ko divalela.

Zakariya 1:4

Mi nga mahiseni kufana ni vatate vanu, avale vaprofeti vo khata va nga womba-womba kwawe, va txi kha vona: Mkoma wa Mabutho a Tiyimbi a khene: Hundulukani konkuwa ka tinzila tanu to biha, ni ka mithumo yanu yo biha. Aniko kha va ni engisa, hambi ku ni pfisisa, kuwomba Mkoma.