Jeremiya 3:12 - Bhiblia Yo Sawuleka

¹² Tsula u ya nuwela mahungu awa wuphemba, u txi khawe: Wuya Israyeli, awe u nga phawuka, kuwomba Mkoma. Na mbiswa ni mi henyela, nguko ni ni wumbilu, kuwomba Mkoma, na mbi kho ni henya kala kupinduka.

Jeremiya 3:12 Referans Kwoze

Ezekhiyele 33:11

Va gele, ani na hanya, kuwomba Mkoma Txizimu, kha ni tsakiswi ngu kufa ka m'bihi, aniko ngu ku m'bihi e hunduka ka nzila yakwe, e hanya; hundulukani, hundulukani ka tinzila tanu ta walo; nguko koko mi na fela txani, anu va nyumba ya ka Israyeli kani?

Masalmo 86:15

Aniko awe, Mkoma, u Txizimu txa wunene ni wumbilu, u wa kutimisela, u di tate ngu wunene ni kuthembeka.

Jeremiya 33:26

ni na leka liveleko la Jakobe ni la Dhavhidha txithumi txangu, ti taku ni si dhuki ni teka hagari ka vanana vakwe awu a no fumela liveleko la Abrahama, Isaake ni Jakobe, nguko ni na wuyisa va vo ñolwa vawe ni txi va hawukela.

Jeremiya 31:20

Ina Efrayime hi nga mwanangu a randekako kani? Txirandwa ngu mbilu kani? Nguko hambi ni txi m'wukela, na khumbula ngu kupinda mpimo mbilu yangu ya bhibhikela ngu mhaka yakwe, kambe ni na m'hawukela, kuwomba Mkoma.

Jeremiya 3:22

Wuyani, anu vanana vo tiwuka, ani ni na thavisa ku phawuka kwanu. “Ngathu vava, hi tile kwako; nguko awe u Mkoma, Txizimu txathu.

Jeremiya 3:18

Ka onayo masiku nyumba ya ka Judha yi na longoloka kumweko ni nyumba ya ka Israyeli; va nata ngu wumbidi wawe ngu ditikoni ka Wuphemba, va txi ta ka ditiko di ni nga ninga vatate vanu kuva thomba yawe.

Jeremiya 30:11

Nguko ani ni kumweko ni nawe, kuva ni txi kuhanyisa, kuwomba Mkoma. Nguko ni na heta otshe matiko awa ni nga ti ku hangalasile ka ona; aniko awe kha ni na mbi kuhetisa; ni na kulaya ngu wululamo, kha ni sikoti ku kuleka u sa pekwa.

Jeremiya 23:8

Aniko: Mkoma a hanyako, awu a nga thangela vanana va ka Israyeli, ve huma ngu ditikoni ka Wuphemba, ni ka otshe matiko ale a nga ti va tovelete ka ona; va nata aka ditikoni kwawe.

Jeremiya 4:1

“Ngako u txi wuya, awe Israyeli, wuyela kwangu, kuwomba Mkoma; ngako u txi thavisa manyala ako masoni kwangu, sekoko khu na mbiswa u peperukela kambe.

Jeremiya 3:5

Ina a na va ni txiviti kala kupinduka kani?” Awe u wombile tongeto. Aniko u maha ti ti nga biha uza u ti hetisa.

Masalmo 145:8

Mkoma a ni wunene ni wumbilu; wa timisela kambe a ni kutsetsa.

Masalmo 86:5

Nguko awe, Mkoma, u wamnene, wa divalela; wa amukela ngu mbilu votshe vale va ku khozelako.

2 Vafumeli 18:1

Ku to maheka to ngu dilembe da wuraru da kufuma ka Hoseya, mwana Ela, mfumeli wa ka Israyeli, a to khata kufuma Ezekhiya mwana Akazi, mfumeli wa ka Judha.

2 Vafumeli 17:23

Kala kuza Mkoma e thavisa Israyeli masoni kwakwe, nga kule a nga nga womba ngu sithumi sakwe, i ku vaprofeti; a tekisilweto Israyeli e tsuliswa Asiriya, emo a manekako kona kala ka ditshiku da nyamsi.

Dhewuteronome 30:2

ni kungako u txi hundulukela ka Mkoma, Txizimu txako, u engisa dipswi da txona, ka ti totshe nyamsi ni ku leletako tona, awe ni vanana vako, ngu yotshe mbilu yako, ni wotshe moya wako.

Hoseya 6:1

Ngonani, hi tshumelela ka Mkoma, nguko ene a hi phatulete, se a na hi kalamukisa; a hi lematile, aniko a na sungelela silonda sathu.

Ezekhiyele 39:25

Ngu konaho, Mkoma Txizimu a khene: Kona kuwa, ni na tshumela ni wuyisa tikhumbi ta ka Jakobe. Kambe ni na mahela wumbilu yotshe nyumba ya ka Israyeli, ni na emela ditina dangu do sawuleka.

Jeremiya 31:8

Ni na va wuyisa ngu ditikoni ka Wuphemba, ni txi va sengeleta ngu magemeta-mitshi ka mafu; kumweko navo, ku ni mabhofu ni silima, vo khosa, va na wuya i ti didhendele da hombe.

Jeremiya 3:14

Wuyani, anu vanana vo tiwuka, kuwomba Mkoma, nguko ni nyamne wanu. Ni na teka mmweyo ka m'ti ni m'ti, ni vambidi ka lihunzu ni lihunzu, mi siya Siyoni.

Jeremiya 3:7

Ani ni txi alakanya ku khani: Msana ko a di mahile totshe tiya, a na wuya kwangu. Aniko kha wuya. Sekoko Judha ndiya yakwe yo mbi thembeka, a to ti wona.

Jeremiya 3:1

Vona va kha vona: Ngako wamwamna a txi tovela msikati wakwe, eyo wamsikati e ti tsulela, eya tekwa ngu mmwani wa wamwamna, ina mwamna wakwe wo khata a nga mtshumelela kambe kani? Ditiko edo kha di na mbi bihiswa ngu kumaha eto kani? Aniko awe, u nga hungala ni sigango so tala, ina u na tshumelela kwangu, kuwomba Mkoma.

Isaya 44:22

Na hangalasa sihambunyeto sako kufana ni hunguva, ni sionho sako kufana ni direfu; tshumelela kwangu nguko ni ku tirute.

Mavingu 28:13

Awule a sisako sihambunyeto sakwe, kha na mbi dhuka e humelela; aniko awule a ti solako ni ku si leka, a na mana wumbilu.

Masalmo 103:17

Aniko lirando la Mkoma kha li nga ni magwito ka vale va m'thavako kululama kwakwe kha ku na magwito ka liveleko ni liveleko,

Masalmo 103:8

Mkoma a tate ngu wumbilu ni wunene; wa timisela na a di tate ngu lirando.

Masalmo 79:5

Mkoma, u na hi henyela kala mbimo muni kani? Txiluse txako txi na fana ni mndilo wo tura kani?

2 Makronika 30:9

Nguko mi txi hindulukela ka Mkoma, vananu ni vanana vanu ava va nga tsuliswa wukhumbini va na mahelwa wumbilu ngu vale va nga va teka, va na va wuyisa ditikoni muwa; ngu ku Mkoma Txizimu txanu txi ni wuxinji ni wumbilu kha txi na mbi mi tshuralela ngako mi txi tshumelela ka txona.

2 Vafumeli 17:6

Ka dilembe da digumi ni mune, da kufuma ka Hoseya, mfumeli wa Asiriya a to honyola Samariya, se va ka Israyeli a to va tsulisa Asiriya, kota tikhumbi, eya va veka Hala ni Habhori, hafuhi ni mnambo wa Gozani, ni mu ka madhoropa a Vamidhiyani.

2 Vafumeli 15:29

Ka masiku a Peka, mfumeli wa ka Israyeli, a tile Tigilati-Pileseri, mfumeli wa Asiriya, e ta honyola madhoropa ya Ijomi, ni Abheli-Bheti-Mahaka, ni Janowa, ni Kedhesi, ni Hazori, ni Gileyadhi, ni Galileya, ni dotshe ditiko da Naftali, a va yisa Asiriya.

Genesisi 4:7

Ina ngako u txi maha ta tinene, khu na mbi u amukelwa kani? Se ngako u txi maha to biha, txionho txi na ku baramela ha txikeni, txi txi lava ku ku pfinya, aniko awe wa sikota ku txi xula.”

Levhi 26:40

Sekoko va na ti tshanza ngu wubihi wawe, ni wubihi wa vatate vawe, ni wuhambunyeti wawe, asile va nga ni onhela ngu sona; kambe va na womba ku kha vona, ngu mhaka ya kule va nga ni onhela,

Masalmo 103:9

Kha khali a txi hi kawuka yotshe mbimo, ni dikhulo dakwe kha di simami kala kupinduka;

Jeremiya 11:6

Sekoko Mkoma a to womba kwangu, a txi khene: Womba-womba totshe tiya timhaka madhoropani a ka Judha, ni mu tiruwani ka Jerusalema, u txi khawe: Engisani timhaka ta txiya txitumelelano, mi maha tona.

Jeremiya 12:15

Aniko msana ka kuva ni ti va dute, ni na tshumela ni va pfela wusiwana, ni na va tshumeta, mmwani ni mmwani thombani kwakwe, mmwani ni mmwani e tshumelela ditikoni kwakwe.

Sidilo 3:22

Wumbilu wa Mkoma, ngu wona wu mahako ti to hi si fuviswi; nguko wumbilu wakwe kha wu na magwito.

Ezekhiyele 11:17

Ngu kumaha keto, womba ku khawe: Mkoma a womba tiya: Ni na mi sengeleta hagari ka vathu, kambe ni na mi wuyisa ngu ka matiko ale mi nga tshotshwa ka ona.

2 Makronika 29:10

Konkuwa mbiluni kwangu ni alakanya ti to hi maha txitumelelano ni Mkoma, Txizimu txa Israyeli, kasi ku kuhenya ka Mkoma kuhambuka kwathu.

Isaya 31:6

Hundulukelani ka wule koko vanana va ka Israyeli va nga mtshuralela ngutu.

Jeremiya 31:21

Ti emisele sikombiso, guleta siwindi, veka mbilu yako amu ka ditshuri, ka nzila yile u nga tsimbila ngu yona; wuya awe wotuma wa Israyeli, wuya madhoropani kwako.

Zakariya 1:4

Mi nga mahiseni kufana ni vatate vanu, avale vaprofeti vo khata va nga womba-womba kwawe, va txi kha vona: Mkoma wa Mabutho a Tiyimbi a khene: Hundulukani konkuwa ka tinzila tanu to biha, ni ka mithumo yanu yo biha. Aniko kha va ni engisa, hambi ku ni pfisisa, kuwomba Mkoma.