Jeremiya 3:1 - Bhiblia Yo Sawuleka

¹ Vona va kha vona: Ngako wamwamna a txi tovela msikati wakwe, eyo wamsikati e ti tsulela, eya tekwa ngu mmwani wa wamwamna, ina mwamna wakwe wo khata a nga mtshumelela kambe kani? Ditiko edo kha di na mbi bihiswa ngu kumaha eto kani? Aniko awe, u nga hungala ni sigango so tala, ina u na tshumelela kwangu, kuwomba Mkoma.

Jeremiya 3:1 Referans Kwoze

Ezekhiyele 16:26

Kambe u mahile wugelegele ni vanana va Egipta, vaakelani vako vale i ku siro sa hombe, u mahile wugelegele wako kasi ku ni wusela kuhenya.

Jeremiya 4:1

“Ngako u txi wuya, awe Israyeli, wuyela kwangu, kuwomba Mkoma; ngako u txi thavisa manyala ako masoni kwangu, sekoko khu na mbiswa u peperukela kambe.

Jeremiya 2:20

Nguko ngale ni di funyile dikange dako, ni bhenula tingoti tako, u nje khawe: Na mbiswa ni txi thuma, nguko u sisate ka yotshe mimango yo guleka, ni hahatshi ka yotshe mindonga yo nyuka, u maha wugango.

Zakariya 1:3

Ngu toneto, va gele ku khawe: Mkoma wa Mabutho a Tiyimbi a khene: Tshumelelani kwangu, kuwomba Mkoma wa Mabutho a Tiyimbi, se nani ni na tshumelela kwanu, kuwomba Mkoma wa Mabutho a Tiyimbi.

Hoseya 1:2

Makhato a dipswi da Mkoma ngu ka Hoseya; Mkoma a to khene koko ka Hoseya: Tsula uya teka wamsikati wa wugelegele ni vanana va wugelegele; nguko ditiko di mahile wugelegele, ngu kutshuralela Mkoma.

Ezekhiyele 33:11

Va gele, ani na hanya, kuwomba Mkoma Txizimu, kha ni tsakiswi ngu kufa ka m'bihi, aniko ngu ku m'bihi e hunduka ka nzila yakwe, e hanya; hundulukani, hundulukani ka tinzila tanu ta walo; nguko koko mi na fela txani, anu va nyumba ya ka Israyeli kani?

Jeremiya 4:14

“Jerusalema, kuwula mbilu yako kubihani, kasi ku u na hanyiswa; Maalakanyo ako o biha ma na zumba ni nawe kala yihi mbimo kani?

Jeremiya 3:9

Se Israyeli a to nyenyezisa ditiko ngu wugango wakwe wo thisa, nguko a wu mahile ni marigwi ni sitsha.

Jeremiya 2:23

U nga wombisa kutxani ku khawe, kha na nyenyeziswa, kha na londisela Bhahali kani? Hi nga wona nzila yako mreleloni, alakanya ti u nga maha; awe u dikameli da mazambo di tutumelako hale ni hale.

Valamuli 19:2

Aniko awule wa txikaba a to maha wugango, se a txi thava, e tshumelela m'tini ka tate wakwe, kona Bhetlehema ka Judha, eyo a nga ya zumba kona masiku okari, a kudingana mune wa mitxima.

Mika 2:10

Khukhani mi tsula, nguko kha ku na mbi va hawa wukhalo wa kuhumula kwanu; ngu mhaka ya wukanganyisi wu hoxotako, ina, wu hoxotako kudotho-kudotho.

Jeremiya 3:22

Wuyani, anu vanana vo tiwuka, ani ni na thavisa ku phawuka kwanu. “Ngathu vava, hi tile kwako; nguko awe u Mkoma, Txizimu txathu.

Jeremiya 2:7

Ni mi nehile ditikoni ko pfuna, kuva mi ta dya mihando ya kona ni kuzumbiseka ka dona. Aniko hale mi nga wulela ka dona mi di nyenyezisile ditiko dangu; ni thomba yangu mi yi mahile manyala.

Isaya 24:5

Kha ditshuri, mafu ma nyetilwe ngu vaaki va ona, nguko va ndaka milayo, ve txitxelela sileleto, kambe va funya txitumelelano txa kala kupinduka.

Dhewuteronome 22:21

sekoko va na teka wule wa dihorana ve tsula nayo ha txikeni ka nyumba ya tate wakwe, se majaha a didhoropani kwawe, ma na m'balisela ngu marigwi kala a txi fa; nguko a mahile to biha ka va ka Israyeli, ngu kumaha wugango nyumbani ka tate wakwe; ngu toneto u na va u txi fuvisa wubihi hagari kwanu.

Matewu 5:31

“Ti wombilwe kambe va txi kha vona: ‘Awule a tovelako msikati wakwe, a na mu ninge dipasi da kum'sengula.’

Masalmo 106:38

Va theketile mnoha wo mbi na mnandu, mnoha wa vanana vawe va vafana ni mahorana, ve phaxela ngu wona ka sithombe sa Kanana se ka toneto va nyenyezisile ditiko.

Jeremiya 22:20

Kwelela Libhanoni, u kwangula, guleta dipswi dako na u di Bhasani! Kwangula u di txitimwi ka mimango ya Abharime, nguko votshe va vo randeka kwako va lovisilwe.

Sidilo 1:2

Didhoropa da Jerusalema di simama di txi dila ni wusiku; mirongo ya dona yi pyololoka khoheni ka dona; kha di nga ni mmalateli ka sotshe sirandwa sa dona; votshe vangana va dona va di lekile ve maha valala va dona.

Hoseya 2:2

Khongotelani mame wanu, mkhongoteleni, nguko ene hi nga msikati wangu, se ani kha ni nga mwamna wakwe; a na hambane ni wugelegele khoheni kwakwe, ni wungango wakwe titshumbuni kwakwe.

Jeremiya 31:22

U na peperukela kala yihi mbimo mwananawe, wo bharuka kani? Nguko Mkoma a vangile tximaha txa txiphya ha mafuni: Wamsikati a na vhikela wamwamna.

Ezekhiyele 16:30

Mbilu yako kha ya tsana, kuwomba Mkoma Txizimu: U mahile totsheto i ku mithumo ya dibhoyi da nduma!

Ezekhiyele 16:35

Ngu tona eto, awe digelegele engisa dipswi da Mkoma.