Jeremiya 29:23 - Bhiblia Yo Sawuleka

²³ Nguko va mahile wuphuta muwa ka Israyeli, ngu kuotela ni vasikati va vaakelani vawe, ni kuwombawomba makuhu ngu ditina dangu, i ku ti ni nga mbi va laya. Ani na tiziva, ni fakazi ya tona eto, kuwomba Mkoma.

Jeremiya 29:23 Referans Kwoze

Malakiya 3:5

Se ni nata hafuhi kwanu, ku ta mi lamula, kambe ni na va fakazi ya livilo yo lwa ni valoyi, ni kuwukela vale va mahako wugango, ni vale va xambanyako ta makuhu, ni vale va kanganyisako mthumi, ve honyola madingano a tinoni, ni vo felwa ngu vaveleki, ni vawuyi, kambe kha va ni thavi, kuwomba Mkoma wa Mabutho a Tiyimbi.

Jeremiya 23:14

Aniko ngu ka vaprofeti va Jerusalema ni woni silo so thisa ngutu: Vona va maha wugango, ve hemba makuhu; ve tsanisa mawoko a vamahi va kubiha, kasi ku si hunduluki ni wammweyo amu ka wubihi wakwe; kwangu, va fana ni Sodhoma, vaaki va Jerusalema va fana ni Gomora.

Vahebheru 4:13

Kha txi nga ho txiwumbwa ni txa tximwetxo txi sikotako kusisala masoni ka Txizimu, nguko, sotshe si tulekile si txi maneka si di ha kubasani masoni ka wule hi fanelako kuya thethiswa ngu ngene.

Jeremiya 29:21

Mkoma wa Mabutho a Tiyimbi, Txizimu txa Israyeli, a khene xungetano ngu Ahabi, mwana Kolaya, ni Zedhekiya, mwana Maaseya, ava va mi profetelako makuhu ditinani kwangu: Wona, ni na va ningela manzani ka Nebhukodhonosori, mfumeli wa Bhabhilona; ene a na va daya masoni kwanu.

Jeremiya 16:17

Nguko maso angu ma ti wonetela tinzilani kwawe kotshe; kha va sisala masoni kwangu, ni si onho sawe kha si sisaleki masoni kwangu.

Mavingu 5:21

Nguko tinzila ta m'thu ti wonwa ngu maso a Mkoma, kambe ene wa xaxameta totshe tinzila ta m'thu.

Mtuletelo 3:14

Ka ngelozi ya Dibanza da Laodhikheya, bhala u txi khawe: “A womba tiya awu i ku Amen. Fakazi yo thembeka ni ya ditshuri, makhato a sivangwa sa Txizimu.

Mtuletelo 1:5

ni ka Jesu Kristu i ku fakazi ya kuthembeka, matiwula ya vafi, Mkoma wa votshe vafumeli va mafu. Kwakwe, ene a hi randako, ene a nga hi kuwula sionho sathu ngu mnoha wakwe,

Malakiya 2:14

Se mi txi khanu: Ngu txani kani? Nguko Mkoma i fakazi hagari kwako ni msikati wa wujaha wako, awule awe u nga mbi thembeka kwakwe, na kuve ngene mpangalati wako, i ku msikati wa txitumelelano txako.

Zefaniya 3:4

Vaprofeti va dona mba kutikulisa, kambe kha va nga ni txithavo; vaphaxeli va dona va txhipisile wukhalo wo sawuleka, va txi ndaka mlayo.

Jeremiya 23:21

Kha na va ruma vaprofetivo, aniko va ta so tutumela vapune; kha na womba-womba navo, aniko va to profeta vapune.

Jeremiya 13:27

Ni wonile wugango wako, ni kudila ka kunavela kwako, wugango wako wo phindeletisa, amu mimangoni ni mu tithembweni. Dikhombo kwako Jerusalema! U na verela kala yihi mbimo na u si basiswi kani?

Genesisi 31:50

“Ngako u txi xupha vanana vangu, kambe ngako u txi teka vamwani vasikati, hahanze ka vanana vangu, hambiko ku si nga ni m'thu hagari kwathu, ti zive ti to Txizimu i fakazi hagari kwangu ni nawe.”

Genesisi 34:7

Mbimo yi vanana va majaha va Jakobe va nga wuya ngu bhuwani, ve ta engisa mhakeyo ya ndiyawe, vona va to henya ni kupandiseka ngutu, ngu mhakeyo yo nyenyeza yi nga mahwa ngu Sikemi nyumbani ka Israyeli, ngu kuotela ni mwana Jakobe, wa dihorana: Ayi i ku mhaka ya kuyila.

Valamuli 11:10

“Se madhota a Gilelyadhi ma to kha ona ka Jefta: Mkoma a na va fakazi hagari kwathu, nguko hi na maha madingano ni dipswi dako!”

2 Samuwele 13:12

Kambe Tamara a to m'gela ku khene: Ahim-him ndiyangu, u nga ni kurumete, nguko kha ti mahwi to nga eto amu Israyeli; u nga mahe wuphukuphuku wo nga wuwa.

Jeremiya 5:8

Vo nga vamatune va mahantxhi ma nga khura; mmwani ni mmwani a emba ngu kunavela msikati wa mwakelani.

Jeremiya 7:11

Ina nyumba yi yi dhanwako ngu ditina dangu, yi mahile phako ya makhamba masoni kwanu kani? Kunene, nani ni ti woni, kuwomba Mkoma.

Jeremiya 29:31

Rumela dipswi ka votshe va ku wukhumbini, u txi khawe: Mkoma a khene xungetano ngu Semaya wa niya Nehelame: Nga kule Semaya a nga profeta kwanu ni sa mruma, a txi mi maha mi themba makuhu.

Ezekhiyele 35:13

Anu mi ti mahile vahombe kwangu; ani ni ti pfite.

Jeremiya 23:16

Mkoma wa Mabutho a Tiyimbi a khene: Mi nga engiseleni timhaka ta vaprofeti vava va profetako kwanu, nguko va mi kanganyisa; va txhumayela siwoniso sa timbilu tawe vapune, na si si humi ngu ka txisofu txa Mkoma.

Jeremiya 23:32

Ina, na wukela vale va profetako makuhu, kuwomba Mkoma, ngako va txi yi xawutela, ve hambukisa vathu vangu ngu makuhu awe ni kulalata kwawe. Kuve ani kha na va ruma, hambi ku va elela; kha va na txivhuno txa txilo ka vava vathu, kuwomba Mkoma!