Jeremiya 29:10 - Bhiblia Yo Sawuleka

¹⁰ Nguko, Mkoma a khene: Aha ku no pinda mtxhanu wa magumi ni mambidi a malembe Bhabhilona, ni na mi alakanya, ni txi mi mahela ta tinene, ni txi mi wuyisa ka wuwa wukhalo.

Jeremiya 29:10 Referans Kwoze

Zakariya 7:5

Gela votshe vathu va ditiko diya, ni votshe vaphaxeli, u txi khawe: Mbimo yile mi nga ti tona, ni kudila, ka mtxima wa wutxhanu ni wa wutxhanu ni yimbidi, mndani ka malembe awa a mtxhanu wa magumi ni magumi mambidi, ina anu mi ti tonete ani, ngu ditshuri mi ti tonete ani kani?

Dhaniyeli 9:2

Ka dilembe do khata da kufuma kwakwe, ani Dhaniyeli, ni to pfisisa ngu mu ka mabhuku, ti taku mtengo wa malembe ale Mkoma a nga khene ka mprofeti Jeremiya, Jerusalema ku na xaselwa mndani ka mtxhanu wa magumi ni mambidi a malembe.

Jeremiya 27:22

Si na yiswa Bhabhilona si txi ya zumba kona, kala ka ditshiku di ni no si lava ngu dona, kuwomba Mkoma, ni txi si wuyisa ka wuwa wukhalo.

Jeremiya 25:12

Aniko ngako ku di pindile mtxhanu wa magumi ni magumi mambidi a malembe, ni na tsayisa mfumeli wa Bhabhilona ni ditiko da kona, ngu mhaka ya kuwekela kwawe, kuwomba Mkoma; ni ditiko da Vakaldheya ni na di maha diva txiwula, kala kupinduka.

Zefaniya 2:7

Mabambe mule ku na lumba miboti ya nyumba ya ka Judha, kuva va txi dyisela kona sifuyo; ni minova va na ya otela tinyumbani ka va ka Axikaloni, nguko Mkoma, Txizimu txawe, a na va endela, kambe a na va tshumetela tikhumbi tawe.

Jeremiya 27:7

Otshe matiko ma na mthumela, ene ni mwanana wakwe ni mtukulu wakwe, kala ku txi hoka mbimo ya ditiko dakwe, ngu msana keto nene a na khoziswa, ngu matiko amangi ni vafumeli va hombe.

2 Makronika 36:21

kasiku txi na tatiseka dipswi di Mkoma, a di womba ngu txisofu txa mprofeti Jeremiya, kala ku ditiko di txi titsakela ngu Masabbata a dona; di humula mbimo yotshe, kala mu ka mtxhanu wa magumi ni mambidi wa malembe.

Rute 1:6

Sekoko, ene a to khukha ditikoni ka Mowabhi ni vamane vakwe, nguko a ti engisile a di ditikoni ka Mowabhi, ati to Mkoma a endete vathu vakwe ngu kuvaninga sakudya.

2 Makronika 36:22

Sekoko, ka dilembe do khata da kufuma ka Siro, mfumeli wa Persiya (kuva di txi na tatiseka dipswi da Mkoma ngu txisofu txa Jeremiya), Mkoma a to wusa moya wa Siro, mfumeli wa Persiya, awu a nga kwangula ka dotshe ditiko dakwe, kumweko ni kubhala, a txi khene:

Ezra 1:1

Ka dilembe do khata da Siro, mfumeli wa Persiya (kuva di txi na tatiseka dipswi da Mkoma ngu txisofu txa Jeremiya), Mkoma a to wusa moya wa Siro, mfumeli wa Persiya, a nga kwangula ka dotshe ditiko dakwe, kumweko ni kubhala, a txi khene:

Jeremiya 25:11

Dotshe diya ditiko di na va marumbi ni txidiwukiso; ni matiko awa, ma na thumela mfumeli wa Bhabhilona, mndani ka mtxhanu wa magumi ni magumi mambidi a malembe.

Jeremiya 29:28

Ngu mhaka yeto, a nga hi rumelela mhaka aniya Bhabhilona, a txi khene: Wukhumbi wu ngadi wu txi na lapha; ti akeleni tinyumba mi zumba ka tona, mi phaya tithembweni, ni kudya mihando ya kona.

Jeremiya 29:32

Ngu konaho Mkoma a khene: Ani ni na tsayisa Semaya wa Nehelama ni vanana vakwe; kha na mbi va ni m'thu wo zumba hagari ka vathu vava, kambe kha na mbi wona makatekwa ni no mahela vathu vangu, kuwomba Mkoma, nguko a wombawombile to wukela Mkoma.

Jeremiya 30:3

Nguko ma ngadi ma txi ta masiku, kuwomba Mkoma, ayo ni no tshumeta ngu ona ava vo sungwa, i ku Israyeli ni Judha, kuwomba Mkoma. Ni na va wuyisa ditikoni mu ni nga ha vakokwani vawe, va na di fumela.

Jeremiya 33:14

“Wona taku, mata masiku, kuwomba Mkoma, ayo ni no tatisa mhaka ya yinene, ayi ni nga yi womba ngu nyumba ya ka Israyeli, mayelano ngu nyumba ya ka Judha.”

Zakariya 1:12

Sekoko, Ngelozi ya Mkoma yi to xamula yi txi kha yona: Awe Mkoma wa Mabutho a Tiyimbi, khu na mbi pfela wumbilu Jerusalema ni madhoropa a ka Judha, kala ka yihi mbimo, awa u nga ma henyela ka malembe awa a mtxhanu wa magumi ni magumi mambidi kani?

Ezra 1:2

Mkoma, Txizimu txa nzuma, a ni ningile yotshe mifumo ya ha mafuni; se a ni rwekile ku mu akela nyumba kona Jerusalema, i ku kona Judha.

Masalmo 102:14

Sithumi sako sa ma randa marigwi akwe, si na ni wusiwana ngu marumbi akwe.

Ezekhiyele 11:17

Ngu kumaha keto, womba ku khawe: Mkoma a womba tiya: Ni na mi sengeleta hagari ka vathu, kambe ni na mi wuyisa ngu ka matiko ale mi nga tshotshwa ka ona.