Jeremiya 27:15 - Bhiblia Yo Sawuleka

¹⁵ Nguko kha na va ruma, kuwomba Mkoma, vo profeta makuhu ngu ditina dangu, ku va ani ni txi na mi hangalasa, mi txi lova, anu ni vo va va mi profetelako makuhu.

Jeremiya 27:15 Referans Kwoze

Jeremiya 27:10

Nguko makuhu va profetako kwanu, kasi ku mi txi huma ditikoni kwanu mi txi yiswa kule; kuva ni txi na mi tutumisa, mi txi ya lova.

2 Makronika 25:16

Se ku to maheka taku, mbimo yile a nga txi womba-womba nayo, a to mxamula a txi khene: Va kuvekile kuva didhota da mfumeli kani? Malala, u lava kudawelwa txani kani? Sekoko mprofeti a to khukha a txi khene: Na ti wona ti to Txizimu txi navete ku kulovisa ngu mhaka ya timhaka tiya u nga timaha; khwa engisa dipswi dangu.

Mtuletelo 19:20

Kambe txikalani txi to ñolwa kumweko ni mprofeti wa makuhu, awu, ngu kuthumela txikalani, a nga ti mahile sixamaliso so kanganyisa ngu sona vale va nga amukela txixambanyo txa txikalani, ve khozela txithombe txa txona: Txikalani ni mprofeti wa makuhu va to rinzwa, va txi hanya, digovani ka mndilo, wu turako ngu txivavula.

Matewu 24:24

Nguko va na humelela vamesiya va makuhu ni vaprofeti va makuhu, ava va no maha sixamaliso ni sidiwukiso sa hombe, ahawa koza, idiku to koteka, hambi vasawuleki va ndi na timetwa.

Matewu 15:14

Va lekeni! Mabhofu ma thangelelako mabhofu-kulowe; se ngako dibhofu di txi ñoleta lisole dimwani dibhofu, votshe va na wela diphalani ngu wumbidi wawe.”

Jeremiya 29:9

Nguko va mi profetela makuhu ngu ditina dangu; kha na va ruma, kuwomba Mkoma.

Jeremiya 23:21

Kha na va ruma vaprofetivo, aniko va ta so tutumela vapune; kha na womba-womba navo, aniko va to profeta vapune.

Jeremiya 23:15

Ngu konaho, nda ku nga tona eto a wombako Mkoma wa Mabutho a Tiyimbi xungetano ngu vaprofeti: Ni na va dyisa manonwe ni ku va dyisa nyongwa, nguko kwa mbi sawuleka ku tshapela dotshe ditiko. Na ku txi huma ngu ka vaprofeti va Jerusalema.

Jeremiya 20:6

Na nawe Paxuri, ni votshe va zumbako nyumbani kwako mi na yiswa kuñolwani. Awe u na tsula Bhabhilona, eho u noya fela kona, ni kutshotshwa kona kumweko ni maxaka ako otshe, aawa u nga ma profetela makuhu.”

Jeremiya 23:25

Ni pfite ti va wombako vaprofeti, ava va profetako makuhu ngu ditina dangu, va txi kha vona: Ni lorile, ni lorile!

Jeremiya 29:8

Nguko Mkoma wa Mabutho a Tiyimbi, Txizimu txa ka Israyeli, a khene: Mi nga lundumisweni ngu vaprofeti vanu, ava va ku hagari kwanu, ni vahuteteli vanu, mi nga dhuke mi txi engisa miloro yawe.

Jeremiya 14:14

Mkoma a to ni xamula, a txi khene: Vaprofeti va profeta makuhu ngu ditina dangu; kha na va ruka, kha na va laya; kha na womba txilo kwawe. Va profeta kwangu siwoniso sa makuhu ni kuhuta, ta walo to divalisa timbilu tawe.

Jeremiya 38:22

Wona, vavasikati votshe va va nga sala nyumbani ka mfumeli wa ka Judha, va na yiswa ka vanana va mfumeli wa Bhabhilona; vavasikativo va na kha vona: “Vangana vako va ku kanganyisile, va ku xute; mikondo yako yi txhibete madhakani, vona va tshumelete msana.”