Jeremiya 25:3 - Bhiblia Yo Sawuleka

³ Kukhukhela ka dilembe da digumi ni mararu da kufuma ka Josiya, mwana Amoni, mfumeli wa ka Judha, kala ka diya ditshiku, mndani ka magumi mambidi a malembe ni mararu, Mkoma a ti womba-womba ni nani, ni di txhumayete kwanu i di ngadi mixo, aniko anu kha ma engisa.

Jeremiya 25:3 Referans Kwoze

Jeremiya 26:5

kuva mi txi na engisa timhaka ta sithumi sangu i ku vaprofeti, ava ni nga va rumela kwanu, i di ngadi mixo, aniko anu kha ma engisa;

Jeremiya 11:7

Nguko kukhukhela ditshikwedo ni nga humisa ngu dona vatate vanu ditikoni ka Egipta, kala kuhoka nyamsi, ni va gete ni txi ngadi ni vinduka ni mixo, ni va laya, ni txi khani: Engisani dipswi dangu!

Jeremiya 1:2

Awu dipswi da Mkoma di nga ta kwakwe, ka masiku a Josiya, mwana Amoni, mfumeli wa ka Judha, ngu dilembe da digumi ni mararu da kufuma kwakwe.

Jeremiya 7:13

Kona kuwa koko, mi di mahile totshe tiya, kuwomba Mkoma, ni wombile kwanu i di ngadi mixo, ni mi gela, aniko kha ma engisa; ni to mi dhana, kambe kha ma xamula.

Jeremiya 29:19

nguko kha va engisa timhaka tangu, kuwomba Mkoma, aha ni nga va rumelela sithumi sangu i ku vaprofeti ngu kusimamisa. Aniko kha ma engisa, kuwomba Mkoma.

2 Makronika 34:8

Ngu dilembe da wugumi ni mtxhanu ni mararu da kufuma ka Josiya, nga ku a di hetile kubasisa ditiko ni nyumba, mfumeli a to rumela Safani, mwana Azaliya, ni Mahaseya, mthangeli wa didhoropa, ni Jowa, mwana Jowakazi, mabhalani, kasiku va txi ya lulamisa Nyumba ya Mkoma, Txizimu txakwe.

2 Makronika 34:3

Ngu dilembe da wutxhanu ni mararu, da kufuma ka Josiya, i di ngadi dizambi, e khata kulava Txizimu txa Dhavhidha tate wakwe; se ngu dilembe da wugumi ni mambidi a to khata kubasisa ditiko da va ka Judha ni Jerusalema a txi thavisela makhalo awe o guleka, a txi wilela tiphande tawe ni sithombe so vatwa ni so wumbwa.

2 Timoti 4:2

Txhumayela dipswi, khutala ka mbimo yi yi fanelako ni ka mbimo yi yi si faneliko; kawuka, laya, gondisa ngu kuhonisela ni wuzivi.

Johani 8:47

Awu i ku wa Txizimu, a engisa mapswi a Txizimu. Anu kha mi engisi, nguko kha mi nga va Txizimu.”

Johani 8:2

Ngu mbimo ya mixo, a to tshumela eya woneka Dithepeleni, se votshe vathu va to ya tshangana hafuhi kwakwe. Ene a to khalahatsha a txi va gondisa.

Marku 1:35

Ni mixo, ku di ngadi phum, a to huma nyumbani eya ka wukhalo wa ekhalela, a txi ya khongela kona.

Jeremiya 44:4

Ni mi rumelete sotshe sithumi sangu i ku vaprofeti, ni mixo ngutu ku ta womba tiya: Mi nga maheni wubihi wu ni wu nyenyako.

Jeremiya 35:15

Se ni mi rumete sithumi, i ku vaprofeti, va txi phindula, ve rumela va txi kha vona: Hundulukani, konakuwa, mmweyo ni mmweyo nzilani kwakwe ko biha, mi txi txhukwatisa mithumo yanu ya yinene, kambe mi nga londeteleni simwani sizimu; kasi ku si thumela; se ngu kumaha keto, mi na zumba ka ditiko di ni nga mi ninga, anu ni vatate vanu; aniko kha ma riya tinzeve, hambi ku ni engisa ani.

Jeremiya 25:4

Kambe Mkoma a mi rumete sithumi sakwe sotshe, i ku vaprofeti; aniko anu kha ma engisa, hambi kuhuphuta tinzeve, kuva mi txi tipfa.

Isaya 55:2

Mi xakelela txani male ka sile i singako sakudya kani? Ni mihando ya mthumo wanu, ka sile si si khurisiko kani? Ni engiseni kha kwati, mi nadya so tshamba, ni mihefemulo yanu yi na tsaka ngu so nona.

Masalmo 81:13

Idiku ngamu yangu yi ti ko ni engisa! Idiku Israyeli a ti ko londisela tinzila tangu!

1 Vafumeli 22:3

Akabe mfumeli wa ka Israyeli a to khene ka sithumi sakwe: Ina kha mi tizivi taku didhoropa da Ramoti-Gileyadhi ndathu, ni ku hi ko dwe, hi si di honyoli manzani ka mfumeli wa Siriya kani?

Eksodha 8:20

Mkoma a wombile ka Mosi, a txi khene: Khukha ni mixo u txi ya ema masoni ka Faro; nguko ene a na huma a txi ya matini ka mnambo, u txi ya m'gela tiya: “Mkoma a khene: Leka vathu vangu va txi tsula, veya ni khozela.

Genesisi 22:3

Sekoko Abrahamu a to wuka ni mabimbi-kutxa, e longela mbongola yakwe, e teka sithumi simbidi kumweko ni mwanana wakwe Isaake, a txi funya ni tikhuni ta kuya hisa ngu tona mhamba; a to tsula ka wukhalo wu Txizimu txi nga mkomba wona.

2 Makronika 34:1

Josiya a khatile kufuma a di ni tanga ya mtxhanu wa malembe ni mararu, se a to fumela Jerusalema magumi mararu a malembe ni dilembe dimwendo.

2 Makronika 36:15

Mkoma Txizimu txa vatate vawe a va rumete dipswi dakwe ngu mitumi yakwe, nguko Mkoma a pfete wusiwana vathu vakwe ni Nyumba yakwe.

Jeremiya 7:25

Kukhukhela ditshiku di vatate vanu va nga khukha ngu dona ditikoni ka Egipta kala kuwa, ditshiku ni ditshiku, i di ngadi mixo, ni rumete kwanu sithumi sangu sotshe, i ku vaprofeti.

Jeremiya 32:33

Va ni tshuralete, kha va ni engisa; hambiko ni nga va gondisa kambe ni kambe, kha va engisa ti taku va kawukwa.

Jeremiya 35:14

Timhaka ta Jonadhabhe, mwana Rekabhi, ati a nga laya vanana vakwe ti to va si seli vhinya, va ti xayisile; kha va sela kala ni nyamsi kuwa; nguko va engisile mlayo wa tate wawe; ani koko nitako ni txi womba kwanu, ni phindula ni mi gela, aniko anu, kha ma ni engisa.

Jeremiya 36:1

Ngu dilembe da wumune da Jehoyakimi, mfumeli wa ka Judha, dipswi da Mkoma di to ta ka Jeremiya, di txi kha dona:

Jeremiya 36:2

Ti tekele dibhuku u txi bhala totshe timhaka ti ni nga kugela ngu Israyeli ni Judha, ni xungetano ni otshe matiko, kukhukhela ka ditshikwedo ni nga womba-womba ni nawe ka masiku a Josiya kala ni kuwa.

2 Vafumeli 17:13

Se Mkoma a to wukela Israyeli ni Judha, ngu dipswi da votshe vaprofeti, ni votshe vahuti, a txi khene: Hundulukani ka tinzila tanu to biha, mi vekisa milayo yangu ni sileleto sangu, madingano ni Milayo yotshe ni nga ninga vatate vanu, kambe ni nga rumela kwanu ngu sithumi sangu, i ku vaprofeti.

2 Makronika 24:19

A to rumela vaprofeti hagari kwawe, kasi ku e va wuyisa kambe ka Mkoma, kambe vona kha va lava ku mu engisa.

Jeremiya 19:15

A womba tiya Mkoma wa Mabutho a Tiyimbi, Txizimu txa ka Israyeli: Wona taku ni na tisa txitimwi ka diya didhoropa, ni ka sotshe sidhoropana, wotshe wubihi wu ni nga wu womba ngu ku diwukela, nguko va bangisile tithamo tawe, kuva va si engisi timhaka tangu.

Jeremiya 22:21

Ni wombawombile ni nawe ti txi ngadi ti kuhumela kwati, Aniko u txi khawe: “Kha ni na mbi engisa.” Ngu ona mahanyelo ako kukhukhela wananani, aku, khu na mbi pfa dipswi dangu.

Ezekhiyele 33:4

se ngako wule a pfako mpundu asi khatali, ditxhari di txi ta m'daya, mnoha wakwe wu na va txitimwi ka msungo wakwe.

Zakariya 1:4

Mi nga mahiseni kufana ni vatate vanu, avale vaprofeti vo khata va nga womba-womba kwawe, va txi kha vona: Mkoma wa Mabutho a Tiyimbi a khene: Hundulukani konkuwa ka tinzila tanu to biha, ni ka mithumo yanu yo biha. Aniko kha va ni engisa, hambi ku ni pfisisa, kuwomba Mkoma.