Jeremiya 25:12 - Bhiblia Yo Sawuleka

¹² Aniko ngako ku di pindile mtxhanu wa magumi ni magumi mambidi a malembe, ni na tsayisa mfumeli wa Bhabhilona ni ditiko da kona, ngu mhaka ya kuwekela kwawe, kuwomba Mkoma; ni ditiko da Vakaldheya ni na di maha diva txiwula, kala kupinduka.

Jeremiya 25:12 Referans Kwoze

Dhaniyeli 9:2

Ka dilembe do khata da kufuma kwakwe, ani Dhaniyeli, ni to pfisisa ngu mu ka mabhuku, ti taku mtengo wa malembe ale Mkoma a nga khene ka mprofeti Jeremiya, Jerusalema ku na xaselwa mndani ka mtxhanu wa magumi ni mambidi a malembe.

Isaya 13:19

Se Bhabhilona, ditiko do tshura, kupinda matiko otshe, adi Vakaldheya va ti dhumisako ngu dona, di na fana ni Sodhoma ni Gomora, mbimo yi Txizimu txi nga ma haxula.

Jeremiya 29:10

Nguko, Mkoma a khene: Aha ku no pinda mtxhanu wa magumi ni mambidi a malembe Bhabhilona, ni na mi alakanya, ni txi mi mahela ta tinene, ni txi mi wuyisa ka wuwa wukhalo.

Isaya 14:23

Ni na di maha wukhalo wa sikhovha, ni txiziva txa mati a kusina, na di hiyela ngu diphiyelo di di lovisako, kuwomba Mkoma wa Mabutho a Tiyimbi.

Ezekhiyele 35:9

Ni na kumaha dirumbi da yotshe mbimo, kambe madhoropani kwako kha ku na mbiswa kuve ni vo zumba; ngu kumaha keto, mi na tiziva taku ani ngani Mkoma.

Jeremiya 25:14

Nguko ni vona va na khoziswa ngu matiko amangi, ni vafumeli va hombe; ni na va tshumetela kudingana ni simaho sawe, ni mithumo ya manza awe.

Jeremiya 23:2

Ngu konaho, Mkoma, Txizimu txa Israyeli, a khene xungetano ni vadyisi va vathu vangu: “Anu mi hangalasile tinvuta tangu, mi txi ti tutumisa, kha ma khatala ngu tona. Ni na mi tsayisa ngu mhaka ya kubiha ka simaho sanu, kuwomba Mkoma.”

Isaya 46:1

Bheli a wisilwe, Nebho a namile, sithombe sawe si vekwa txitimwi ka sihari, txitimwi ka sihari sa hombe; mirwalo ya tithundu tanu, ya karalisa sihari sa hombe so karala.

Isaya 20:1

Ka dilembe di Taritani a nga ya Asidhodhi ngu kurumwa ngu Sargoni, mfumeli wa Asiriya, a to lwa ni ditiko da Asidhodhi, e di teka,

Isaya 15:6

Nguko mati a Ninirimi ma nava ma di phwite; nguko mwasi wu omile, kupwateka ni diphundenyana se kha ku nga ni dizokoro ni da dimwedo do rumbuka.

2 Vafumeli 24:1

Ka masiku a Jehoyakimi, ku to humelela Nabhukodhonozori, mfumeli wa Bhabhilona, e xoma yimbi yo wukela Jehoyakimu e mmaha khumbi yakwe mndani ka malembe mararu; msana keto a to phemberuka e m'wukela.

2 Makronika 36:22

Sekoko, ka dilembe do khata da kufuma ka Siro, mfumeli wa Persiya (kuva di txi na tatiseka dipswi da Mkoma ngu txisofu txa Jeremiya), Mkoma a to wusa moya wa Siro, mfumeli wa Persiya, awu a nga kwangula ka dotshe ditiko dakwe, kumweko ni kubhala, a txi khene:

Masalmo 137:8

O! Awe mwanana wa muhorana wa Bhabhilona, u no xaselwa! A katekile awu a no kutshumetela nga ti u nga mahisa tona kwathu.

Isaya 33:1

Dikhombo kwako u handako na u sa handwa, awe u kanganyisako vale, va nga mbi kukanganyisa! Mbimo yi u no heta kuhanda, u na handwa; u txi na heta kukanganyisa, u na kanganyiswa nawe.

Jeremiya 27:7

Otshe matiko ma na mthumela, ene ni mwanana wakwe ni mtukulu wakwe, kala ku txi hoka mbimo ya ditiko dakwe, ngu msana keto nene a na khoziswa, ngu matiko amangi ni vafumeli va hombe.

Jeremiya 27:22

Si na yiswa Bhabhilona si txi ya zumba kona, kala ka ditshiku di ni no si lava ngu dona, kuwomba Mkoma, ni txi si wuyisa ka wuwa wukhalo.

Habhakuki 1:17

Ina a nga maha taku e tshakunuta likoka lakwe, asi leki kusimama e dayela vathu kani?