Jeremiya 23:11 - Bhiblia Yo Sawuleka

¹¹ “Nguko votshe vaprofeti ni vaphaxeli kha va sawuleka, hambi nyumbani kwangu ni mani wubihi wawe, kuwomba Mkoma!

Jeremiya 23:11 Referans Kwoze

Zefaniya 3:4

Vaprofeti va dona mba kutikulisa, kambe kha va nga ni txithavo; vaphaxeli va dona va txhipisile wukhalo wo sawuleka, va txi ndaka mlayo.

Jeremiya 6:13

Nguko va ti ningetete mu ka kumbilukela, vanana ni vahombe, vaprofeti ni vaphaxeli, votshe va onga.

Ezekhiyele 23:39

Ngako va nga phaxela ngu vanana vawe ka sithombe sawe, va ti ti ta ka nyumba yangu yo sawuleka ka dona ditshiku edo, va txi ta yi nyenezisa; kambe va si mahile hagari ka nyumba yangu.

Jeremiya 32:34

Aniko va to mahetela manyala awe, nyumbani mu kudhanwako ngu ditina dangu, va txi di nyenyezisa.

Ezekhiyele 8:16

Se a to ni yisa ka mthanda wa mndani ka Nyumba ya Mkoma, wona taku ha txikeni ka Dithepele da Mkoma, hagari ka m'hubhe ni txiluvelo, ku ti ti ni mtengo wo dingana magumi mambidi a vavamna ni mtxhanu, va nga ti ti tshuralete Dithepele da Mkoma, tikhohe tawe ti txi rendekela wutxani; kambe va ti ti khozela ditambo va di rendekete wutxani.

Jeremiya 11:15

Txirandwa txangu txi maha txani nyumbani kwangu aku txi nga maha manyala o tala kani? Sifungo ni nyama yi nga basiswa si nga thavisa kubiha kwako kani? Ngako u txi maha to biha ngu kona u tsakako!

Jeremiya 8:10

Ngu konaho ni na ningela vasikati vawe ka vamwani, ni tithembwe tawe ka va va no ti honyola. Nguko votshe va ti ningetete mu ko navela, kukhukhela ka wam'dotho kala ka wa hombe, kukhukhela ka vaprofeti kala ka vaphaxeli, votshe va kanganyisa.

Jeremiya 7:30

Nguko vanana va ka Judha va mahile kubiha masoni kwangu, kuwomba Mkoma; va wuletile manyala awe mu ka nyumba yi yi dhanwako ngu ditina dangu, ve yi nyenyezisa.

2 Makronika 36:14

Votshe vathangeli va vaphaxeli ni vathu votshe va to londetela manyala ni sihena so nyenyeza sa vamatiko, va txi nyenyezisela Nyumbani ka Mkoma, mule a nga ti ti kusawulekisete Jerusalema.

Ezekhiyele 8:11

Kambe ku ti ni mtxhanu wa magumi ni magumi mambidi a vavamna, ka madhota a nyumba ya ka Israyeli, ni Jezaniya, mwana Safani, va nga ti ti hagari ka sona, va ti ti emile masoni ka sile so pendwa, kambe mmweyo ni mmweyo a ti ti ni dibaselo dakwe; se ku ti ti kwela wutshi wo thisa wa dibaselo.

Ezekhiyele 7:20

Va ti kulisile ngu ku ti bombisa ngu silivhela ni nzalama; kambe va mahile ngu sona sifananiso sa manyala awe sa kwa mbi tumeleka; ngu toneto, ni si mahile si maneka i di nzambwa.

Jeremiya 23:15

Ngu konaho, nda ku nga tona eto a wombako Mkoma wa Mabutho a Tiyimbi xungetano ngu vaprofeti: Ni na va dyisa manonwe ni ku va dyisa nyongwa, nguko kwa mbi sawuleka ku tshapela dotshe ditiko. Na ku txi huma ngu ka vaprofeti va Jerusalema.

Jeremiya 5:31

Vaprofeti va profeta makuhu, hambi vaphaxeli va fumela va txi laywa ngu vona; ngu toneto vathu vangu va ti lavako. Aniko mi na maha txani magwito ka kona kani?

2 Makronika 33:7

Manasi a to veka txithombe txo vatwa, e txi emisa Nyumbani ka Txizimu; amule Txizimu txi nga nga womba ka Dhavhidha ni ka mwanana wa kona Solomoni ku khene: Ka yiya nyumba, kona Jerusalema, i ku kona ni nga kusawula hagari ka totshe tihunzu ta ka Israyeli, ni na veka ditina dangu ngu ha ku si gwitiko.

2 Makronika 33:5

Sotshe siphatiphati sa nzumani a to si akela siluvelo, ka yotshe mithanda ya yimbidi ya Nyumba ya Mkoma.

Jeremiya 50:6

Vathu vangu ndinvuta to mwalala, vadyisi va tona ngu vona va nga ti mwalata, va ti lekile ti txi pengela kuya mimangoni, ti si alakanyi kutshumelela dizumboni ka tona.

Sidilo 2:20

Awe Mkoma, wona! U txi wonisisa ti to i mani u mmahelako tiya. Ina vamame va fanete ku ti dyela vanana va va va randako, kani? Ina vaphaxeli ni vaprofeti va dingana kudawa va txi fela ka wukhalo wako, wo sawuleka kani?

Ezra 10:18

Se ku to maneka hagari ka vanana va vaphaxeli avale va nga tekana ni vavasikati va mamwani matiko: Ka vanana va Jesuwa, vanana va Jozadhake, ni vanawe: I ku Mahaseya, ni Eliyezeri, ni Jaribhe, ni Gedhaliya.

Ezekhiyele 44:10

Kambe va ka Levhi vale va nga ya kule ni nani, mbimo yile Israyeli i nga ti mpepeseki, va nga ti ti maneka va di hambukile, ve hambana ni nani, va txi londetela sithombe sawe, evo va na rwala wubihi wawe vapune.

Zefaniya 3:3

Vathangeli va dona ndingonyamo ti bhongako hagari ka dona; valamuli va dona maxolwa a mbimo ya minova, ma si siyiko marambu a kutadya mangwana.