Jeremiya 22:15 - Bhiblia Yo Sawuleka

¹⁵ Ina u na fuma ngu ku u ti ningelako mthumoni ka makedhari kani? Tate wako a dyite ni kusela. Aniko a to lamula ngu mlayo ni fanelo, a to humelela ngu mhaka ya toneto.

Jeremiya 22:15 Referans Kwoze

2 Vafumeli 23:25

A sanzi kufuma Josiya, kha nga maneka mfumeli wo fana nayo, wo hundulukela ka Mkoma ngu yotshe mbilu yakwe, ni muhefemulo wakwe wotshe, ni mtamo wakwe wotshe, madingano ni wotshe Mlayo wa Mosi; ni msana kwakwe, kha ka nga maneka mmwani wo fana nayo.

Isaya 3:10

Gelani va vo lulama ti to va katekile, nguko va na dya mihando ya mithumo yawe.

Ekleziyaste 10:17

U katekile awe ditiko di mfumeli wa dona i ku mwanana wa vahombe, vathangeli va kona vadyako ngu mbimo ya kona, kasi kuwuteta mitamo, na i si nga kutilevisa.

Mavingu 25:5

Thavisa muonhi masoni ka mfumeli, se txitulu txakwe txa wukoma txi na tsaniswa ngu kululama.

Mavingu 29:4

Mfumeli wo lulama wa tsanisa ditiko dakwe, aniko awule i ku mngana wo xavwa, wa di hoxota.

2 Vafumeli 22:2

Se a to maha ta tinene masoni ka Mkoma; kambe a to tsimbila ngu totshe tinzila ta tate wakwe Dhavhidha, kha ngaza e khukha ka tona, eya txinene mwendo txibhabha.

Jeremiya 42:6

Hambi i di ta tinene, mwendo to biha, titako ngu ka Mkoma, Txizimu txathu, awu hi kurumako kwakwe, hi na ti londisa, kasi hi txi na humelela kha kwati, hi londisa dipswi da Mkoma, Txizimu txathu.

Jeremiya 21:12

Anu nyumba ya ka Dhavhidha, Mkoma a khene: Lamulani ngu kululama i di ngadi mixo; mi hulukisa wu a handwako, manzani ka wu a mtsindavetako; kasi ku kuhenya kwangu ku si turi nga mndilo, ku txi hisa ha kaku ku txi pwateka ni wo tima, ngu mhaka ya wubihi wa mithumo yanu.

Mavingu 21:3

Ta tumeleka ngutu ka Mkoma kumaha kulumula, ni kulamula ngu kululama, kupinda ku mninga mphaxo.

1 Vafumeli 10:9

A na Bongwe Mkoma Txizimu txako, a nga mana kutsakiswa ngu ngawe, kasi e kuveka ha txituluni ka wukoma ka Israyeli; nguko Mkoma wa randa Israyeli yotshe mbimo; ngu mhaka yeto, a kumahile mfumeli, kasi uva ni kupimisa ni wululamo.

2 Samuwele 8:15

Dhavhidha koko, a to fuma dotshe ditiko da Israyeli; e lamula ngu kululama ka votshe vathu vakwe.

1 Vakorinto 10:31

Ngu toneto, mwendo ma dya, mwendo ma sela, mwendo mi thuma tihi ni tihi, ti maheni ngu moya wa kudhumisa Txizimu.

Mithumo 2:46

Ditshiku ni ditshiku va txi khutala kuya tshangana ngu mbilu yimweyo Dithepeleni, va txi bhandelana dipawu mitini kwawe, va txi dya sakudya ngu kutsaka ni kubasa ka mbilu.

Luka 11:41

Aniko ningani ka sikulungu asi mi ku naso, ngu kona silo sotshe si no va si di basile kwanu.”

Jeremiya 23:5

Se mata masiku, kuwomba Mkoma, aawa ni no wusela ka ona Dhavhidha dikhukhu do lulama. A nava mfumeli wa txitshurwa, a na humelela, ene a na lamula ngu mlayo ni wululamo, ha ditikoni.

Jeremiya 22:18

Ngu konaho, Mkoma a womba madingano ni Jehoyakimu, mwana Josiya, mfumeli wa ka Judha, a txi khene: Kha va na mbi m'dilela, va txi kha vona: Yowe, mwanathu wa txiwamna! Mwendo yowe, mwanathu wa txisikati! Se kha va na mbi peka huwa ngu ngene, va txi kha vona: Yowe, awe nyamne wangu! Mwendo ku yowe awe mthaviseki!

Jeremiya 22:3

“Mkoma a khene: Lamulani ngu fanelo ni kululama, mi txi hulukisa wu a handwako manzani ka mtsindaveti, mi nga xaniseni mluveli, ni txisiwana, ni noni, mi nga va tsindaveteni, hambi kutheketa mnoha wa va va kuwalo mnandu ka wuwa wukhalo.”

Isaya 33:16

Awuwa a na zumba txitimwi; mikhokhola ya marigwi yi na maha wuthavelo wakwe wo guleka, a na ningwa dipawu dakwe, ni mati akwe ma na maneka.

Isaya 9:7

Kuanda ka kufuma ni kudikha kwakwe, kha ku na mbi va ni magwito txitimwi ka txikhalo txa wukoma txa Dhavhidha, ni ka mfumo wakwe, kasi kutsanisa ni kuseketela ngu wulamuli ni kululama, kukhukhela konkuwa, kala kupinduka; lirando la Mkoma wa Mabutho a Tiyimbi, a na maha eto.

Ekleziyaste 2:24

Ina hi nga ta tinene ku m'thu edya, e sela, e tsakisa mbilu yakwe, ngu mthumo wakwe kani? Ni woni ti to eto ni tona, tita ngu ka dianza da Txizimu.

Mavingu 31:9

Tula txisofu txako, lamula ngu kululama, u lamulela sisiwana ni vale va pwatako somaha.

Mavingu 20:28

Wunene ni ditshuri ngu sona si xayisako mfumeli, se wukoma wakwe wu tsaniswa ngu wunene.

2 Makronika 34:2

Se a to maha ta tinene masoni ka Mkoma, a to tsimbila ngu nzila ya Dhavhidha tate wakwe, kha ngaza e khukha ka yona eya txinene mwendo txibhabha.

1 Makronika 3:15

Vanana va Josiya ngu vava: Matiwula i Jowanani, wa wumbidi i Jeyowakimi, wa wuraru i Zedhekiya; wa wumune i Salumi.

Dhewuteronome 4:40

Xayisa sirumo sakwe ni milayo yakwe, ayi nyamsi ni ku leletako, kasi ku totshe ti txi tsimbila kwati kwako ni ka vanana vako, msana kwako, masiku ako ma txi anda ha ditikoni, adi Mkoma, Txizimu txako, a no kuninga, di txi maha dako, kala kupinduka.”

Jeremiya 7:5

Nguko ngako mi txi txhukwatisa mahanyelo anu ni mithumo yanu, ngako mi txi lamula ngu kululama hagari ka m'thu ni mwakelani wakwe,

2 Makronika 35:22

Kambe Josiya kha tshembereka e wona msana; aniko a to tihunda, a txi yalwa ni Neko; kha engisa mapswi a Neko, ale ma nga huma ngu txisofuni ka Txizimu; a to ta lwa ni Neko mkovani ka Megidho.

2 Makronika 35:26

Sekoko mithumo yimwani ya Josiya, ni wunene wakwe, madingano ni tile ti nga bhalwa ka Mlayo wa Mkoma,