Jeremiya 19:11 - Bhiblia Yo Sawuleka

¹¹ u txi khawe: Mkoma wa Mabutho a Tiyimbi a khene: Ni na phwatisa vava vathu ni diya didhoropa, kufana ni kungako ku txi faywa khadi ya muwumbi, ti si kotekiko kutshumela yi tshanganiselwa kambe. Va na tshotshwa Tofeti, ngu kupwata wukhalo wumwani.

Jeremiya 19:11 Referans Kwoze

Masalmo 2:9

U na va bhandisa ngu ndonga ya simbi, u txi va fayetela kufana ni khadi ya mraka.”

Isaya 30:14

Se a na txi faya, nga ti txi fayiswako tona txiya txa muwumbi, a txi txi faya, kha na mbi txi tsetsa; kha ku na mbi maneka ni txirengele tximwetxo, txo hala ngu txona mndilo ha txikho, mwendo kureka ngu txona mati txisimani.

Sidilo 4:2

Vanana vo randeka va Siyoni ava va nga ti fananiswa ni nzalama yo tshura se konkuwa va fana ni tikhadi ta dibumba, ti ti nga mahwa ngu manza a muwumbi.

Mtuletelo 2:27

Se a na ma dyisa ngu ndonga ya simbi ya wukoma, e ma fayetela nga tikhadi ta dibumba,

Jeremiya 13:14

Ni na va phwatisa ve gumulana, vatate ni vanana, kuwomba Mkoma. Kha ni na mbi va divalela, hambi ku va tsetsa. Kha ni na mbi va ni wumbilu ha ka ku ni si va lovisi.

Jeremiya 19:6

Ngu konaho, masiku mata, kuwomba Mkoma, ti taku awuwa wukhalo kha wu na mbi ngadi wu dhanwa ku Tofeti, hambi ku va mkova wa mwana Hinomi, aniko mkova wo daya.

Mithumo 21:11

Ene a to hi tshuketela e teka libhande la Paulo, a txi ti sunga ngu lona minenge ni mawoko, a txi khene: “Moya wo Sawuleka wu womba tiya: ‘Vajudha va na ya sungisa tona tiya, Jerusalema, dijaha di i ku nyamne wa libhande liya, se va na di ningela manzani ka vamatiko.’ ”

Mavingu 6:15

Ngu kumaha keto, kukhundumuswa kwakwe ku nata ngu txidhukisa; a na funyeletelwa ngu txikavikavi, ku si maneki ni kukalamuka.

Jeremiya 19:12

Nguto ni no maha ngu wuwa wukhalo, kuwomba Mkoma, ni ka vaaki va kona; ina didhoropa diya ni na di maha ku nga Tofeti.

Jeremiya 48:38

Txitimwi ka totshe tinyumba ta Mowabhi ni mu ka tinzila takwe ta hombe ku na vaho tihuwa ta hombe; nguko ni fayile Mowabhi nga fuko ya kwa mbi tsakisa, kuwomba Mkoma.

Jeremiya 51:63

Se aha u no gwita kugonda dibhuku diya, u na di sunga ha ka dirigwi u txi di vinza hagari ka Ewufrate.

Jeremiya 25:34

Anu vadyisi, pekani huwa mi txi dila. Pulukutani dikhumani, anu vahombe va mtxhambi. Nguko masiku a kudawa kwanu ma hokile, ni na mi hangalasa, mi na wa, nga txiya txa lisima.