Jeremiya 18:8 - Bhiblia Yo Sawuleka

⁸ aniko ngako ditiko di ni nga womba-womba ngu dona, di txi hunduluka kubihani ka dona, nanani ni na hunduluka ni leka ku di rumelela dikhombo di ni nga ti lavile ku di rumela.

Jeremiya 18:8 Referans Kwoze

Ezekhiyele 18:21

Aniko ngako m'bihi a txi hunduluka ka sionho si a nga si maha, se a txi xayisa sotshe sileleto sangu, a txi maha tinene ni kululama, ngu ditshuri a na hanya; kha na mbi fa.

Jeremiya 26:13

Ngu konaho, phemberusani koko mahenyelo anu ni simaho sanu, mi txi engisa dipswi da Mkoma, Txizimu txanu, sekoko Mkoma a na hunduluka ka dikhombo di a ngadi womba ngu nganu.

Hoseya 11:8

Ni ndi na kulekisa kutxani, awe Efrayime kani? Ni ndi na kuningelisa kutxani, awe Israyeli kani? Ni ndi na kumahisa kutxani ku nga Adhama kani? Ina ni ndi na kuveka ku nga Zebhoyimi kani? Mbilu yangu yi txitxile mndani kwangu, kotshe kunavela kwangu ka tura.

Jeremiya 26:3

Mwendo va na engisa, mmweyo ni mmweyo a txi hunduluka ka nzila yakwe yo biha, kasi ni si va neheli dikhombo di ni nga xuva ku va mahela, ngu mhaka ya simaho sawe so biha.

Valamuli 2:18

Se mbimo yile Mkoma a nga ti ti va wusela valamuli, Mkoma a ti ti ema ni mlamuli, a txi va hulukisa manzani ka valala vawe, ka otshe masiku a mlamuliyo; nguko Mkoma a ti ti ti laya ngu tihuwa tawe, ngu mhaka ya vale va nga ti ti va xupha, ni ku va xanisa.

Masalmo 106:45

a to alakanya txitumelelano txi a nga maha navo e telwa ngu wusiwana navo, nguko lirando lakwe nda hombe.

Masalmo 135:14

Mkoma a na lamula vathu vakwe e pfela wusiwana sithumi sakwe.

Masalmo 90:13

Wuya kwathu, Mkoma! U na henya kala mbimo muni? Telwa ngu wumbilu ngu vathu vako!

2 Makronika 12:6

Sekoko vathangeli va Israyeli ni mfumeli va to ti veka hahatshi, va txi kha vona: Mkoma a lulamile.

Dhewuteronome 32:36

Mkoma a na emela vathu vakwe, kambe a na va ni wumbilu ngu sithumi sakwe. Ngako a txi wona ti to mtamo wawe wu ngumile ni ti to kha ka sala m'thu wo sungwa mwendo wo thuseka,

Eksodha 32:12

Nguko Vaegipta va na womba va txi kha vona: Ene a va humisile ngu moya wa kubiha, kasiku a txi ya va daya kona mimangoni a txi va fuvisa ha mafuni! Tshumeta txiviti txa kuhenya kwako, u txi tshumeta txikhawuliso txi u nga ti lava ku txi maha ka vathu vako.

Jona 4:2

Se a to kombela ka Mkoma, a txi khene: Yowe! Mkoma! Ina hi nga tona tiya ni nga womba, ni di ngadi ditikoni kwangu kani? Ngu mhaka yeto, ni ti vhikete, ni tutumela kuya Tarxixi, ngu kuziva taku, u Txizimu txo pfela, ni wumbilu, txo timisela, ni kutala ngu wunene, ni ti taku wa hunduluka ka to biha.

Ezekhiyele 33:13

Ngako ni txi womba ka mlulami ku khani, ngu ditshuri u na hanya, se ene ngu kuthemba kululama kwakwe a txi maha to biha, kha ku na mbi alakanywa ni txa tximwetxo txa wululamo wakwe, aniko wubihi wakwe, wule a wu mahako, a na fela ka wona.

Ezekhiyele 33:11

Va gele, ani na hanya, kuwomba Mkoma Txizimu, kha ni tsakiswi ngu kufa ka m'bihi, aniko ngu ku m'bihi e hunduka ka nzila yakwe, e hanya; hundulukani, hundulukani ka tinzila tanu ta walo; nguko koko mi na fela txani, anu va nyumba ya ka Israyeli kani?

Jeremiya 42:10

Ngako mi txi zumba ngu wunene, ni na mi aka, ni si mi khundumusi; ni na mi phaya ni si mi duli, nguko na ti laya ngu wubihi wu ni nga mi mahela.

Jeremiya 36:3

Mwendo va ka Judha va na engisa kubiha kotshe ku ni xuvako ku va mahela; ati taku mmweyo ni mmweyo a txi hunduluka nzilani kwakwe ko biha, ni txi tsetselela wubihi wakwe ni txionho txakwe.

Jeremiya 26:19

Ina Ezekhiya, mfumeli wa ka Judha, ni dotshe ditiko da ka Judha, va mu date kani? Ina kha thava Mkoma, a txi kombela dikato, kuva Mkoma a txi hunduluka ka dikhombo di a nga womba ngu dona kwawe kani? Se athu, kha hi njo mahela wubihi mihefemulo yathu kani?

Jeremiya 15:6

U ni lekile, kuwomba Mkoma, u tshumelete msana. Ngu konaho, ni nawulutile dianza dangu, ni kulovisa. Ni karate ngu ku kudivalela.

Jeremiya 12:16

Ngako va di gondile tinzila ta vathu vangu, ti taku va txi xambanya ditinani kwangu, va txi kha vona: Mkoma a hanyako; nga ku va nga gondisa vathu vangu kuxambanya ngu Bhahali, sekoko va na maneka hagari ka vathu vangu.

Ezekhiyele 33:14

Ngako kambe ni txi khani ka muonhi: Ngu ditshuri u na fa; a txi hunduluka ka txionho txakwe e maha kululama,

Eksodha 32:14

Sekoko Mkoma a to thindeka ka txikhawuliso txi a nga ti pimisile ku txi maha ka vathu vakwe.

Ezekhiyele 33:12

Awe koko mwanana wa m'thu, womba ka vanana va va ka kwanu, u txi khawe: Kululama ka wo lulama, kha ku na mbi mmaha e huluka ka ditshiku da kuhoheta kwakwe; se m'bihi kha na mbi dawa ngu wubihi wakwe, ka ditshiku dile a hundulukako ka wubihi wakwe; hambi mlulami kha na mbi hanya ngu kululama ka ditshiku dile a no onha.

Amosi 5:15

Vengani wubihi, mi randa wunene, vekani wululamo ha banza kutilava Mkoma, Txizimu txa Mabutho a Tiyimbi, txi na pfela wusiwana masalelwa ya Josefa.