Jeremiya 18:10 - Bhiblia Yo Sawuleka

¹⁰ se ngako ditikwedo di txi maha kubiha masoni kwangu, di si engisi dipswi dangu, sekoko ni na leka wunene wu ni nga ti xuvile ku va mahela wona.

Jeremiya 18:10 Referans Kwoze

Ezekhiyele 33:18

Ngako mlulami a txi huma ka wululamo wakwe, a txi maha to biha, a na fela ka tona.

1 Samuwele 2:30

Ngu kumaha keto, Mkoma Txizimu txa Israyeli, a khene: Ngu ditshuri ani ni wombile ti taku, nyumba yako ni nyumba ya tate wako, ti na tsimbila masoni kwangu kala kupinduka; aniko konkuwa, kuwomba Mkoma,: Timhaketo ti nave kule ni nani! Nguko ni na thava avale va ni thavako, kambe avale va ni eyisako va na wiswa tingana.

Ezekhiyele 18:24

Aniko ngako m'thu wo lulama a txi leka kululama kwakwe, se a txi maha ta kwa mbi lulama, a txi maha totshe ta manyala tile ti mahwako ngu m'bihi, ina a nga hanya kani? Kotshe kululama kule a nga kumaha, kha ku na mbi alakanywa; wuhambunyeti wu a nga hambunyeta ngu wona, ni txionho txile a nga txi maha, a na fela ka sona.

1 Samuwele 13:13

Sekoko Samuwele a to khene ka Sawule: U mahile wuphukuphuku! Kambe khu ya xayisa mlayo wule Mkoma, Txizimu txako txi nga kuleleta wona. Nguko konkuwa Mkoma a di na tsanisa mfumo wako txitimwi ka Israyeli kala kupinduka.

Masalmo 125:5

Aniko avale va hambukako ve londisa tinzila to gombonyeka Mkoma a na va lovise kumweko ni sigevenga. Kudikha ku nave ni va ka Israyeli!

1 Samuwele 15:11

Na tilaya nguku ni nga veka Sawule e maha mfumeli; nguko a lekile kulondeta sileleto sangu, kambe kha xayisa mapswi angu. Sekoko Samuwele a to henya, e dila ka Mkoma wusiku wotshe.

Zefaniya 1:6

ni va va lekako kulondeta Mkoma, ni vale va si laviko Mkoma, hambi ku wotisa txilo ngu ngene.

1 Samuwele 15:35

Se Samuwele kha swa kambe a txi wonana ni Sawule kala ka ditshiku da kufa kwawe; nguko Samuwele a ti ti ni wumbilu ni Sawule. Se Mkoma a to tilaya ngu kule a nga veka Sawule kuva mfumeli txitimwi ka va ka Israyeli.

Mitengo 14:22

Kambe votshe vathu ava va nga wona kuphatima kwangu, ni sixamaliso si ni nga si maha kona Egipta, ni mu txiwulani, va nga ni duka digumi da sikhati; kambe vathu vava kha va engisi dipswi dangu,

Ezekhiyele 45:20

U na maha toneto kambe ka ditshiku da wutxhanu ni mambidi ka mtxima, ngu mhaka ya vale va hohetako, ni vale va ti timelelako; mi na divaleliseto yotshe nyumba.

Mitengo 14:34

Nga ha mi nga heta mune wa magumi a masiku ngu kuxola ditiko, konkuwa mi na heta kambe mune wa magumi a malembe; nguko dilembe dimwedo di dingana ditshiku, kasi mi tiziva tito, kuhambana kwangu ni nanu nga kutxani!

Mitengo 14:23

ngu mhaka ya eto, ava vathu, lambi, kha va na mbi di wona ditiko di ni nga xambanya ka vatate vawe ti to ni na va ninga, lambi ni wammweyo wa va va nga ni kanyisa a no wona ditikodo.

Ezekhiyele 33:12

Awe koko mwanana wa m'thu, womba ka vanana va va ka kwanu, u txi khawe: Kululama ka wo lulama, kha ku na mbi mmaha e huluka ka ditshiku da kuhoheta kwakwe; se m'bihi kha na mbi dawa ngu wubihi wakwe, ka ditshiku dile a hundulukako ka wubihi wakwe; hambi mlulami kha na mbi hanya ngu kululama ka ditshiku dile a no onha.