Jeremiya 17:2 - Bhiblia Yo Sawuleka

² vanana vawe va ti ti alakanya siluvelo sawe ni sifananiso sawe sa Aseri hahatshi ka mindonga yo nyuka mimangoni.

Jeremiya 17:2 Referans Kwoze

2 Makronika 24:18

Va to leka Nyumba ya Mkoma, Txizimu txa vatate vawe, veya khozela sithombe so vatwa ni sizimu simwani sawe. Se ngu mhakeyo Mkoma a to henyela va ka Judha ni va Jerusalema.

Jeremiya 2:20

Nguko ngale ni di funyile dikange dako, ni bhenula tingoti tako, u nje khawe: Na mbiswa ni txi thuma, nguko u sisate ka yotshe mimango yo guleka, ni hahatshi ka yotshe mindonga yo nyuka, u maha wugango.

Isaya 17:8

Se kha na mbi wonetela siluvelo, i ku mthumo wa manza akwe, mwendo kuwonetela si si nga mahwa ngu titiho takwe, hambi ka sithombe sakwe so vatwa, ni sifananiso sa ditambo.

Isaya 1:29

Nguko mi na wa tingana ngu mhaka ya mikusu yile mi nga yi navela, mi na wiswa tingana ngu mhaka ya tithembwe tile mi nga ti sawula.

2 Makronika 33:3

Nguko a to tshumela e aketeta makhalo o guleka ale ma nga ti khundumusilwe ngu tate wakwe Ezekhiya, a to akela siluvelo Bhahali, e maha sipopo so khongela ka sona, e khizamela sotshe siphatiphati sa nzumani e si thumela.

Valamuli 3:7

Se vanana va ka Israyeli va to maha kubiha masoni ka Mkoma, ve divala Mkoma, Txizimu txawe, aniko ve thumela Vabhahali ni Asterote.

Ezekhiyele 20:28

Nguko a kule ni nga ti ti va wuleta ka ditiko dile ni nga guleta dianza, kasi kuvaninga, vona va to wonetela ka sotshe simangwana, ni ka yotshe mindonga yo txhuma, kambe va ningete koneho miphaxo yawe, ve kombisa kona hale ku ni henyisa kwawe ngu miningelo yawe, va txi veketela ni sa kubhumula, se va txi ningela miningelo ya sa kusela.

Jeremiya 7:18

Vanana vo sengeletela tikhuni, vatate ve dhivela mndilo, ni vavasikati va vhuva mpupu kasi kumahela simbwanda txizimu txa txisikati, txi dhanwako ku mfumeli wa txisikati wa nzumani; na va txi ningela miningelo ya sakusela ka simwani sizimu, kasi ku ni wusela kuhenya.

Masalmo 78:58

Va henyisile Txizimu ngu mhaka ya siluvelo sa wuhedheni; va wusile txiluse txa Txizimu ngu kukhozela sithombe.

2 Makronika 33:19

Se mkombelo wakwe, ni ti Txizimu txi nga wu amukelisa tona, ni sotshe sionho sakwe, ni wubihi wakwe, ni makhalo o guleka ale a nga aka e veka ni sithombe sawe so vatwa, na a sanzi kutiveka hahatshi, wonani ti to totshe ti bhatwe ka mabhuku a vahuti.

Eksodha 34:13

Mi na khungumula siluvelo sawe, mi txi fayetela sithombe sawe, ni ku sakata sipopo sawe, amu va khongelako kona Aseri.

Jeremiya 3:6

Mkoma a to womba kwangu ka masiku a mfumeli Josiya, a txi khene: “Ina u ti woni ti a nga maha Israyeli wu wo tiwuka kani? Ene a kwete mimango yotshe yo guleka, ni hahatshi ka yotshe mindonga yo nyuka, konamo a ta so mbetete wugangoni.

Jeremiya 3:23

Kha ditshuri hi thembile walo kuhanyiswa ku kutako ngu mimwayani, ni ngolovanya ya mimwayani kha yi vhuni txilo. Kha ditshuri kuhanyiswa ka Israyeli kuta ngu ka Mkoma, Txizimu txathu.

Dhewuteronome 12:2

Mi na ya haxulela otshe makhalo awa vathu va mi yelako kuya va khozisa, va nga ti khozela ka ona sizimu sawe, txitimwi ka mimango ya hombe, amu ka mimango yo guleka ni mu ka simangwana, ni hahatshi ka yotshe mindonga yo nakana;